Tibuok-Kalibotang Pagkadaot sa Moralidad

“KAYLAP gayod ang pagpanglimbong,” matod ni David Callahan, ang tagsulat sa bag-ong libro nga The Cheating Culture. Lakip sa ubang matang sa pagpanglimbong didto sa Tinipong Bansa nga iyang gihisgotan mao ang “pagpanglimbong sa mga estudyante sa hayskul ug kolehiyo,” “ilegal nga pagkopya” sa mga musika ug pelikula, “pagpangawat diha sa trabahoan,” “pagpanglimbong maylabot sa pag-atiman sa panglawas aron makasapig dako,” ug ang paggamit ug mga steroid diha sa esports. Siya mihinapos: “Kon imong hunahunaon ang tanang nagkalainlaing matang sa kalapasan sa moral ug legal nga mga sukdanan, imong makita nga grabe na gayod ang pagkadaot sa moralidad.”

Ang The New York Times nag-ingon nga ang gihimo sa gobyerno sa dihang mihapak ang Bagyong Katrina sa Tinipong Bansa niadtong Agosto 2005, “maoy usa sa labing makapakurat nga pananglitan sa pagpanglimbong, pagkatuso, ug sa sayop nga pamaagi sa pagpalakaw niini sa modernong kasaysayan.” Usa ka senador sa Tinipong Bansa mitaho: “Makapakurat gayod ang dayag nga pagpanglimbong sa gobyerno, ang kamapangahason sa mga palakaw niini, ug ang kadako sa salapi nga giusik-usikan niini.”

Tinuod, aduna gihapoy mga tawong maluluy-on ug dili mahakogon. (Buhat 27:3; 28:2) Apan kanunay kitang makadungog ug mga tawo nga moingon: “Unsa may akong makuha niana?” Ang tinamdan nga unahon sa mga tawo ang ilang kaugalingon morag mao nay kaylap karon.

Kaniadto, ang makauulaw ug dulumtanang imoral nga panggawi gikaingon nga maoy hinungdan sa pagkahugno sa mga sibilisasyon, sama sa Imperyo sa Roma. Kita ba makaingon nga ang nagakahitabo karon mahimong usa ka pasiuna sa mas malaglagong panghitabo sa umaabot? Ang tanang bahin ba sa kalibotan karon naapektohan sa “pag-uswag sa kalapasan,” nga maoy gitagna sa Bibliya nga timaan sa kataposan sa enterong sistema sa mga butang?—Mateo 24:3-8, 12-14; 2 Timoteo 3:1-5.

Ang Pagkadaot sa Moralidad sa Tibuok Kalibotan

Nagtaho bahin sa usa ka “komperensiya maylabot sa seksuwal nga pagpangabuso ug sa pornograpiya” diha sa eskuwater sa usa ka lugar sa Uganda, ang Hunyo 22, 2006 nga gula sa Africa News nag-ingon nga ang “pagpasagad sa mga ginikanan maoy nakapasamot sa prostitusyon ug pag-abuso sa droga sa maong dapit.” Ang mantalaan nag-ingon: “Ang tagdumala sa Child and Family Protection Unit sa Kuwerpo sa Kapolisan sa Kawempe, nga si G. Dhabangi Salongo, nag-ingon nga misamot gayod ang pagpangabuso sa mga bata ug ang kapintasan diha sa panimalay.”

Sumala sa usa ka doktor sa India, “mihuyang na ang moralidad sa katilingban.” Usa ka direktor sa pelikula sa maong nasod miingon nga “ang kombinasyon sa nag-uswag nga paggamit ug droga ug sa mas grabeng pagkamahilayon sa sekso maoy laing timailhan nga ang India sama na ka mapatuyangon sa Kasadpan.”

Si Hu Peicheng, sekretaryo-heneral sa China Sexology Association sa Beijing, miingon: “Kaniadto, ang mga tawo moila sa husto ug sayop. Apan karon, mohimo na kita bisan unsay atong gusto.” Usa ka artikulo sa magasing China Today nag-ingon usab: “Ang katilingban nahimo nang mas matinugoton bahin sa mga relasyon nga gawas sa kaminyoon.”

Di pa dugay, ang Yorkshire Post sa Inglaterra miingon: “Morag halos tanan andam sa pagpadayag sa ilang mga lawas ug sa paggamit ug sekso sa pagbaligya ug bisan unsa.” “Mga usa ka henerasyon kanhi, ang maong mga panggawi gikayugtan gayod sa mga tawo tungod kay kana maoy paglapas sa dinawat nga moralidad. Apan karon, halos bisan asa atong makita ang mga larawan bahin sa sekso ug ang pornograpiya . . . dinawat na sa katilingban.” Ang mantalaan midugang: “Ang mga basahon ug mga pelikula nga giisip kaniadto nga puwede lang tan-awon sa mga 18-anyos pataas, karon giisip na nga puwedeng tan-awon sa tibuok pamilya ug, sumala sa mga tigprotesta batok sa  pornograpiya, ang mga bata mao gayod ang gipuntirya.”

Ang The New York Times Magazine nag-ingon: “[Ang pipila ka tin-edyer] mag-estorya bahin [sa ilang pagpakigsekso] nga morag nag-estorya lang kon unsay pagkaon nga mapalit diha sa kantina.” Ang Tweens News, usa ka magasin nga naghatag ug giya sa mga ginikanan nga dunay mga anak nga 8 ngadto sa 12 anyos, nag-ingon: “Usa ka batang babaye misulat ug makahilap-sa-kasingkasing nga mensahe: ‘Gipugos ko ni Mama sa pagpakigdeyt ug pagpakigsekso sa mga batang lalaki. Dose anyos lang ako . . . tabangi ko ninyo, maluoy mo nako!’”

Dako na kaayog kausaban ang batasan sa mga tawo! Ang Toronto Star sa Canada miingon nga di pa dugay kanhi “ang mga bayot o mga tomboy nga mag-ipon sa dayag giisip nga usa ka dakong kalapasan sa moralidad.” Apan, si Barbara Freemen, nga usa ka maestra sa katilingbanhong kasaysayan sa Carleton University, sa Ottawa, miingon: “Ang mga tawo karon moingon, ‘Way labot ang uban kon unsay akong buhaton sa kaugalingon kong kinabuhi. Dili angayng manghilabot ang uban.’”

Dayag nga sa miaging mga katuigan, kusog nga nagkadaot ang moralidad diha sa daghang dapit sa kalibotan. Unsa may nakaingon niining dagkong mga kausaban? Unsay imong pagbati bahin niini? Ug unsay gipaila sa maong mga kausaban kon bahin sa umaabot?