Ang mga Iglesya—Hain Kini Sila Paingon?
Ang mga Iglesya—Hain Kini Sila Paingon?
UNSAY nagkahitabo sa “Kristiyano” nga mga iglesya? Sa imong gipuy-ang lugar, nag-us-os ba sila o nag-uswag? Mahimong nakadungog kag mga pahayag bahin sa usa ka yugto sa pagkaikag pag-usab sa relihiyon, ug ang mga balita sa nagsugwak nga mga kongregasyon moabot usahay gikan sa Aprika, sa Silangang Uropa, ug sa Tinipong Bansa. Bisan pa niana, ang mga balitang gikan sa ubang mga bahin sa kalibotan, ilabina ang gikan sa Kasadpang Uropa, naghisgot bahin sa pagpanirado sa mga simbahan, sa nagkagagmayng mga kongregasyon, ug sa kaylap nga kawalay-pagtagad sa relihiyon.
Gibag-o sa daghang iglesya ang ilang pamaagi tungod sa nagkahilis nga gidaghanon sa mga tigsimba. Ang pipila nagmantala nga sila “dili-mahukmanon,” nga nagpasabot nga ang Diyos modawat sa bisan unsang matang sa panggawi. Ang nagkadaghang iglesya nagtaganag kalingawan, pagpaukyab, ug sekular nga mga pangdani imbes pagtulon-an gikan sa Pulong sa Diyos. Bisan pag ang pipila ka tigsimba nagtuo nga ang maong mga kausaban gikinahanglan sa pagpahiuyon sa tinuod nga mga kahimtang sa kalibotan karon, daghang sinserong tawo ang naghunahuna nga ang mga iglesya nagpahilayo na gikan sa buluhaton nga gitudlo ni Jesus. Atong susihon ang mga pamaagi sa mga iglesya sa di pa dugayng katuigan.