Gikan sa Among mga Magbabasa

Mga Batan-on Nangutana . . . Nganong Kinahanglan man Akong Mobasa? (Mayo 2006) Ako nag-edad ug 15 anyos, ug kining artikuloha nakatabang gayod kanako. Akong gidala ang magasin sa eskuylahan, ug namatikdan kini sa akong maestra. Panahon sa klase, iyang gihisgotan ang mahitungod sa batasan sa pagbasa ug iyang gipakita ang Pagmata! ngadto sa akong mga klasmet. Siya nag-ingon nga nagustohan gayod niya ang pagbasa sa maong artikulo, ug nagrekomendar niini sa tibuok klase.

D.A.C., Brazil

Kaniadto, ang sagad nakong basahon mao ra ang mga artikulo diha sa magasin nga akong ganahan. Karon, gipaningkamotan gayod nako nga mabasa ang tanang artikulo, bisan kon morag dili ko interesado niana sa sinugdan. Giganahan baya ko sa kadaghanan sa maong mga artikulo. Salamat kaayo.

E. G., Tinipong Bansa

Nahimuot ko nga duna diay daghang batan-on karon nga sama nako sa batan-on pa ko. Nabawtismohan ko sa edad nga 14 anyos ug karon ako 40 anyos na. Sa hapit na akong bawtismohan, gibatasan nako nga mobasag pipila ka pahina sa Ang Bantayanang Torre o Pagmata! matag adlaw. Sa akong hunahuna, kini ang hinungdan nga wala ko makapaltag basa bisag usa ka artikulo mao nga namentinar nako ang akong espirituwalidad.

S. O., Japan

Michael Servetus—Nag-inusara sa Pagpangita sa Kamatuoran (Mayo 2006) Salamat sa hinungdanong impormasyon niining artikuloha. Nadasig gayod ako sa pagpadayon sa pagsangyaw ug paglaban sa ngalan ni Jehova.

M. R., Brazil

Nailhan sa daghan si Servetus ingong tawo nga hawod diha sa natad sa medisina. Apan, ang artikulo nagpakita sa ubang makapahinganghang bahin sa personalidad niini nga eskolar, sama sa iyang pagkasinsero ug sa iyang pagpangita sa kamatuoran. Salamat sa pagpatik niining artikuloha.

M. J., Espanya

Nakatabang ang Pagpatalinghog sa mga Pasidaan (Hunyo 2006) Pagkamaayo gayod nga mahimong bahin sa mahigugmaong organisasyon ni Jehova. Buot nakong ipahayag ang akong kinasingkasing nga pasalamat sa tanang igsoon nga mitabang sa pag-ayo sa akong balay, nga grabeng nadaot tungod sa Bagyong Katrina. Kining balaya karon maoy makitang ebidensiya sa ilang gugma.

I. F., Tinipong Bansa

Seda—“Ang Rayna sa mga Panapton” (Hunyo 2006) Nahibulong ko kon giunsa pagbuhat ang seda sukad pa sa akong pagkabata. Hilabihan nakong lipaya sa dihang nakita nako kining artikuloha diha sa Pagmata! Nagustohan ko gayod kini, ug napausbaw pag-ayo niini ang akong pagpabili sa mga lalang ni Jehova.

A.C.L., Brazil

Pangunang mga Ilhanan sa Malignant Melanoma (Hunyo 8, 2005) Pinaagi sa paggamit sa dekolor nga mga hulagway sa maong artikulo, akong nasusi ang akong kaugalingon ug akong namatikdan ang naglagom nga butoy nga usa diay ka malignant melanoma. Maayo na lang kay mentras sayo pa natangtang na kini pinaagig operasyon. Dako gyod ang akong pasalamat kang Jehova sa maong praktikal nga artikulo.

K. N., Japan