Mga Batan-on Nangutana . . .

Nganong Kanunay man Akong Ikomparar sa Uban?

“Maglagot kaayo ko kon ikomparar ko sa akong mga ginikanan o mga magtutudlo sa uban.”—Mia. *

“Kon ikomparar gani ko sa uban, bation ko nga morag wala koy nada kay gusto na man ko nga maparehas sa tawo nga gikomparar nako.”—April.

SA ESKUYLAHAN, sawayon ka sa imong magtutudlo kay dili ka parehas sa imong klasmet nga maayo sa matematika. Sa balay, kasab-an ka sa imong ginikanan kay dili ka ingon ka hapsay sa imong igsoon. Dunay moingon, “Guwapa kaayo ang imong inahan sa dihang siya batan-on pa nga sama nimo!” Sakit kining komentoha kay mahimong maghunahuna ka nga basig maot ka sa panan-aw nianang tawhana. Gusto na kaayo kang mosiyagit ug moingon: “Wala ba sila kahunahuna nga lahi ko? Nganong kanunay man akong ikomparar sa uban?”

Nganong sakit man kaayo kon ikomparar ka sa uban? Kini ba adunay kaayohan? Unsay imong himoon aron makasagubang ka sa dihang ikomparar ka sa uban?

Nganong Sakit man Kon Ikomparar Ka sa Uban?

Ang usa ka rason mao nga seguro tinuod kana. Ang ginasulti sa mga tawo bahin kanimo mao tingaliy imong isulti kanunay sa imong kaugalingon. Pananglitan, si Becky miadmitir, “Ikomparar nako ang akong kaugalingon sa popular nga mga batan-on sa among eskuylahan ug moingon, ‘Kon parehas lang unta ko nila, daghan gyod ang ganahan nako.’”

Unsa may nakaingon niining pagkawalay kompiyansa sa kaugalingon? Buweno, tagda ang nagakahitabo sa imong lawas, emosyon, ug hunahuna. Tingali ang imong lawas kusog nga nagakausab. Ikaw ug ang imong mga ginikanan dili kaayo magkasinabot. Lagmit lahi na kaayo ang imong pagbati ug hunahuna bahin sa kaatbang nga sekso. Busa, maghunahuna ka tingali, ‘Normal ba ako?’

Tingali nagtuo ka nga ang bugtong paagi nga imong mahibaloan ang tubag mao ang pagkomparar sa imong kaugalingon sa ubang mga batan-on nga nakaeksperyensiya usab sa maong mga kausaban. Ug kini ang makahatag nimo ug problema! Mawala ang imong kompiyansa sa kaugalingon kon imong makita nga morag wala sila malisdi sa maong mga kausaban. Dayon sa dihang may moingon, ‘Nganong dili man ka parehas ni Pulano?’ tingali imong bation nga tinuod ang imong gikahadlokan—nga dili ka normal!

Gisulti ni April ang laing rason kon nganong sakit kaayong ikomparar sa uban. “Kon ikomparar ka sa uban, ilabina ngadto sa suod nimo, mapukaw ang imong kasina ug kalagot,” matod niya. Si Mia nahibalo sa maong pagbati. Ang iyang mga ginikanan ug magtutudlo morag kanunayng  nagkomparar kaniya sa iyang magulang nga babaye. “Ila akong sultihan kon unsay iyang nahimong kalamposan niadtong sama pa siya nakog pangedaron,” matod pa ni Mia. Ang resulta? “Mora na hinuon ug nagkontesanay kami sa akong igsoon. Maglagot pa gani ko niya usahay.”

Tinuod gayod nga ang pagkomparar makapatungha ug negatibong reaksiyon. Tagda kon unsay nahitabo sa suod kaayong mga kauban ni Jesus. Sa kataposang gabii una pa mamatay si Jesus, nahitabo ang “mainit nga panaglalis” sa iyang mga apostoles. Ngano? Ilang gikomparar ang ilang kaugalingon sa usag usa ug naglalis sila kon “kinsa kanila ang labing dako.” (Lucas 22:24) Walay duhaduha, ang ubang matang sa pagkomparar makadaot. Apan daotan ba ang tanang matang sa pagkomparar?

Mga Kahimtang Diin Makahatag ug Kaayohan ang Pagkomparar

Tagda ang batan-ong si Daniel ug ang iyang tulo ka kaubang mga Hebreohanon nga gihisgotan sa Bibliya. Kining mga batan-ona dili gustong mokaon sa lamiang mga pagkaon sa hari sa Babilonya nga gidili sa balaod sa Diyos. (Levitico 11:4-8) Aron makombinsir ang ilang tigbantay sa pagtabang kanila, si Daniel misugyot nga sulayan sila. Siya miingon nga human sa napulo ka adlaw nga pagkaog mga pagkaon nga gitugot sa balaod sa Diyos, ang ilang tigbantay angayng magkomparar kanila ngadto sa ubang mga batan-on sa palasyo sa hari. Unsay resulta?

Ang Bibliya nag-ingon: “Sa kataposan sa napulo ka adlaw [ang panagway sa mga Hebreohanon] mas maayong tan-awon ug mas undanon kay sa tanang batan-on nga nagkaon sa lamiang mga pagkaon sa hari.” (Daniel 1:6-16) Matikdi nga ang maayong resulta naangkon ni Daniel ug sa iyang mga kauban dili tungod kay sila himsog nang daan kon itandi sa ubang mga batan-on. Hinunoa, tungod gayod kini sa pagtuman sa batan-ong mga Hebreohanon sa mga balaod nga gihatag sa Diyos sa iyang katawhan.

Ang imo bang kahimtang susama niining batan-ong mga Hebreohanon? Kon nagkinabuhi ka subay sa maayong pamatasan nga gitudlo sa Bibliya, makita gayod nga ikaw lahi kay sa ubang mga batan-on. Ang ubang mga tawo nga makakita niini nga mga kalainan tingali matingala ug ‘magpasipala kanimo.’ (1 Pedro 4:3, 4) Apan, makita sa uban ang maayong resulta sa imong maayong panggawi, ug basin pa ganig magpalihok kini kanila sa pagkat-on bahin kang Jehova. (1 Pedro 2:12) Niini nga kahimtang, ang pagkomparar kanimo ngadto sa uban makahatag ug kaayohan.

Ang pagkomparar mapuslanon usab sa lain pang paagi. Pananglitan, mahimong naghunahuna ka nga mas daghan kag mga buluhaton sa balay kay sa imong mga igsoon. Apan, tingali lahi ang gihunahuna sa imong mga ginikanan. Aron matabangan ka sa pagtul-id sa imong panghunahuna, tingali maghisgot sila ug usa ka pananglitan sa Bibliya ug tambagan ka sa pagkomparar sa imong tinamdan ug mga lihok sa maong karakter sa Bibliya.

Pananglitan, ila ka tingaling pahinumdoman nga bisan pag si Jesus gitawag sa iyang mga tinun-an nga Ginoo ug Magtutudlo, siya kinabubut-ong naghugas sa ilang mga tiil. (Juan 13:12-15) Dayon ila kang dasigon sa pagsundog sa pagkamapaubsanon ug pagkakugihan ni Jesus. Sa pagkatinuod, ang Bibliya nagdasig sa tanang Kristohanon, batan-on ug tigulang, sa pagkomparar kanunay sa ilang kaugalingon kang Kristo ug sa pagpaningkamot sa ‘pagsunod pag-ayo sa iyang mga tunob.’ (1 Pedro 2:21) Kining matanga sa pagkomparar makatabang kanato sa pagpabiling mapaubsanon ug sa pag-ugmad ug personalidad nga mas makapalipay kang Jehova.

Pagsagubang sa Dili Maayong Matang sa Pagkomparar

Tinuod, makalagot ug makapaguol kon ikaw ikomparar sa dili maayong paagi ngadto sa imong igsoon o isigkabatan-on. Unsaon man nimo kini pagsagubang? “Ang hait nga salabotan sa usa ka tawo magapahinay gayod sa iyang kasuko,” matod pa sa maalamon nga si Haring Solomon. (Proverbio  19:11) Sa unsang paagi makatabang ang hait nga salabotan? Tingali wala ka makahunahuna niini, apan ang usa nga nagkomparar kanimo, sama sa imong ginikanan o magtutudlo, lagmit gustong makatabang kanimo. “Kon may magkomparar kanako sa uban,” matod ni Cathy, “akong pangutan-on ang akong kaugalingon, ‘Unsa kahay ilang nakita nga kinahanglan nakong pauswagon?’” Nakita ni Cathy nga pinaagi sa pagkahimong positibo, siya dili kaayo maguol o maglagot.

Apan, komosta na man kon sa imong tan-aw kanunay ka lang ikomparar sa uban? Pananglitan, morag kanunay ka lang sultihan sa imong ginikanan nga mas maayo pa ang imong igsoon kay kanimo. Basin buot nimong makig-estorya sa imong ginikanan ug matinahorong isulti kon unsay imong pagbati bahin sa iyang pagpunayg komparar kanimo sa imong igsoon. Tingali wala mahibalo ang imong ginikanan nga ikaw gisakitan niini.

Apan, hinumdomi nga adunay “panahon sa pagsulti” ug aduna usay “panahon sa paghilom.” (Ecclesiastes 3:7) Imbes mosinta dayon sa kasuko dihang ikomparar ka sa uban, hulata una nga mokalma ka, ug dayon pakig-estorya sa imong ginikanan o kon kinsa man ang nagkomparar kanimo sa uban. Kon kalmado ang imong pagsulti, mas makapakombinsir ang imong mga pulong.—Proverbio 16:23.

Kasagaran, ikaw dili kaayo masakitan sa dihang ikomparar sa uban kon nahibalo ka sa imong maayong mga hiyas. Si apostol Pablo miingon kang Timoteo: “Ayaw gayod tugoting may tawo nga magtamay sa imong pagkabatan-on.” (1 Timoteo 4:12) Medyo batan-on pa si Timoteo sa dihang gitudlo siya ingong Kristohanong magtatan-aw. Busa, malagmit ang pipila nagkomparar kang Timoteo sa negatibong paagi ngadto sa ubang mga kalalakin-an nga mas magulang ug mas eksperyensiyado kay kaniya. Apan ang maong pagkomparar kaniya dili makataronganon. Bisan ug batan-on pa, daghan ug kasinatian si Timoteo samtang nagkuyog kang Pablo. Nahibalo si Timoteo kon unsaon paggamit ang Pulong sa Diyos sa epektibong paagi. Ug iya gayod nga gihigugma ang iyang espirituwal nga mga igsoon.—1 Corinto 4:17; Filipos 2:19, 20.

Busa, sa sunod higayon nga ikomparar ka sa negatibong paagi ngadto sa uban, pangutan-a ang imong kaugalingon, ‘Husto kaha ang ilang gisulti?’ Kon ugaling tinuod ang ilang gisulti, paningkamot sa paghimog kausaban. Apan, kon walay espesipiko nga gisulti sa pagkomparar kanimo—sama sa, “Nganong dili man nimo sundogon ang imong igsoon?”—isipa nga ang ilang gisulti maoy alang sa imong kaayohan. Paningkamot kutob sa imong mahimo nga lantawong positibo ang ilang pagkomparar kanimo.

Si Jehova nga Diyos wala magsukod sa imong pagkatawo pinaagi sa pagkomparar kanimo ngadto sa laing dili-hingpit nga tawo. (Galacia 6:4) Siya wala magtan-aw sa panggawas nga panagway kondili sa imong kasingkasing. (1 Samuel 16:7) Sa pagkatinuod, si Jehova makakita dili lamang sa imong tinuod nga pagkatawo kondili sa personalidad usab nga gusto nimong ugmaron. (Hebreohanon 4:12, 13) Siya nahibalo nga ikaw masayop, apan ang iyang ginalantaw mao ang imong maayong mga hiyas. (Salmo 130:3, 4) Ang pagkahibalo niana makatabang kanimo sa pagsagubang sa dihang ikaw ikomparar sa uban.

Ang dugang nga mga artikulo gikan sa seryeng “Mga Batan-on Nangutana . . .” makita diha sa Web site nga www.watchtower.org/ype

[Footnote]

MGA BUTANG NGA ANGAYNG PALANDONGON

◼ Unsang matanga sa pagkomparar ang mahimong makapalagot kanimo?

◼ Kon ang imong mga ginikanan kanunayng magkomparar kanimo sa uban, unsay imong himoon aron masagubang kana?

[Blurb sa panid 12]

“Mas gusto ko nga ang nagtambag nako dili magkomparar nako ngadto sa uban, nga moingong ‘Sundoga si Pulano,’ kondili, dayegon una niya ang akong maayong mga hiyas ug dayon sa mahigugmaong paagi tabangan ako nga makita ang akong mga kahuyangan.”—Natalie

[Hulagway sa panid 13]

Tingali gusto nimong ipatin-aw sa matinahorong paagi kon unsay imong pagbati sa dihang ikomparar ka sa uban