Usa ka Okasyon nga Angay Nimong Tambongan

“Ipadayon ninyo ang pagbuhat niini sa paghandom kanako.” Kanang mga pulonga, nga makita sa Lucas 22:19, gisulti sa atong Ginoong Jesu-Kristo sa dihang iyang gisugdan ang Memoryal sa iyang kamatayon. Ang kamatayon ni Jesus mao ang nagbukas sa kahigayonan alang sa katawhan nga makabaton ug kinabuhing walay kataposan ilalom sa Paraisonhong mga kahimtang. Busa angay natong handomon ang iyang kamatayon.

Motambong ka ba sa pagsaulog sa Memoryal niining tuiga?

Palihog dawata kini nga imbitasyon gikan sa mga Saksi ni Jehova aron ikaw makaduyog kanila sa pagsaulog niining hinungdanong okasyon. Kini nga kasaulogan himoon human sa pagsalop sa adlaw sa petsa nga katumbas sa Nisan 14 sa lunar nga kalendaryo sa Bibliya. Niining tuiga ang petsa maoy Lunes, Abril 2. Ang mga Saksi ni Jehova makasulti kanimo sa dapit ug eksaktong oras diin pagahimoon kini nga okasyon diha sa inyong lugar.