Ang Hunahuna sa Bibliya

Napakyas ba ang Kristiyanidad?

MGA un-tersiya sa populasyon sa yuta nag-angkong Kristohanon. Apan, ang kalibotan karon morag mas nabahinbahin sa politika ug mas mapintas kay sukad masukad. Nagpasabot ba kini nga sayop ang Kristiyanidad nga gitudlo ni Jesus? O dili kaha sayop ang paagi sa pagpadapat sa daghang tawo sa mga pagtulon-an ni Kristo?

Susihon niining artikuloha kon unsa gayoy gitudlo ni Jesus ug ang panig-ingnan nga iyang gihatag alang sa iyang mga sumusunod. Tagdon usab niini ang komon nga panglantaw sa nag-angkong mga Kristohanon nga kasumpaki diay sa tinuod nga kahulogan sa Kristiyanidad.

Tinuis nga Matang sa Kristiyanidad

Sulod sa gatosan ka tuig human sa kamatayon ni Kristo, ang usa ka tinuis nga matang sa Kristiyanidad maoy naangayang relihiyon sa Imperyo sa Roma. Kay wala na isipa nga dili-dinawat nga mga tagagawas, ang mga membro niining grupo sa nag-angkong mga Kristohanon sa wala madugay nahimong prominente diha sa politikal ug sosyal nga kalihokan sa Romanhong katilingban. Kini nga kausaban nagpalihok sa mga lider sa Simbahan, sama ni Augustine, sa pagtudlo nga miabot na ang gipaabot nga Gingharian sa Diyos. Ang maong mga lider nagtudlo nga ang ilang bag-ong naangkon nga politikal ug relihiyosong impluwensiya mao ang pamaagi sa pagpatuman sa kabubut-on sa Diyos sa yuta. Busa gipasiugda nila ang kahinungdanon sa paningkamot sa tawo sa pagdumala sa mga kalihokan sa yuta.

Ingong resulta, daghan ang nagtuo nga ang usa ka Kristohanon angayng makigbahin sa politikal nga kalihokan sa katilingban. Gihunahuna sa kadaghanan nga aron mabuhat kana, gikinahanglan usahay nga ipadaplin sa usa ka Kristohanon ang pipila ka bahin sa iyang pagtuo aron buhaton ang kabubut-on sa katilingban diin siya nagpuyo. Pananglitan, daghang tawo ang nagdayeg sa mga pagtulon-an ni Kristo bahin sa gugma ug pakigdait, apan sa samang higayon nagsuportar sa mabangis nga mga gubat. Sa mao gihapong katarongan, ang mga relihiyon nagdasig sa ilang mga sumusunod sa pag-ampo alang sa Gingharian sa Diyos apan sa samang higayon nagsuportar sa malupigong mga magmamando.

Kining mini nga matang sa Kristiyanidad dili mao ang relihiyon nga gitukod ni Jesus. Hinunoa, kini hinimog tawo ug maoy ginasunod sa kadaghanan sa nag-angkong mga Kristohanon karon. Kining matanga sa Kristiyanidad napakyas gayod, nga gipamatud-an  sa kaylap nga kawalay-pagtagad sa mga prinsipyo sa Bibliya diha sa tibuok Kakristiyanohan karon.

Unsa ba Gayod ang Gitudlo ni Jesus?

Lagmit matingala ang pipila sa pagkahibalo nga si Jesus miingon nga ang iyang mga sumusunod kinahanglang “dili bahin sa kalibotan, ingon nga [siya] dili bahin sa kalibotan.” (Juan 17:15, 16) Nganong nagdasig man si Kristo sa iyang mga tinun-an sa pagbaton niana nga baroganan? Ang hinigugmang tinun-an ni Jesus nga si apostol Juan mihatag ug tubag. Siya misulat: “Ang tibuok kalibotan nailalom sa gahom sa usa nga daotan.”—1 Juan 5:19.

Busa, ang mga pagtulon-an ni Kristo nag-agak sa mga tawo dili ngadto sa tawhanong mga organisasyon, kondili sa langitnong Gingharian sa Diyos nga maoy magpatungha ug matarong nga kalibotan dinhi sa yuta. (Mateo 6:10) Si Jesus mismo wala gayod makiling sa pagpangilabot sa tawhanong organisasyon sa iyang panahon. Dihadiha niyang gibalibaran ang usa ka politikal nga posisyon. (Juan 6:15) Wala usab siya mogamit ug kapintasan ingong paagi sa pagsulbad sa mga kasungian. (Mateo 26:50-53; Juan 18:36) Si Jesus wala magbilin ug konstitusyon o hugpong sa sibil nga mga balaod. Wala siyay gidapigang politikal nga mga isyu sa iyang panahon. Pananglitan, wala siya mahimong aktibista aron labanan ang mga katungod sa mga ulipon, ni nag-apil-apil siya sa pagpakig-away sa mga Hudiyo batok sa Roma.

Apan wala kini magpasabot nga si Jesus walay pagtagad sa mga tawo ug sa ilang mga suliran. Si Jesus daghag gitudlo bahin sa kaakohan sa usa ka tawo ngadto sa iyang isigkatawo. Iyang gidasig ang pagkamatinud-anon sa pagbayad ug mga buhis ug gipasiugda ang panginahanglan nga magpasakop kanilang adunay legal nga awtoridad. (Mateo 22:17-21) Iyang gitudlo kon unsaon pagpakitag aktibong interes sa kaayohan sa mga nanginahanglan. Iyang gitudlo usab kon unsaon pagpakitag pagtahod sa dignidad sa uban ug kon unsaon sa pagkahimong mabination, mapinasayloon, ug maluluy-on. (Mateo, mga kapitulo 5-7) Nasayod ang kadaghanan nga ang paghigugma sa Diyos ug sa silingan mao ang sentro sa mga pagtulon-an ni Kristo.—Marcos 12:30, 31.

Matuod nga Kristiyanidad Karon

Nan, sa unsang paagi mogawi ang matuod nga sumusunod ni Kristo? Siya mogawi nga sama kang Jesus. Samtang matinumanong nagtuman sa mga balaod sa nasod, siya magpabilin gayong neyutral sa mga kalihokan sa politika. (Juan 12:47, 48) Dili niya ikompromiso ang Kristohanong mga prinsipyo, bisan ilalom sa grabeng pagpit-os. (1 Pedro 2:21-23) Apan, dili siya angayng magpakabuta-bungol na lang sa mga kahimtang sa iyang palibot. Ang matuod nga Kristohanon adunay aktibong interes sa kaayohan sa mga tawo sa iyang palibot, sama sa gibuhat ni Jesus. (Marcos 6:34) Andam usab siyang mogamit sa iyang panahon, kusog ug ubang kahinguhaan aron abagan ang uban nga makabaton ug mas malipayong kinabuhi pinaagi sa pagtabang kanila nga makasabot sa mga pagtulon-an ni Kristo ug magkinabuhi subay niana.—Juan 13:17.

Busa, ang mga Saksi ni Jehova karon naningkamot sa pagsundog kang Kristo diha sa ilang pagpakiglabot sa ilang isigkatawo. Bisag mga makigdaiton ug masinundanon sa balaod nga mga lungsoranon, sila dili bahin sa kalibotan. Sama sa gihimo ni Jesus, sila dili makigbahin sa kapintasan ug sa kasungian sa politika nga komon kaayo karon. Ang ilang paglaom bug-os nga nasentro diha sa Gingharian sa Diyos nga maoy sulbad sa mga suliran nga giatubang sa kalibotan. Ang matuod nga Kristiyanidad mosangpot sa mas malipayong kinabuhi ug panaghiusa taliwala sa mga membro niini. (Juan 13:34, 35) Wala gayod kini mapakyas.

NAHIBULONG KA BA?

◼ Angay bang mag-apil-apil ang mga Kristohanon sa politika?—Juan 6:15.

◼ Girekomendar ba ni Kristo ang kapintasan ingong paagi sa pagsulbad sa mga kasungian?—Mateo 26:50-53.

◼ Unsa ang ilhanan sa matuod nga mga Kristohanon?—Juan 13:34, 35.

[Picture Credit Line sa panid 18]

EL COMERCIO, Quito, Ecuador