Pagpaniid sa Kalibotan

◼ Sa tibuok kalibotan, 5.7 ka milyong pagsulay sa pagpangilad sa mga tiggamit ug Internet ang gihimo kada adlaw.—MAGAZINE, ESPANYA.

◼ “Sa 2005, ang mga kaso sa paghikog sa Japan mikapin nag 30,000 sulod sa walo ka sunodsunod nga tuig.” Ang Japan maoy usa sa kinatas-an sa kalibotan.—MAINICHI DAILY NEWS, JAPAN.

◼ “Sa miaging 500 ka tuig, 844 ka espisye ang nangapuo (o nangapuo diha sa kalasangan) tungod sa kalihokan sa tawo.”—IUCN, WORLD CONSERVATION UNION, SWITZERLAND.

◼ Sumala sa estadistika sa gobyerno, 6 porsiyento sa mga taga-Britanya—lalaki ug babaye—maoy homoseksuwal. Ang balaod nga gipatuman sa 2005 “nagtugot sa samag-sekso nga managtrato nga ‘maminyo,’” ug ang maong balaod naghatag kanilag susamang mga katungod nga gihuptan sa heteroseksuwal nga mga magtiayon.—THE DAILY TELEGRAPH, INGLATERRA.

Dagkong mga Yelo Kusog nga Nangahilis

“Nagkakusog ang paghilis sa ubay-ubayng dagkong mga yelo mao nga anam-anam nga nangatunaw ang mga yelo sa Greenland Ice Sheet,” nagtaho ang magasing Science. Gipakita sa pagpaniid sa satelayt nga sulod sa miaging lima ka tuig, ang gikusgon sa paghilis sa daghang dagkong mga yelo sa Greenland halos midoble, nga nakaabot ug kapin sa 12 ka kilometro kada tuig. Sulod sa miaging napulo ka tuig, ang katibuk-ang paghilis sa mga yelo miuswag gikan sa kapin sa 90 ka kilometro kubiko kada tuig ngadto sa 220 ka kilometro kubiko kada tuig. Busa ang mga siyentipiko nag-ingon nga “ang pagsaka sa lebel sa dagat sa umaabot mas taas pa kay sa gibanabana karon.”

Mga Simbahan Nagpista Alang Kang Darwin

Duolan sa 450 ka “Kristohanong” mga simbahan sa Tinipong Bansa ang nagsaulog sa ika-197 nga kasumaran sa adlawng-natawhan ni Charles Darwin sa Pebrero 2006. Ang maong kasaulogan naglakip sa “mga programa ug mga wali aron ipasiugda nga ang iyang teoriya sa ebolusyon nahiuyon sa Kristohanong pagtulon-an ug nga ang mga Kristohanon dili kinahanglang mamili kon unsay angay nilang tuohan, relihiyon ba o siyensiya.” Sumala sa Chicago Tribune, si Michael Zimmerman, usa ka biologo ug dekano sa College of Letters and Sciences sa University of Wisconsin-Oshkosh, nga maoy nag-organisar sa maong kasaulogan, miingon: “Dili ka kinahanglang mamili. Makatuo ka nianang duha.”

Pagbinastos Diha sa Trabahoan

“Ang pagbinastos diha sa trabahoan mahimong makaalkanse sa usa ka organisasyon ug panahon, kakugi ug abilidad,” nag-ingon ang The Wall Street Journal. Nakaplagan sa usa ka surbi nga gihimo sa duolag 3,000 ka tawo nga kapin sa 90 porsiyento ang “nakasinatig pagbinastos diha sa trabahoan.” Ang 50 porsiyento kanila nag-ingon nga ilang “nausik ang panahon sa pagtrabaho tungod sa paghunahuna bahin sa maong hitabo,” “gikunhoran sa 25 porsiyento kanila ang ilang kakugi sa trabaho,” ug usa sa walo ka trabahante ang miundang. Matod ni Christine Porath, usa ka propesora sa management sa University of Southern California, “ang pagkatapolan, pagkahimalta, ug ang pagpangawat pa gani sa mga trabahante mahimong mga ilhanan nga ang usa ka organisasyon dunay suliran sa pagbinastos,” nag-ingon ang Journal.

Daghang Basura sa Kadagatan

Sayo sa 2006, usa ka dakong tapok sa basura ang “gianod ngadto sa habagatang kadagatan sa Hawaii, nga nagdagsa sa biya nang mga himan sa pagpangisda ug plastik nga mga basura ngadto sa kabaybayonan sa Isla,” nagtaho ang The Honolulu Advertiser. Ang mga sulog nagduso sa kadaghanang naglutaw nga mga basura sa Amihanang Pasipiko ngadto sa linaw nga kadagatan, apan tungod sa dili-maayong panahon, maanod ang maong mga basura ngadto sa Hawaii. Sa 2005 “kapig 2,000 ka basura ang nakaplagan,” nga naglakip sa kapin sa 100 ka pukot. Ang mga basura makadaot sa kinabuhi sa kadagatan. Matod ni Charles Moore, magtutukod sa Algalita Marine Research Foundation: “Wala nay organikong mga isda sa kadagatan. Mga plastik nay ilang kinaon.”