Ang Hunahuna sa Bibliya

Unsay Ipasabot sa Pagkahimong Kristohanon?

“SA AMONG nasod ang pagkahimong Kristohanon nagpasabot sa pagsimba ug kas-a sa usa ka semana,” matod ni Kingsley nga nagpuyo sa usa ka nasod sa Aprika. Si Raad nga taga-Tungang Sidlakan misaysay: “Sa among lugar ang mga Kristohanon giisip ingong usa ka grupo nga nagsunod sa mga batasan ug mga tradisyon sa Kasadpan bahin sa ilang pamesti, mga kasaulogan, ug pagtratar sa mga babaye.”

Apan ang pagkahimong Kristohanon nagpasabot ba lamang sa pagsimba kas-a sa usa ka semana ug pagsunod sa pamatasan ug mga tradisyon sa katilingban? Dili ba makataronganon nga ang pulong “Kristohanon” magtumong sa paagi sa kinabuhi nga magbanaag sa mga tinamdan, hiyas, ug panggawi nga gisangyaw ug gipasundayag ni Kristo? * Giunsa pagtuman ang Kristiyanidad sa sinugdanan?

Unang Kristiyanidad—Usa ka Paagi sa Kinabuhi

Si Jesus miingon sa iyang mga sumusunod: “Kamo akong mga higala kon inyong buhaton ang ginasugo ko kaninyo.” (Juan 15:14) Sanglit ang mga pagtulon-an ni Jesus nakaapektar sa tibuok nilang kinabuhi, ang mga tinun-an ni Kristo sa sinugdanan nagtumong sa ilang relihiyon ingong ‘Ang Dalan.’ (Buhat 9:2) Wala madugay human niana, ‘pinaagi sa pagtultol sa Diyos sila gitawag nga mga Kristohanon.’ (Buhat 11:26) Kining bag-o nilang ngalan nagpasabot nga sila nagtuo nga si Jesus mao ang Anak sa Diyos, nga maoy nagpahibalo sa katawhan sa kabubut-on sa iyang langitnong Amahan. Kini nga pagtuo nag-agak kanila sa pagkinabuhi nga lahi sa kadaghanang tawo sa ilang palibot.

Ang mga pagtulon-an ni Kristo nagpalihok sa iyang mga sumusunod sa pagsunod sa mga pagtulon-an sa Bibliya, nga nagpasabot sa paglikay sa “pakighilawas, kahugawan, malaw-ayng panggawi, idolatriya, pagbuhat sa espiritismo, mga pagdumtanay,  panag-away, pangabugho, mga pagsinta sa kasuko, mga pakigtigi, . . . mga paghuboghubog, mga hudyaka, ug mga butang nga sama niini.” (Galacia 5:19-21; Efeso 4:17-24) Gipahinumdoman ni apostol Pablo ang mga Kristohanon sa Corinto nga ang pipila kanila nagbuhat niini kaniadto. Dayon siya midugang: “Apan kamo nahugasan na, apan kamo nabalaan na, apan kamo napahayag na nga matarong sa ngalan sa atong Ginoong Jesu-Kristo.”—1 Corinto 6:9-11.

Si E. W. Barnes nag-ingon diha sa iyang basahong The Rise of Christianity: “Ang unang kasaligang mga dokumento bahin sa Kristohanong kalihokan nagpakita nga sila gayod hinlo sa moral ug masinugtanon sa balaod. Ang ilang mga membro nagtinguha nga mahimong maayong mga molupyo ug maunongong mga ginsakpan. Ilang gilikayan ang mga kasaypanan ug mga bisyo sa paganismo. Sa ilang pribadong kinabuhi sila naningkamot nga mahimong makigdaitong mga silingan ug kasaligang mga higala. Sila gitudloan nga magmakasaranganon, magmakugihon ug magkinabuhing hinlo. Kon sila magkinabuhi gayod sumala sa mga prinsipyo nga ilang gisunod, sila mahimong matinud-anon ug matinuoron bisan pa sa pagkadaotan ug pagkamahilayon sa katilingban nga ilang gikinabuhian. Taas ang ilang mga sukdanan bahin sa seksuwal nga panggawi: gitahod nila ang bugkos sa kaminyoon ug putli ang ilang pamilyahanong kinabuhi. Ingon niana ang mga hiyas sa pagkahimong Kristohanon kaniadto.

Ang lain pang talagsaong ilhanan sa unang Kristiyanidad mao ang pagkamadasigon niini sa pagsangyaw. Si Kristo nagsugo sa iyang mga sumusunod: “Busa panglakaw kamo ug paghimog mga tinun-an sa katawhan sa tanang kanasoran.” (Mateo 28:19, 20) Si Jean Bernardi, propesor sa Sorbonne University sa Paris, Pransiya, miingon: “[Ang mga Kristohanon] gidahom nga mogawas ug mosangyaw bisan asa ug ngadto kang bisan kinsa. Diha sa kadalanan ug mga siyudad, sa mga plasa ug mga puloy-anan. Dawaton man sila o dili. Ngadto sa mga kabos, ug sa mga dato nga nababagan sa ilang mga kabtangan. . . . Sila kinahanglang mobiyahe sa dalan, mosakay ug mga barko, ug moadto sa halayong mga dapit sa yuta.”

Matuod nga Kristiyanidad Karon

Ang matuod nga mga Kristohanon karon kinahanglang makitang lahi tungod sa ilang pagkinabuhi, sama sa gihimo sa unang siglong mga Kristohanon. Sa samang paagi, ang mga Saksi ni Jehova naningkamot gayod sa pagsunod sa mga prinsipyo nga gipakita sa unang mga Kristohanon. Ang ilang mga paningkamot nga magkinabuhi uyon sa mga pagtulon-an sa Bibliya namatikdan sa mga tawo.

Pananglitan, ang New Catholic Encyclopedia miila nga ang mga Saksi ni Jehova nailhan ingong “usa sa labing maayog paggawi nga mga grupo sa kalibotan.” Ang Deseret News sa Salt Lake City, Utah, miingon nga ang mga Saksi ni Jehova “nagpalambo sa malig-ong bugkos sa pamilya ug nag-ugmad ug mabungahon ug matinud-anong mga lungsoranon.” Ang mantalaan midugang: “Ang mga membro niini nagsunod sa malig-ong lagda sa moralidad. Sila nagtuo nga ang pagpanigarilyo, sobrang pag-inom, pag-abuso sa droga, pagsugal, pagkamahilayon sa sekso ug homoseksuwalidad maoy mga buhat nga makadaot sa espirituwalidad. Ilang gitudlo ang pagkamatinud-anon ug pagkakugihan.”

Ang mga Saksi seryoso usab nga nagtuman sa ilang kaakohan ingong madasigong mga ebanghelisador. Nagkomento bahin niini, ang New Catholic Encyclopedia nag-ingon: “Ang pangunang obligasyon sa matag membro . . . mao ang pagpamatuod bahin kang Jehova pinaagi sa pagpahibalo sa Iyang nagsingabot nga Gingharian. . . . Ang usa kinahanglang mosangyaw sa epektibong paagi aron siya mahimong tinuod nga Saksi.”

Dayag, ang matuod nga Kristiyanidad naglangkit dili lamang sa yanong pagpamembro diha sa usa sa daghang relihiyon sa Kakristiyanohan. Si Jesus mismo nagtagna sa pagtungha sa mini nga mga Kristohanon. (Mateo 7:22, 23) Ang mga Saksi ni Jehova nagdapit kanimo sa pagkat-on kon unsay gitudlo ni Jesus ug sa pagtuman niana. Mao kanay ipasabot sa pagkahimong Kristohanon. Si Jesus miingon: “Kon nahibalo kamo niining mga butanga, malipayon kamo kon inyo kining buhaton.”—Juan 13:17.

[Footnote]

NAHIBULONG KA BA?

◼ Kinsay gitawag ni Jesus nga iyang mga higala?—Juan 15:14.

◼ Unsang matanga sa panggawi ang angayng likayan sa matuod nga mga Kristohanon?—Galacia 5:19-21.

◼ Unsang buluhatona ang angayng ambitan sa mga Kristohanon?—Mateo 28:19, 20.

[Mga hulagway sa panid 26]

Ang matuod nga mga Kristohanon maoy masibotong mga ebanghelisador, sama ra nga sila ingon niana kasiglohan kanhi