Wala Ako Masayop sa Akong Gipili nga Karera

Sumala sa giasoy ni Sonia Acuña Quevedo

Gitanyagan ako ug taas nga puwesto sa bangko. Ang maong posisyon nagkahulogan ug dakong kadungganan ug mas taas nga suweldo. Apan, nianang tungora gidapit usab ako sa pag-alagad sa layo nga kongregasyon ingong bug-os-panahong payunir nga ministro. Sa pagpalandong niini 32 ka tuig sa ulahi, ako nahibalo nga napili ko ang labing maayong karera.

SI Mama gimatuto ingong Romano Katoliko apan nagduhaduha siya sa doktrina sa simbahan. Siya nakapangutana kon nganong gisimba man ang mga imahen nga hinimo ra man kini sa tawo? Hinungdanon kaniya ang relihiyosong kamatuoran, ug nangita siyag mga tubag diha sa lainlaing mga relihiyon, apan wala siyay nakitang tubag.

Usa ka adlaw niana siya naglingkod ug nagpahangin sa gawas sa among balay sa Tuxtla, Mexico, sa dihang may Saksi ni Jehova nga miduaw. Kay nadasig nga natubag ang iyang mga pangutana pinaagi sa Bibliya, siya misugot nga duawon pag-usab sa Saksi. Sa dihang mibalik ang Saksi, si Mama nagpaabot kaniya uban ang ministro sa Sabadista, pari sa Katoliko, ug pastor sa Nasareno nga denominasyon. Nangutana si Mama bahin sa Igpapahulay, ug ang Saksi lang maoy nakahatag ug makapatagbaw nga tubag gikan sa Kasulatan. Sa pagkatinuod, siya lang ang may Bibliya! Niadtong 1956, human lang sa unom ka bulan nga pagtuon sa Bibliya, siya gibawtismohan ingong Saksi ni Jehova. Otso anyos ako niadtong tungora.

Si Papa Nabalaka Pag-ayo

Si Papa dili supak nga nagtuon si Mama sa Bibliya. Apan sa dihang siya nagsugod na sa pagtambong sa Kristohanong mga tigom ug sa pagtudlo kanamong upat nga mga anak—duha ka lalaki ug duha ka babaye—gigisi ni Papa ang iyang literatura. Kay kombinsido nga kami napahisalaag, iyang gisulayan paggamit ang Katolikong Bibliya sa pagpamatuod nga gibutang sa malimbongong paagi sa mga Saksi ang ngalan sa Diyos—nga Jehova—diha sa ilang bersiyon sa Bibliya. Sa dihang gipakita ni Mama kaniya ang ngalan ni Jehova diha sa iyang Bibliya, siya nakurat pag-ayo, ug ang iyang tinamdan sa mga Saksi anam-anam nga nausab.—Salmo 83:18.

Sa Mexico, espesyal nga okasyon alang sa usa ka dalagita ang ika-15 nga adlawng natawhan. Sanglit ang pagsaulog ug adlawng natawhan dili man Kasulatanhon, mihunong na ako sa pagsaulog niini. a Apan si Papa miinsister sa paghimog usa ka espesyal nga butang alang kanako. Naghunahuna ako bahin niini ug miingon, “Imbes hatagan ko nimo ug gasa, kuyogi na lang ko sa sunod nga asembliya sa mga Saksi ni Jehova.” Misugot siya, ug mitubo ang iyang interes sa Bibliya.

Usa ka gabii niana, human sa kusog kaayong bagyo, si Papa grabeng naangol sa dihang nakoryentehan sa nahulog nga kable sa koryente. Samtang nagpaayo siya didto sa ospital, 24-oras siyang giatiman sa mga Saksi sa among dapit agig pagpasundayag sa ilang Kristohanong gugma nga dili gayod niya mahikalimtan. Sa ngadtongadto, siya nagsugod sa pagpakigbahin sa pagsangyaw ug nagpahinungod sa iyang kinabuhi kang Jehova. Ikasubo, sa Septiyembre 30, 1975, usa ka bulan antes sa iyang bawtismo, siya namatay. Dako gayod ang among pangandoy nga magakos siya panahon sa pagkabanhaw!—Buhat 24:15.

Maayong Impluwensiya sa Pamilya

Ang akong magulang nga babaye, si Carmen, nagpabili gayod sa bug-os-panahong ministeryo. Wala madugay human sa iyang bawtismo sa 1967, siya nahimong regular payunir, nga naggugol ug mga 100 ka oras diha sa ministeryo matag bulan. Sa ulahi, siya mibalhin ngadto sa siyudad sa Toluca, sa sentral Mexico. Nakakita ako ug trabaho sa bangko ug gibawtismohan sa Hulyo 18, 1970.

Ang bug-os-panahong ministeryo nakapalipay  kaayo kang Carmen, ug gidasig niya ako sa pag-uban kaniya sa Toluca. Naghunahuna ako bahin niini usa ka adlaw niana samtang namati sa usa ka pakigpulong nga naghisgot nga kinahanglang gamiton sa mga sumusunod ni Jesus ang ilang bililhong espirituwal nga mga gasa sa paghimaya sa Diyos. (Mateo 25:14-30) Akong gipangutana ang akong kaugalingon, ‘Ako bang gigamit pag-ayo ang espirituwal nga mga gasa nga gipiyal kanako?’ Ang maong pagpamalandong nakapukaw sa akong tinguha sa pagbuhat ug dugang pa alang kang Jehova.

Pagpili Tali sa Duha ka Tumong

Sa 1974, ako miaplay sa pag-alagad ingong payunir nga ministro diha sa laing teritoryo. Wala madugay human niana, nakadawat ako ug tawag sa telepono sa akong trabahoan gikan sa usa ka Kristohanong ansiyano sa Toluca. “Naghulat na kami nimo. Nganong wala pa man ka moanhi dinhi?” siya nangutana. Sa akong katingala, giasayn na diay ako sa pag-alagad sa Toluca ingong espesyal payunir, apan ang sulat bahin sa akong asaynment wala makaabot kanako! (Ang mga espesyal payunir moalagad sa bug-os-panahon bisag asa pa sila iasayn sa organisasyon ni Jehova.)

Ako dayong gipahibalo ang bangko nga moundang na ako sa trabaho. “Kadiyot lang, Sonia,” matod pa sa akong superbisor, nga nagwarawara ug papel. “Bag-o lang kaming gipahibalo nga usa ka sa pito ka babayeng gipili nga mahimong asistant manedyer. Ang atong kompaniya wala pa sukad mag-asayn ug mga babaye sa maong katungdanan. Dili mo ba dawaton kini?” Sama sa gihisgotan na sa sinugdanan, kining maong posisyon makahatag ug kadungganan ug dako pag suweldo. Bisan pa niana, akong gipasalamatan ang akong superbisor ug giingnan siya nga nakadesisyon na ako sa pag-alagad sa Diyos nga mas bug-os pa. “Hala sige,” siya miingon. “Apan hinumdomi nga ang bangko bukas gayod alang kanimo kon nagkinahanglan ka man ugaling ug trabaho sa ulahi.” Paglabay sa duha ka adlaw, ako miabot sa Toluca.

Pag-alagad Ingong Espesyal Payunir sa Mexico

Sa dihang miapas ako kang Carmen, duha ka tuig na siya nga nag-alagad ingong espesyal payunir sa Toluca. Pwerte namong lipaya nga nagkauban na usab kami! Apan, kadiyot lang kaming nagkauban. Paglabay sa tulo ka bulan, si Mama naaksidente ug kinahanglan nang atimanon. Human magpakitambag sa sangang buhatan sa mga Saksi ni Jehova, nagkasabot kami ni Carmen nga mopauli siya sa amo ug atimanon si Mama, nga maoy gihimo niya sulod sa 17 ka tuig. Sulod nianang panahona, si Carmen nag-alagad ingong regular payunir, nga nagdapit sa iyang mga estudyante sa Bibliya nga sa balay na lang himoon ang pagtuon aron dili niya mabiyaan si Mama.

Sa 1976, gibalhin ako sa Tecamachalco, usa ka siyudad diin dako kaayo ug kal-ang ang mga kabos gikan sa mga sapian—ang mga kabos nagpuyo sa usa ka bahin sa siyudad, ug ang mga sapian, sa laing bahin. Nasugdan nako ug pagtuon sa Bibliya ang usa ka dalagang gulang nga nagpuyo uban sa iyang kuwartahang manghod nga lalaki. Sa dihang iyang gisultihan ang iyang igsoong lalaki nga gusto siyang mag-Saksi, ang igsoong lalaki namahad sa paghingilin kaniya. Bisan pa niana, kining mapaubsanong babaye wala mahadlok, ug human sa iyang bawtismo, gitininuod sa iyang igsoong lalaki ang iyang pamahad. Bisan tuod 86 anyos na siya niadtong tungora, siya bug-os nga nagsalig kang Jehova. Giatiman siya sa kongregasyon ug siya nagpabiling matinumanon hangtod sa iyang kamatayon.

Giasayn sa Bolivia Human Makagraduwar sa Gilead

Ako malipayong nag-alagad sa Tecamachalco sulod sa lima ka tuig. Dayon giimbitar ako sa pagtungha sa Gilead Extension School nga himoon sa Mexico. Ingon sa gipasabot sa ngalan niini, ekstensiyon kini sa tunghaan didto sa New York. Gidasig ako ni Mama ug ni Carmen sa pagdawat nianang imbitasyona, busa ako miadto sa sangang buhatan sa Mexico City alang sa napulo ka semanang kurso, nga maoy kinatayuktokan sa espirituwal nga bahin sa akong kinabuhi. Ang among klase migraduwar niadtong Pebrero 1, 1981, ug giasayn ako sa La Paz, Bolivia, uban ni Enriqueta Ayala (karon Fernández na).

Sa dihang miabot kami sa La Paz, ang mga igsoon nga mao untay motagbo kanamo wala moabot. “Nganong mag-usik man kita ug panahon?” kami miingon. Busa nagsugod dayon kami sa pagsangyaw sa mga tawo diha sa erport. Paglabay sa among tulo ka oras nga malipayong pagsangyaw, nagkita kami sa mga igsoon gikan sa sangang buhatan. Human makapangayog dispensa, sila miingon nga nalangan sila sa dalan tungod sa karnabal.

Pagsangyaw Diha sa Dapit nga Molapas Pa sa mga Panganod

Ang La Paz may gihabogong halos 3,625 metros ibabaw sa lebel sa dagat, busa sa kadaghanang adlaw ang mga panganod anaa sa ubos namo. Malisod  ang pagginhawa tungod kay menos ang hangin, ug kapoyon dayon ko human makasangyaw sa makadiyot. Bisan tuod miabot ug usa ka tuig una pa ako naanad sa pagpuyo sa habog nga lugar, mas daghan akog nabatonang mga panalangin ni Jehova kay sa pisikal nga mga kalisdanan. Pananglitan, usa ka buntag niana sa 1984, mitungas ako sa batoon nga bakilid paingon sa usa ka balay nga atua sa taluktok. Naghangak ako nga nanuktok sa pultahan, ug dihay babayeng migula. Bibo ang among panag-estoryahanay, ug misaad ako nga mobalik paglabay sa pipila ka adlaw.

“Ambot lang kon makabalik ka,” siya mitubag. Apan mibalik ako, ug gihangyo ako sa babaye sa pagtudlo sa iyang anak nga babaye bahin sa Bibliya. “Responsibilidad kana sa ginikanan,” ako miingon. “Apan, tabangan ti ka kon gusto ka.” Misugot siya ug midawat usab siya ug pagtuon sa Bibliya. Kay dili man siya makamaong mobasa, ang among unang gitun-an mao ang pulyeto nga Learn to Read and Write, nga gipatik sa mga Saksi ni Jehova alang niadtong sama niyag kahimtang.

Sa ulahi miabot ug walo ang mga anak niining maong pamilya. Sa dihang moduaw ako, bitaron ako sa mga bata aron makakatkat ako sa bakilid. Sa ngadto-ngadto, ang tibuok pamilya nag-alagad na kang Jehova—ang amahan, inahan, ug walo ka anak. Ang tulo ka babaye nagpayunir, ang usa sa mga lalaki nag-alagad ingong ansiyano sa kongregasyon. Ang amahan ministeryal nga alagad sa kongregasyon sa panahon nga namatay siya niadtong 2000. Dihang mahinumdoman ko kining talagsaong pamilya ug ang ilang pagkamatinumanon, ako malipay kaayo! Nagpasalamat ako kang Jehova nga gigamit niya ako sa pagtabang kanila.

Nagkauban na Usab Kami ni Carmen

Pagkamatay ni Mama sa 1997, gidapit na usab si Carmen sa pag-alagad ingong espesyal payunir. Sa 1998 giasayn siya sa Cochabamba, Bolivia, diin ako nag-alagad. Oo, paglabay sa 18 ka tuig nagkauban na usab kami, ug si Carmen gihatagag pribilehiyo ingong misyonaryo. Malipayon kami nga nag-alagad sa Cochabamba, nga tungod sa kanindot sa klima didto, ang mga sayaw dili gyod kono molalin! Sa pagkakaron, nag-alagad kami sa Sucre, Bolivia, usa ka nindot nga siyudad nga may 220,000 ka molupyo, nga nahimutang sa usa ka hataas nga walog. Ginganlan kaniadto ingong Gamayng Batikano tungod kay kini dunay daghan kaayong simbahan sa Katoliko, karon ang siyudad aduna nay lima ka kongregasyon sa mga Saksi ni Jehova.

Kon tingbon, ako ug si Carmen nakagugol na ug kapin sa 60 ka tuig ingong payunir, ug malipayon kami sa dako kaayong pribilehiyo nga nakatabang ug kapin sa usa ka gatos ka tawo nga mabawtismohan. Oo, ang bug-os-kalag nga pag-alagad kang Jehova, sa walay duhaduha, mao ang labing magantihong paagi sa pagkinabuhi!—Marcos 12:30.

[Footnote]

[Hulagway sa panid 15]

Ako motungas sa batoong bakilid sa pagdumala ug pagtuon niining pamilyaha

[Hulagway sa panid 15]

Nagsangyaw uban sa akong igsoon, si Carmen (sa tuo)