Mga Willow​—Daghag-Klase nga Pamilya sa mga Kahoy

TINAMPO SA MAGSUSULAT SA PAGMATA! SA CZECH REPUBLIC

 ANG usa ka klase maoy yagpis, taas, ug tul-id. Ang lain nagkubo, nga ang tumoy niana nagluyloy. Apan, bisan pa sa nagsukwahi nga pamarog nianang duha, sila duol nga kabanay. Unsa ba kini sila? Mga kahoy—ang poplar ug ang weeping willow. Kanang duha ka kahoy maoy mga sakop sa pamilya sa willow.

Ang mga kahoyng willow sagad makita ubay sa mga tampi sa suba ug sa magbaw nga mga sapa. Sa Czech Republic, kini naglambo diha sa kalasakan, diin kini daling manurok gikan sa gagmay nga mga saha. Ang mga willow lagmit makaabot sa gihabogon nga 30 metros. Ang kadahonan niini lagmit yagpison ug nindot nga nagluyloy gikan sa tag-as, niwangon nga mga sanga. O, sa kahimtang sa mga shining willow ug pussy willow, ang kadahonan lagmit may pagkalapad.

Bisag adunay kapin sa 350 ka espisye sa mga willow ug mga poplar, ang usa ka espisye ilabinang makapaikag—ang weeping willow. Ang laing espisye, nga ginganlag goat willow, nailhan tungod sa mga pungpong sa balhiboong bulak o mga catkin, nga mamutot na sa dili pa manahon. Giingon nga inigtungha niining gagmayng mga putot sa bulak, duol na ang tingpamulak.

Pamilya sa Kahoy nga Daghag Sakop

Ang mga kahoyng poplar sagad makita sa Bohemia, ang rehiyon diin nahimutang ang Prague, ang kaulohan sa Czech Republic. Adunay labing menos 35 ka espisye sa mga poplar, nga ang tanan sakop sa pamilya sa willow. Ang black poplar lagmit mao ang labing ordinaryo, ug kini sagad makita sa daplin sa mga sapa ug sa umog nga kakahoyan sa Bohemia. Usa ka klase sa black poplar sama sa Lombardy o Italyanhon nga poplar adunay yagpisong lawas nga may nagpunting-sa-taas nga mga sanga nga nagtubo simpig sa dakong lawas sa kahoy. Kining nindot nga kahoy lagmit moabot sa gihabogong 35 metros, nga katumbas sa 11-ka-andanang tinukod! Ang mga Italyanhon nga poplar makita usab sa daplin sa daghang karsada, nga nakapanindot sa kabanikanhan, ilabina sa tinghunlak sa dihang ang kadahonan mahimong sulawong dalag.

Ang mga aspen maoy usa usab ka matang sa poplar. Kini dili sama kahabog sa Italyanhon nga poplar, ug ang ilang mga tumoy sa kahoy yagpison. Ang mga aspen adunay laing kinaiya—ang hinay kaayong huyohoy makapakurog sa kadahonan niini.

Ang Bibliya Naghisgot ba sa mga Kahoyng Willow?

Lagmit dili ka maghunahuna nga ang kahoyng poplar motubo abot pa sa habagatan sa Tungang Sidlakan. Bisan pa niana, gibatbat sa Bibliya nga ang mga Israelinhon nagbitay sa ilang mga alpa diha sa mga kahoyng poplar (alamo) sa dihang sila mga destiyero sa Babilonya. (Salmo 137:2) Nganong gihimo nila kadto? Bisag ang alpa maoy instrumento nga gigamit sa pagdayeg sa Diyos, ang masulub-ong mga Israelinhon lagmit walay gana nga motugtog sa ilang mga alpa sa maong panahon sa kalisdanan. (Isaias 24:8, 9) Gipaila usab sa Pulong sa Diyos nga ang poplar maoy usa sa mga kahoy kansang mga sanga giaprobahan nga gamiton sa pagtukod ug mga balongbalong panahon sa Pista sa Pagpanghipos sa Abot. (Levitico 23:40) Ang basahong Job sa Bibliya nagbatbat sa isog nga hippopotamus ingong nagpuyo sa mga sapa ug nag-ingon nga “ang mga willow [o mga poplar o alamo, sumala sa ubang mga hubad] sa daplin sa mga sapa ang nagsalimbong kaniya.”—Job 40:22, The Jerusalem Bible.

Sa pagkakaron, ang mga kahoyng poplar (o alamo) ug willow gigamit sa nagkadaiyang mga produktong komersiyal. Ang mga poplar kasagarang gigamit sa paggamag taklap nga tabla, playwod, mga alat, karton, ug nagkalainlain pang mga produktong papel. Ang kahoyng willow gipabilhan usab pag-ayo tungod sa pagkamapuslanon niini. Ang mga artesano nagbuhat ug mga bukag ug muwebles ginamit ang lubay nga gagmayng mga sanga niini. Ang willow usa gayod ka daghag-klase nga pamilya sa kahoy!

[Hulagway sa panid 10]

Dahon sa Aspen

[Hulagway sa panid 10]

Weeping willow

[Hulagway sa panid 10]

Lombardy nga poplar

[Hulagway sa panid 10]

Goat willow

[Hulagway sa panid 10]

Black poplar