Pagpaniid sa Kalibotan

◼ Sa miaging mga tuig, duolan sa 40 ka milyong mag-uumang Insek nawad-an sa ilang yuta tungod kay kusog nga nagkadako ang siyudad.—CHINA DAILY, TSINA.

◼ Sa tibuok kalibotan, dihay 28 ka dodagkong gubat ug 11 ka ginagmayng mga gubat ang nasangka sa tuig 2005.—VITAL SIGNS 2006-2007, WORLDWATCH INSTITUTE.

◼ Usa ka tem sa Tokyo Institute of Technology malamposong nakapalupad ug may-piloto nga ayroplano nga gaan kaayo nga motimbang ug 55 kilos ug gipadagan sa ordinaryong mga baterya. Ang ayroplano milupad sa gihabogong 391 metros sulod sa 59 segundo.—MAINICHI DAILY NEWS, JAPAN.

◼ Taliwala sa mga tiggamit ug Internet sa Holland nga nag-edad ug 12 ngadto sa 20 nga nakabukas sa gitawag ug “mga profile site” samtang naggamit ug kamera sa kompiyuter, “40 porsiyento sa mga batan-ong lalaki ug 57 porsiyento sa mga batan-ong babaye giingong gisugo sa paghukas sa ilang mga sinina o sa paghimog seksuwal nga buhat atubangan sa kamera sa kompiyuter.”—RUTGERS NISSO GROEP, NETHERLANDS.

Makaadik ba ang mga Dula sa Video?

“Ang mga reaksiyon sa utok sa mga tawong sobrang makadulag mga dula sa kompiyuter susama nianang sa mga palainom o sa mga adik sa marijuana.” Mao kanay giingon sa sikologong si Ralf Thalemann, nga pangulo sa usa ka grupong nanukiduki bahin sa pagkaadik diha sa Charité University Hospital sa Berlin, Alemanya. Gituohan nga ang kaukyab nga bation tungod sa sobrang pagdulag mga dula sa kompiyuter makaagda sa lawas sa pagpagawas ug daghang dopamine nganha sa utok sa magdudula, nga mopabatig kalagsik nga sa kadugayan mopahinabog “pagkaadik.” Ang usa ka surbi nagpakita nga kapin sa 10 porsiyento sa mga tawong nagadulag mga dula sa video mahimong maadik.

Ang mga Sapian Kasagaran “Mabalak-on ug Walay Kalinaw sa Hunahuna”

“Ang mga milyonaryo mabalak-on ug walay kalinaw sa hunahuna,” nag-ingon ang mantalaang China Daily sa Beijing. Usa ka surbi ang gihimo diha sa mga indibiduwal sa Sidlakang Tsina ug Habagatang Tsina kinsa may katigayonan nga moaberids ug 2.2 ka bilyong yuan ($275 milyones). Ang mga tigdukiduki, nga nagtuon sa “tinamdan [sa mga sapian] bahin sa relihiyon, kaminyoon, kinabuhi, karera ug salapi,” nakadiskobre nga “ang kadaghanan sa mga milyonaryo nahigugma ug nagdumot usab sa kuwarta.” Daghan sa mga gisurbi miingon nga gawas sa pagkabaton ug haruhayng kinabuhi ug sa pagbati nga daghag nalampos, “ang pangunang butang nga nahatag sa salapi kanila mao ang pagkapungtanon.”

Ang Pagtrabaho sa Uma Maayo sa mga Tawong May Diperensiya sa Utok

Kapin sa 100 ka eksperto gikan sa 14 ka nasod dili pa dugayng nagtigom sa Stavanger, Norway, sa pagtuon bahin sa Green Care, usa ka ideya nga naglangkit sa pagpanguma, pagtudlo, ug pag-atiman sa panglawas. Sumala pa sa usa ka kompaniya sa radyo ug telebisyon nga ginganlag NRK, ang uban nga may diperensiya sa utok sulod sa daghang tuig dili na kinahanglang isulod sa ospital sa mga buang dihang magtrabaho na sila sa uma. Kini “makapahimsog sa hunahuna ug lawas.” Kapin sa 600 ka umahan sa Norway nga naggamit ug kinaraang paagi sa pagpananom nakig-anib sa Green Care, nga pinaagi niini ang mga uma makadawat ug ekstrang kita.

Kapuslanan sa mga Torre sa Simbahan

“Ang mga simbahan sa New England [sa Tinipong Bansa] nakakitag solusyon sa nagkamenos nga badyet niini: pagpaabang sa nindot nga mga torre sa ilang simbahan ngadto sa mga kompaniya nga nagkinahanglag habog nga mga lugar nga kataoran ug mga antena alang sa mga cell phone,” nag-ingon ang magasing Newsweek. Dili daling makatukod ug mga torre nga mohatod ug modawat ug mga mensahe gikan sa mga cell phone tungod sa mga ordinansa diha sa residensiyal nga mga dapit, ug ang mga residente dili gustong may mga antena ang ilang lugar tungod kay kini makadaot sa talan-awon. Busa gitago sa mga kompaniya sa cell phone ang ilang mga kasangkapan diha sa sulod sa mga torre sa simbahan. Ang presidente sa usa ka consultant company sa mga simbahan nag-ingon: “Ang unang simbahan nga among nataoran karon ug mga antena sa tulo ka kompaniya mokitag $74,000 sa usa ka tuig alang sa usa ka luna nga walay gamit.”