Unsay Ikasulti Bahin sa Paghupot sa Kaputli Samtang Dili pa Minyo?

SA DI pa dugayng katuigan, ang mga panaad sa paghupot sa kaputli, sama sa “Dili ko makigsekso samtang dili pa minyo,” napopular sa mga batan-on. Kining maong mga panaad nagpabanaag sa dalayegong mga tumong ug nahiuyon sa mga sugo sa Bibliya. (1 Corinto 6:18; Efeso 5:5) Ugaling lang, kaduhaduhaan pa ang pagkatuman sa maong mga panaad. Sumala sa usa ka surbi, mga 60 porsiyento sa mga tin-edyer ang wala motuman sa ilang panaad sulod lang sa usa ka tuig.

Dugang pa, giduhaduhaan usab kon unsay gipasabot sa pipila ka batan-on sa “paghupot sa kaputli” ug “pagkaulay.” Si Charlene C. Giannetti ug Margaret Sagarese nagsulat diha sa ilang libro nga Boy Crazy!: “Ang mga eksperto nag-ingon nga ang pagpakigsekso nga ipaagi sa baba ug sa lubot gihimo sa mga batan-on nga gusto gayong magpabiling ulay. Gituohan sa maong mga batan-on nga ang bisan unsang seksuwal nga kalihokan nga ang kinatawo sa lalaki wala makasulod sa iya sa babaye maoy dili pagpakigsekso.”

Dayag nga kaylap ang maong panglantaw. Human mainterbiyo ang kapin sa usa ka libong tin-edyer, usa ka awtor miingon: “Tingali usa o duha lang sa matag usa gatos ka batan-on ang nag-isip sa pagpakigsekso nga ipaagi sa baba ingong seksuwal nga buhat.” Siya midugang: “Angay nimong amgohon nga kanay lagmit gituohan sa imong tin-edyer, o kaha sa imong anak nga hapit nang motin-edyer.”

Kadtong nagtuman sa mga sukdanan sa Bibliya nahibalo gayod nga ang pagpakigsekso nga ipaagi sa baba ug sa lubot maoy pagpakigsekso, sumala sa tin-awng gipaila sa pagtawag niini. Ang sugo sa Bibliya sa ‘pag-ayad sa pakighilawas’ (“maglikay gayod sa seksuwal nga imoralidad,” Today’s English Version) naglakip sa tanang matang sa gidiling seksuwal nga mga buhat.—1 Tesalonica 4:3.