Homoseksuwalidad—Sa Unsang Paagi Malikayan Ko Kini?
Mga Batan-on Nangutana . . .
Homoseksuwalidad—Sa Unsang Paagi Malikayan Ko Kini?
“Sa nag-edad pa akog 12 anyos, naibog ko sa usa ka dalagita sa tunghaan. Ako nahibulong ug nabalaka nga basin ug tomboy ko.”—Anna. a
“Sa tin-edyer pa ko, gipugngan ko gayod ang akong kaibog sa ubang mga lalaki. Sa akong kahiladman ako nasayod nga dili normal ang maong mga hunahuna.”—Olef.
“Ako ug ang akong amiga naghalok kausa o kaduha. Sanglit maibog gihapon kog mga lalaki, naghunahuna ko nga basin maibog ko sa lalaki ug babaye.”—Sarah.
TUNGOD sa matinugotong mga tinamdan karon, daghang batan-on ang nadasig sa pag-eksperimento sa samag-sekso nga mga relasyon. “Daghang babaye sa akong tunghaan nangangkon nga tomboy, maibog sa parehong lalaki ug babaye, o mausisaon bahin sa pagpakigsekso sa parehong lalaki ug babaye,” matod sa 15-anyos nga si Becky. Nadiskobrehan ni Christa, 18 anyos, ang susamang kahimtang diha sa iyang tunghaan. “Duha ko ka klasmet nga babaye nanghanggat gayod nga makigsekso kanako,” matod niya. “Ang usa misulat kanakog mubong sulat nga nangutana kon gusto ko bang masayran kon unsay pagpakigsekso sa parehong babaye.”
Tungod kay ang samag-sekso nga mga relasyon dayag na kaayo, lagmit kang mahibulong: ‘Daotan ba gayod ang homoseksuwalidad? Unsa man kon ako maibog sa kapareho nakog sekso? Nagpasabot ba nga ako bayot o tomboy?’
Unsay Pag-isip sa Diyos sa Homoseksuwalidad?
Gihimo sa daghang tawo karon—bisan sa pipila ka klerigo—nga ang homoseksuwalidad maorag dili kaayo daotan. Bisan pa niana, ang Bibliya prangka kaayo bahin niini. Kini nagsulti kanato nga ang lalaki ug babaye gibuhat ni Jehova nga Diyos ug iyang gituyo nga ang tinguha sa pagpakigsekso tagbawon lang sa bana ug asawa. (Genesis 1:27, 28; 2:24) Busa, dili katingad-an nga ang Bibliya nagsaway sa homoseksuwal nga mga buhat.—Roma 1:26, 27.
Hinuon, daghan ang moingon nga karaan na ang Bibliya. Pananglitan, ang 14-anyos nga si Megan nagpatuo, “Ang pipila ka butang nga gisulti sa Bibliya dili na mapadapat sa kalibotan karon.” Apan nganong ang pipila dali kaayong mosulti niana? Kasagaran, kana tungod kay ang hunahuna sa Bibliya mosumpaki man sa ilang kaugalingong hunahuna. Sila dili motuo sa Pulong sa Diyos tungod kay ang gitudlo niini lahi sa ilang gusto nga tuohan. Apan mapihigon ang maong panghunahuna ug kita gidasig sa Bibliya sa pagsalikway nianang kortong panghunahuna! Sa pagkatinuod, diha sa iyang Pulong, si Jehova nga Diyos nag-awhag kanato sa pagpalandong sa kamatuoran nga ang iyang mga sugo maoy alang sa atong kaayohan. (Isaias 48:17, 18) Kana makataronganon. Kon buot sabton, kinsa bay mas nahibalo sa atong tawhanong kinaiyahan kay sa atong Maglalalang?
Ingon nga batan-on, mahimong nasinati mo ang nagkadaiyang mga emosyon. Unsa man kon maibog ka sa kapareho nimog sekso? Kana ba awtomatikong nagpasabot nga ikaw homoseksuwal? Wala. Hinumdomi, anaa ka pa sa “pagbuswak sa pagkabatan-on,” nga maoy usa ka yugto diin imong bation nga dili tinuyo ang gana sa pagpakigsekso. (1 Corinto 7:36) Sa usa ka panahon, ang imong pagtagad mahimong mapunting sa kapareho nimog sekso. Apan ang pagbaton sa maong tinguha wala magpasabot nga ikaw bayot o tomboy. Sa pagkatinuod, gipadayag sa mga estadistika nga kanang hiliga kasagarang mahanaw ra sa kadugayan. Lagmit mahibulong ka gihapon, ‘Nganong motungha man gayod ang maong tinguha?’
Moingon ang pipila nga ang homoseksuwalidad gipiho na diha sa mga gene. Moingon ang uban nga kini maoy panggawi nga makat-onan. Dili katuyoan niining artikuloha ang pagsusi sa lantugi kon ang hinungdan sa homoseksuwalidad mao ba ang kaliwat o ang impluwensiya sa katilingban. Sa pagkatinuod, mopatim-aw nga ang homoseksuwalidad gihimong yano kaayo kon kini ipasangil sa usa ra ka hinungdan. Ang homoseksuwalidad—nga sama gayod sa ubang mga panggawi—maorag komplikado pa kaayo kay niana.
Bisan kon unsay hinungdan, mahinungdanon ang pag-ila nga ang Bibliya nagsaway sa homoseksuwal nga mga buhat. Busa, ang tawo nga nagpakigbisog sa tinguha sa pagpakigsekso sa kaparehog sekso nag-atubang sa usa ka tumong nga makab-ot—siya makapili nga dili patumanan ang maong tinguha. Ingong ilustrasyon: Ang usa ka tawo mahimong daling masuko. (Proverbio 29:22) Sa nangagi mahimong iyang pahinuntan dayon ang pagsilaob sa kasuko. Apan, human makatuon sa Bibliya, nahibalo siya nga kinahanglang ugmaron niya ang pagpugong-sa-kaugalingon. Nagpasabot ba kana nga siya dili na gayod mobatig naglungotlungot nga kasuko sa iyang kahiladman? Wala. Ugaling lang, tungod kay siya nahibalo na kon unsay giingon sa Bibliya bahin sa wala-mapugngi nga kasuko, dili niya pahinuntan ang iyang pagbati. Susama kana sa usa ka tawo nga naibog sa kapareho niyag sekso apan nahibalo na karon kon unsay giingon sa Bibliya bahin sa homoseksuwal nga mga buhat. May mga higayon nga motungha ang dili-tukmang tinguha. Bisan pa niana, pinaagi sa pagsunod sa tambag sa Bibliya, malikayan niyang pahinuntan ang maong tinguha.
Itugot nato, ang tinguha sa pagpakigsekso sa kaparehog sekso mahimong nakadulot na kaayo. Bisan pa niana, magmasaligon nga bisan ang nakadulot na kaayo nga daotang tinguha arang malangkat. (1 Corinto 9:27; Efeso 4:22-24) Sa kataposan, ikaw ang magbuot sa imong paagi sa kinabuhi. (Mateo 7:13, 14; Roma 12:1, 2) Ug bisan pa sa katugbang nga mga pangangkon, ikaw makakat-on sa pagpugong sa imong kusog nga mga pagbati—o labing menos makalikay nga pahinuntan kana.
Isalikway ang Daotang mga Buhat
Sa unsang paagi makalikay ka nga malangkit sa homoseksuwal nga mga buhat?
◼ Una Itugyan ang imong tanang kabalaka kang Jehova pinaagi sa pag-ampo, nga masaligon nga “siya may kahingawa [kanimo].” (1 Pedro 5:7; Salmo 55:22) Si Jehova makapalig-on kanimo pinaagi sa kalinaw nga “labaw sa tanang panghunahuna.” Kini ‘makabantay sa imong kasingkasing ug sa imong mga gahom sa pangisip’ ug mohatag kanimog “gahom nga labaw sa kasarangan” nga makapugong nga pahinuntan ang daotang tinguha. (Filipos 4:7; 2 Corinto 4:7) Si Sarah, nga nakigbisog sa kabalaka nga siya basin maibog sa lalaki ug babaye, nag-ingon: “Kon hasolon ko sa akong mga hunahuna, ako moampo; ug si Jehova magpalig-on kanako. Kon wala ang iyang tabang dili ko masagubang ang maong suliran. Ang pag-ampo mao ang akong panalipod!”—Salmo 94:18, 19; Efeso 3:20.
◼ Ikaduha Pun-a ug makapalig-ong espirituwal nga kahibalo ang imong kaisipan. (Filipos 4:8) Basaha ang Bibliya adlaw-adlaw. Ayaw gayod ipakaway-bili ang gahom niini sa pag-impluwensiya sa imong hunahuna ug kasingkasing alang sa imong kaayohan. (Hebreohanon 4:12) Ang usa ka batan-ong lalaki nga ginganlag Jason nag-ingon: “Ang Bibliya—apil ang mga teksto sama sa 1 Corinto 6:9, 10 ug Efeso 5:3—may dakong epekto kanako. Basahon ko kining mga tekstoha inigtungha sa daotang tinguha.”
◼ Ikatulo Likayi ang pornograpiya ug ang mga butang nga nagpasiugdag homoseksuwalidad, nga makahaling lang ug daotang mga hunahuna. b (Salmo 119:37; Colosas 3:5, 6) Ang pipila ka pelikula ug mga salida sa telebisyon nagdasig usab sa pagtuo nga ang homoseksuwalidad lain lamang nga estilo-sa-kinabuhi. “Ang natuis nga panghunahuna sa kalibotan nakaapekto sa akong kaisipan ug nakadugang sa akong kalibog bahin sa seksuwalidad,” matod ni Anna. “Gilikayan ko na karon ang bisan unsa o si bisan kinsa nga nagdasig sa homoseksuwalidad.”—Proverbio 13:20.
◼ Ikaupat Pangitag tawo nga imong kasumbongan, ug makigsulti kaniya bahin sa imong mga panghunahuna. (Proverbio 23:26; 31:26; 2 Timoteo 1:1, 2; 3:10) Si Olef, kinsa nagpatabang sa usa ka Kristohanong ansiyano, nahinumdom: “Epektibo kaayo ang iyang tambag. Maayo untag ako mas sayong nakigsulti kaniya.”
Ayaw Pagsurender!
Hinuon, moingon ang pipila nga walay kapuslanan ang pagbuhat niining tanan, nga angay lang nimong dawaton kon unsa gayoy imong seksuwal nga mga tinguha ug angkonon nga ingon ka gayod niana. Apan ang Bibliya nag-ingon nga ikaw makahimog mas maayo pa niana! Pananglitan, kini nagsulti kanato nga ang pipila ka unang mga Kristohanon nga nagbuhat sa homoseksuwalidad nagbag-o. (1 Corinto 6:9-11) Mahimong makadaog ka usab sa maong pagpakigbisog—bisan pag niining tungora gibugno lang kini diha sa imong kasingkasing.
Kon magpadayon ang imong tinguha, ayaw pagsurender o paghinapos nga dili ka gayod molampos. (Hebreohanon 12:12, 13) Kitang tanan makigbugno usahay ug daotang mga kiling. (Roma 3:23; 7:21-23) Kon dili nimo pahinuntan ang daotang tinguha, ngadtongadto kana maawop ra. (Colosas 3:5-8) Labaw sa tanan, salig kang Jehova alang sa panabang. Siya nahigugma kanimo ug nahibalo kon unsay makapalipay kanimo. (Isaias 41:10) Oo, “salig kang Jehova ug buhata ang maayo . . . , ug ihatag niya kanimo ang mga hangyo sa imong kasingkasing.”—Salmo 37:3, 4.
Ang dugang nga mga artikulo gikan sa seryeng “Mga Batan-on Nangutana . . .” makaplagan sa Web site nga www.watchtower.org/ype
[Mga footnote]
a Ang mga ngalan niining artikuloha giilisan.
b Ang “metrosexuality”—usa ka estilo-sa-kinabuhi diin ang mga lalaki mohatag ug sobrang pagtagad sa ilang kaugalingon ug ilabina sa ilang panagway—nakapalubog kaayo sa kalainan sa bayot ug sa tarong nga lalaki. Sumala sa tawo nga giingong nagmugna sa maong termino, ang tawong nagkinabuhi sa maong estilo sa kinabuhi “mahimong sa dayag bayot, tarong nga lalaki o maibog sa lalaki ug babaye, apan kini dili na gayod bililhon tungod kay tin-aw nga ang tumong sa iyang gugma mao ang iyang kaugalingon ug ang seksuwal nga buhat nga iyang pilion mao ang makapatagbaw lang kaniya.” Ang termino napopular, matod sa usa ka ensiklopedia, “human sa nag-uswag nga pagdawat sa mga bayot diha sa katibuk-ang katilingban ug sa nagkunhod nga pagsupak sa homoseksuwalidad ug sa nausob nga mga ideya kon unsay mga hiyas sa tinuod nga lalaki.”
MGA BUTANG NGA ANGAYNG PALANDONGON
◼ Nganong ang Diyos dili mouyon sa homoseksuwalidad?
◼ Unsay imong mahimo kon ikaw nakigbisog sa kaibog sa kapareho nimog sekso?
◼ Kinsay imong kasumbongan kon ikaw nagpakigbisog sa homoseksuwal nga tinguha?
[Hulagway sa panid 30]
Pangayog tabang sa usa ka hamtong nga Kristohanon