Sa Unsang Paagi Mabuntog Nako Kining Bisyoha?
Mga Batan-on Nangutana . . .
Sa Unsang Paagi Mabuntog Nako Kining Bisyoha?
“Nagsugod ako pag-ugay sa akong kinatawo sa nag-edad akog otso anyos. Sa ulahi akong nakat-onan ang panglantaw sa Diyos bahin niana. Lain kaayo ang akong bation sa matag higayon nga mabuhat nako kana. Akong pangutan-on ang akong kaugalingon, ‘Unsaon paghigugma sa Diyos sa usa nga sama nako?’ Gibati nako nga dili gyod ko makalabang ngadto sa bag-ong kalibotan sa Diyos.”—Luiz. a
SAMA kang Luiz, tingali nabatasan na nimo ang masturbasyon o pag-ugay sa kinatawo. Ikaw nahibalo nga malipay si Jehova kon imong suklan ang agda ug ipasundayag ang pagpugong sa kaugalingon, usa ka bunga sa balaang espiritu sa Diyos. (Galacia 5:22, 23; 2 Pedro 1:5, 6) Apan usahay madaog ka sa agda. Sa matag higayon nga mabuhat nimo kana, ikaw mohinapos nga wala nay paglaom nga mausab ka pa, nga dili ka gayod makasunod sa matarong nga mga sukdanan sa Diyos.
Ingon gayod niana ang panglantaw sa batan-ong si Pedro sa iyang kaugalingon. “Sa dihang mabuhat nako kana pag-usab, maguol kaayo ako,” siya miingon. “Ako naghunahuna nga bisan unsa pay akong buhaton, dili na gayod ako mapasaylo pa tungod sa akong nabuhat. Nalisdan ako sa pag-ampo. Akong sugdan kini sa pag-ingong: ‘Jehova, wala ko masayod kon imo pa bang paminawon kining maong pag-ampo, apan . . .’” Ang usa ka batan-on nga ginganlag André naghunahuna usab niana. “Gibati nako nga ako salingkapaw,” matod pa niya. “Morag di ko gustong mobangon sa higdaanan aron buhaton ang mga buluhaton nianang adlawa. Maulaw kong motambong sa Kristohanong mga tigom ug makigbahin sa ministeryo.”
Kon mibati kag sama nianang kang Luiz, Pedro, o André, ayawg kaluya. Dili kay ikaw ra ang mibati niana, ug ang imong kahimtang adunay paglaom! Daghang batan-on—ug mga hamtong—ang nakigbisog sa masturbasyon ug nakahimo sa pagbuntog niini. Ikaw makahimo usab niana. b
Pagsagubang sa Pagkahasol sa Tanlag
Sama sa nahisgotan na, kadtong nagbatasan sa masturbasyon sagad nga hasolon sa ilang tanlag. Sa walay duhaduha, ang “pagkasubo sa diyosnong paagi” makatabang kanimo sa pagbuntog sa maong bisyo. (2 Corinto 7:11) Apan kon sobra, kini makadaot. Kini makapaluya pag-ayo kanimo nga moundang ka na sa pagpakigbisog.—Proverbio 24:10.
Nan, paningkamoti nga lantawon ang maong butang sa hustong paagi. Ang masturbasyon maoy usa ka matang sa kahugawan. Kini maghimo kanimo nga ‘ulipon sa nagkadaiyang mga tinguha ug mga kalipayan,’ ug kini mag-ugmad ug mga tinamdan nga makadaot sa hunahuna. (Tito 3:3) Bisan pa niana, ang pag-ugay sa kaugalingong kinatawo dili usa ka matang sa grabeng seksuwal nga imoralidad, sama sa pakighilawas. (Efeso 4:19) Busa, kon aduna kay problema sa masturbasyon, dili ka angayng mohinapos nga nakahimo kag sala nga dili na mapasaylo. Ang yawi mao ang pagsukol sa agda ug ang dili paglunga!
Usahay dali kaayong maluya ang usa sa dihang mabuhat niya kana pag-usab. Sa dihang mahitabo kana, hinumdomi ang mga pulong sa Proverbio 24:16: “Ang tawong matarong mahimong matumba sa makapito, ug siya mobangon gayod; apan ang mga daotan mangapukan tungod sa katalagman.” Ang temporaryong kapakyasan dili makapahimo kanimong daotan. Busa ayaw paglunga. Hinunoa, hunahunaa kon unsay nakaingon nga nahitabo kana pag-usab, ug paningkamoti nga malikayan ang mga buhat nga mitultol niana.
Imbes padayon kang masuko sa imong kaugalingon tungod sa imong problema, gahinig panahon ang pagpamalandong bahin sa gugma ug kaluoy sa Diyos. Ang salmistang si David, kinsa nakigbisog usab iyang mga kahuyangan, miingon: “Ingon sa usa ka amahan nga magapakitag kaluoy sa iyang mga anak, si Jehova nagpakitag kaluoy kanila nga nahadlok kaniya. Kay siya nahibalo pag-ayo sa atong pagkaumol, nga nahinumdom nga kita abog.” (Salmo 103:13, 14) Oo, si Jehova naghatag ug konsiderasyon sa atong pagkadili-hingpit ug siya “andam sa pagpasaylo” sa dihang masayop kita. (Salmo 86:5) Sa laing bahin, buot niya nga maningkamot kita nga mouswag.
Unsang praktikal nga mga lakang ang imong mahimo aron mabuntog nimo ang imong bisyo ug aron malikayan nga mahimo nimo kini pag-usab?
Ang Bili sa Pagtug-an
Bisag gihatagan nag publisidad ang sekso diha sa daghang kayutaan, ang daghang tawo malisdan pa gihapon sa paghisgot sa sekso sa paagi nga seryoso ug may dignidad. Sa imong bahin, tingali malisdan ka sa paghisgot niana bisan ngadto sa usa nga imong kasumbongan tungod sa kaulaw. Ang usa ka Kristohanon nga nakigbisog sa masturbasyon sulod sa pipila ka katuigan mikomento: “Maayo gayod unta kon nangisog ko sa pagsulti niini sa dihang batan-on pa ko! Ang akong tanlag naghasol kanako sa daghang katuigan, ug kini grabeng nakaapekto sa akong relasyon sa uban ug, labaw sa tanan, kang Jehova.”
Kang kinsa ka angayng makigsulti? Ang labing maayong tawo nga pakigsultihan mao ang usa nga hamtong sa espirituwal, ilabina ang usa ka ginikanan. Mahimo nimong sugdan kini sa pag-ingong: “Mahimo bang makigsulti ko nimo bahin sa usa ka problema nga nakahasol pag-ayo kanako?”
Si Mário midesidir sa pagpakigsulti sa iyang amahan, kinsa mabination ug masinabtanon kaayo. Iya pa ganing giangkon kang Mário nga siya usab nakigbisog niini sa dihang bata-bata pa siya. “Ang pagkamatinud-anon ug pagkasinsero sa akong amahan nakadasig pag-ayo kanako,” miingon si Mário. “Ako nakahinapos nga kon nabuntog niya kini, mabuntog usab nako kini. Natandog kaayo ko sa tinamdan sa akong amahan nga nakahilak ko.”
Si André maisogong mihukom nga makig-estorya sa usa ka Kristohanong ansiyano, ug nalipay siya nga iya kanang gihimo. c “Samtang ang ansiyano naminaw kanako, nanglugmaw ang iyang mga luha,” matod pa ni André. “Sa dihang nahuman kog sulti, iya akong gipasaligan nga si Jehova nahigugma kanako. Siya miingon kanako nga komon ang akong problema. Siya misaad nga iyang pagasusihon ang akong pag-uswag ug maghatag kanakog dugang impormasyon gikan sa mga literatura sa Bibliya. Ang pagpakigsulti kaniya nakatabang kanako nga mahimong desidido sa pagbuntog niana—bisan pag mabuhat nako kana pag-usab.”
Sama kang Mário ug André, makakaplag kag tabang sa imong pagpaningkamot nga mabuntog ang bisyo sa masturbasyon. Sunda ang tambag sa nagaubang kahon, “Himoa ang mga Lakang sa Pagbuntog Niining Bisyoha!” Oo, makasalig ka nga mahimo nimong mabuntog ang masturbasyon!
Ang dugang mga artikulo sa seryeng “Mga Batan-on Nangutana . . .” makita diha sa Web site nga www.watchtower.org/ype
[Mga footnote]
a Ang mga ngalan niining artikuloha giusab.
b Bisan tuod ang gikutlo dinhi maoy mga lalaki, daghang babaye ang nakigbisog usab sa masturbasyon. Busa, ang tambag nga gihatag dinhi mapadapat sa mga lalaki ug babaye. Matikdi usab nga kining artikuloha naghisgot sa pag-ugay sa kaugalingong kinatawo. Ang pagbuhat niini ngadto sa laing tawo nga dili nimo kapikas nahilakip sa gitawag sa Bibliya nga pakighilawas, usa ka bug-at kaayong sala sa mata sa Diyos.—Tan-awa ang artikulong “Mga Batan-on Nangutana . . . Unsay Daotan sa Pagpakigsekso Una Magminyo?” sa among gula sa Hulyo 22, 2004, mga panid 12-14.
c Ang usa ka batan-ong babaye lagmit gustong makigsulti sa iyang inahan o sa usa ka hamtong sa espirituwal nga igsoong babaye sa kongregasyon.
ANGAYNG PALANDONGON
◼ Nganong angayng hinumdoman nga si Jehova “andam sa pagpasaylo”?—Salmo 86:5.
◼ Unsang mga lakang ang imong himoon aron mabuntog ang bisyo sa masturbasyon?
◼ Nganong dili ka angayng maulaw sa pagpangayog tabang?
◼ Sa unsang paagi masentro gayod nimo ang imong hunahuna sa mga butang nga putli?
[Kahon/Hulagway sa panid 19]
Ang Pagkapakyas Wala Magkahulogag Kapildihan!
Pagkasayon ang paghunahuna: ‘Napakyas ako, busa maayo pang moundang na ako.’ Buntoga kanang pagbatia. Ayaw itugot nga ang temporaryong kapakyasan, o bisan ubay-ubayng kapakyasan, magkahulogan sa kapildihan alang kanimo.
Tagda kining ilustrasyona: Kon ikaw nagsaka sa hagdanan ug nadalus-os sa usa o duha ka ang-ang tungod kay natumba, mangatarongan ka ba, ‘Maayo pag mobalik ako sa paglakaw ngadto sa tiilan sa hagdanan ug magsugod na usab’? Siyempre dili! Nan, nganong imong ipadapat kining palsong pangatarongan sa pagbugno sa daotang mga bisyo?
Ang mga pagbati sa sala kasagarang mosunod sa usa ka kapakyasan. Basin pasobrahan nimo kining mga pagbatia pinaagi sa paghinapos nga ikaw dili maayo, nga ikaw huyang ug kinaiya ug dili takos sa bisan unsang maayo. Ayaw itugot nga magpasobra ka sa maong pagbati sa sala. Kana makapakubos sa imong kusog nga imong gikinahanglan aron ipadayon ang bugno. Ug hinumdomi kini: Ang labing bantogang tawo nga sukad naglakaw niining yutaa, si Jesu-Kristo, mianhi aron sa paglukat sa mga makasasala, dili sa hingpit nga mga tawo. Busa walay mausa kanato ang makabuhat sa hingpit sa mga butang karong panahona.—Gikan sa Pagmata! Abril 8, 1991, panid 15.
[Kahon/Hulagway sa panid 20]
Himoa ang mga Lakang sa Pagbuntog Niining Bisyoha!
◼ Pugsa ang imong kaugalingon sa paghunahunag laing mga butang.—Filipos 4:8.
◼ Likayi ang paglantaw sa mga butang nga makapukaw sa dili-maayong mga tinguha.—Salmo 119:37.
◼ Pag-ampo alang sa “gahom nga labaw sa kasarangan.”—2 Corinto 4:7.
◼ Magmapuliki sa Kristohanong mga kalihokan.—1 Corinto 15:58.
[Kahon/Hulagway sa panid 20]
Dugang Tabang
Alang sa dugang impormasyon kon unsaon pagbuntog sa masturbasyon, tan-awa ang mga kapitulo 25 ug 26 sa librong Mga Pangutanang Gisukna sa mga Batan-on . . . Mga Tubag nga Mosaler, nga gipatik sa mga Saksi ni Jehova.