Unsay Kaugmaon Niining Kalibotana?

ANG BIBLIYA dugay nang nagtagna bahin sa pagkadaot sa moralidad nga nag-ingon: “Sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, magmahigugmaon sa salapi, . . . dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, . . . mabangis, walay gugma sa pagkamaayo, mga mabudhion, gahig ulo, nangburot sa garbo, mga mahigugmaon sa kalipayan inay nga mga mahigugmaon sa Diyos, nga nagbaton sa dagway sa diyosnong pagkamahinalaron apan nagpanghimakak sa gahom niini.”—2 Timoteo 3:1-5.

Mouyon ka tingali nga kining tagnaa sa Bibliya tukmang naghubit sa kalibotan karon. Bisan pa niana, kini girekord mga 2,000 ka tuig na kanhi! Ang tagna gisugdan niining mga pulonga: “Sa kataposang mga adlaw.” Unsay kahulogan sa ekspresyon nga “kataposang mga adlaw”?

“Kataposang mga Adlaw” sa Unsa?

Ang “kataposang mga adlaw” nahimong komon na kaayong ekspresyon. Sa Iningles nga pinulongan lamang, kini nahimong ulohan sa daghan na kaayong basahon. Tagda pananglitan ang bag-ong libro nga The Last Days of Innocence—America at War, 1917-1918. Gipatin-aw diha sa pasiuna niini nga ang terminong “kataposang mga adlaw” gigamit sa pagpasabot sa usa ka espesipikong yugto sa panahon diin nadaot pag-ayo ang moralidad.

Ang pasiuna nagkanayon: “Ang [Tinipong Bansa] kusog kaayong nausab sa 1914 kay sa bisan unsang panahon sa kasaysayan niini.” Sa pagkatinuod, niadtong 1914 nabanlod ang tibuok kalibotan sa gubat, nga wala pa mahitabo sukad. Ang libro nag-ingon: “Kini maoy bug-os nga gubat, ang panag-away dili kasundalohan batok kasundalohan kondili nasod batok nasod.” Kining gubata, sama sa ato unyang mahibaloan, nahitabo sa pagsugod sa gitawag sa Bibliya nga “kataposang mga adlaw.”

 Ang Bibliya nagtudlo nga sa dili pa bug-os nga matapos kining kalibotana, kini makasinatig usa ka espesipikong yugto sa panahon nga gitawag ug “kataposang mga adlaw.” Gani, ang Bibliya nag-ingon nga dihay usa ka kalibotan nga milungtad kaniadto apan kini natapos, nga nagsaysay: “Ang kalibotan niadtong panahona nakaagom sa kalaglagan sa dihang kini gilunopan sa tubig.” Unsang panahona kadto, ug unsang kalibotana ang natapos? Kadto mao ang karaang “kalibotan sa dili-diyosnong katawhan” nga naglungtad sa panahon ni Noe. Sa susamang paagi, ang kalibotan karon matapos. Apan kadtong mag-alagad sa Diyos makalabang-buhi sa maong kataposan, maingon nga si Noe ug ang iyang pamilya nakalabang-buhi kaniadto.—2 Pedro 2:5; 3:6; Genesis 7:21-24; 1 Juan 2:17.

Kon Unsay Giingon ni Jesus Bahin sa Kataposan

Si Jesu-Kristo usab naghisgot bahin sa “mga adlaw ni Noe,” sa dihang “miabot ang baha ug gibanlas silang tanan.” Ang mga kahimtang nga naglungtad sa wala pa ang Lunop—sa hapit nang matapos kadtong kalibotana—gitandi niya ngadto sa kahimtang nga maglungtad sa panahon nga iyang gitawag ug “kataposan sa sistema sa mga butang.” (Mateo 24:3, 37-39) Ang ubang mga hubad sa Bibliya naggamit sa ekspresyong “kataposan sa kalibotan” o “kataposan sa kapanahonan.”—The Jerusalem Bible, The New English Bible, ug ang New International Version.

Gitagna ni Jesus kon unsay kahimtang dinhi sa yuta sa dihang hapit nang matapos ang kalibotan. Mahitungod sa gubat, siya miingon: “Ang nasod motindog batok sa nasod ug ang gingharian batok sa gingharian.” Ang mga historyano nag-ingon nga kini nahitabo sugod sa 1914. Busa, ang pasiuna sa librong gihisgotan sa ibabaw nag-ingon nga sa 1914 nagsugod ang “bug-os nga gubat, . . . dili kasundalohan batok kasundalohan kondili nasod batok nasod.”

Sa tagna ni Jesus, siya midugang: “Aduna unyay mga kanihit sa pagkaon ug mga linog sa nagkalainlaing mga dapit. Kining tanan maoy sinugdanan sa mga kaul-ol sa kasakit.” Siya miingon nga ang lain pang kahimtang nga maglungtad mao ang “pag-uswag sa kalapasan.” (Mateo 24:7-14) Dayag nga ato kining nakita nga nagakahitabo karon. Ang grabe kaayong pagkadaot sa moralidad karon nagtuman niining maong tagna sa Bibliya!

Sa unsang paagi kita angayng magkinabuhi sulod sa maong mahilayong panahon? Matikdi kon unsay gisulat ni apostol Pablo ngadto sa mga Kristohanon sa Roma bahin sa moral nga kahiwian. Siya naghisgot bahin sa “makauulawng seksuwal nga mga gana” sa mga tawo, nga nag-ingon: “Ang ilang mga babaye nag-usab sa ilang kinaiyanhong gamit ngadto nianang sukwahi sa kinaiyahan; ug sa ingon usab bisan ang mga lalaki mibiya sa kinaiyanhong paggamit sa babaye ug nanag-uros-uros sa ilang kaulag sa usag usa, mga lalaki sa mga lalaki, nga nagabuhat sa kon unsay malaw-ay.”—Roma 1:26, 27.

Ang mga historyano nag-ingon nga samtang ang mga tawo niadtong panahona naglunang na pag-ayo sa moral nga kahiwian, “ang pagkadiyosnon ug pagkaligdong sa mga Kristohanon nakatugaw sa mga pagano nga nabuang sa kalipayan.” Kini angayng magpalihok kanato sa paghunahuna ug sa pagpangutana: ‘Unsay ikasulti bahin kanako ug sa akong gipili nga mga kauban? Kita ba klaro kaayong lahi, nga hinlo sa moral, dili sama niadtong nagabuhat ug imoralidad?’—1 Pedro 4:3, 4.

Ang Atong Pagpakigbugno

Ang Bibliya nagtudlo kanato nga bisan pa sa imoralidad sa atong palibot, kita kinahanglang “walay-ikasaway ug inosente, mga anak sa Diyos nga walay lama taliwala sa baliko ug hiwi nga kaliwatan.” Aron atong mahimo kini, kita kinahanglang ‘mangupot nga hugot sa pulong sa kinabuhi.’ (Filipos 2:15, 16) Kining mga pulonga sa Bibliya makatabang sa mga Kristohanon kon sa unsang paagi sila makapabiling  hinlo sa moral—kinahanglan nilang tumanon ang mga pagtulon-an sa Pulong sa Diyos ug ilhon nga ang moral nga mga sukdanan niini mao ang labing maayong paagi sa pagkinabuhi.

“Ang diyos niini nga sistema sa mga butang,” si Satanas nga Yawa, naningkamot sa pagdani sa mga tawo sa pagdapig kaniya. (2 Corinto 4:4) Kita gisultihan sa Bibliya nga siya “kanunayng naghimo sa iyang kaugalingon nga usa ka manulonda sa kahayag.” Ug kadtong nag-alagad kaniya, milihok usab nga sama niya. (2 Corinto 11:14, 15) Sila nagsaad ug kagawasan ug kalipay, apan ang Bibliya nag-ingon, “sila mismo maoy mga ulipon sa pagkadunot.”—2 Pedro 2:19.

Makaseguro kita niini. Daotan gayod ang dangatan sa mga tawong dili manumbaling sa moral nga mga sukdanan sa Diyos. Ang salmista sa Bibliya misulat: “Halayo sa mga daotan ang kaluwasan, kay sila wala mangita sa . . . mga regulasyon [sa Diyos].” (Salmo 119:155; Proverbio 5:22, 23) Kombinsido ba kita niana? Kon kombinsido kita, atong panalipdan ang atong hunahuna ug kasingkasing batok sa mga propaganda nga nagduso sa mga panggawi nga matinugoton sa moral nga kahiwian.

Ugaling lang, daghan ang dili maalamong mangatarongan, ‘Kon dili supak sa balaod ang akong gibuhat, di wa ray kaso.’ Apan dili kana tinuod. Ang atong langitnong Amahan mahigugmaong naghatag ug moral nga giya, dili aron himoong makapuol ug mapig-oton ang imong kinabuhi, kondili aron panalipdan ka. Siya “nagtudlo kanimo aron ikaw makabaton ug kaayohan.” Buot niyang makalikay ka sa kaalaotan ug makatagamtam ug malipayong kinabuhi. Sa pagkatinuod, sumala pa sa gitudlo sa Bibliya, ang pag-alagad sa Diyos ‘naghupot ug saad sa kinabuhi karon ug sa umaabot.’ Kana ang “tinuod nga kinabuhi,” ang kinabuhing walay kataposan diha sa iyang gisaad nga bag-ong kalibotan!—Isaias 48:17, 18; 1 Timoteo 4:8; 6:19.

Busa itandi ang mga kaayohan sa pagpadapat sa mga pagtulon-an sa Bibliya ngadto sa kasakit nga maagoman sa ngadtongadto niadtong wala magpadapat niana. Ang pagbaton sa pag-uyon sa Diyos pinaagi sa pagpamati kaniya mao gayod ang labing maayong paagi sa pagkinabuhi! Ang Diyos nagsaad: “Kon bahin sa nagapatalinghog kanako, siya magapuyo sa kasegurohan ug dili matugaw sa kalisang sa katalagman.”—Proverbio 1:33.

Usa ka Katilingban nga Matul-id sa Moral

Ang Bibliya nag-ingon nga sa dihang mahanaw na kining kalibotana, “ang daotan mawala na.” Kini nag-ingon usab: “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana.” (Salmo 37:10, 11; Proverbio 2:20-22) Busa ang yuta pagahinloan sa tanang nagbuhat ug imoralidad, lakip na niadtong midumili sa pagkinabuhi subay sa maayong mga pagtulon-an sa atong Maglalalang. Ang usa ka yutan-ong paraiso nga susama niadtong gibutangan sa Diyos sa unang tawhanong magtiayon, anam-anam nga tikaron sa mga tawong mahigugmaon sa Diyos hangtod nga kini motugob sa tibuok yuta.—Genesis 2:7-9.

Hunahunaa lang ang kalipay sa pagpuyo sa maong nahinloang yuta nga ang katahom samag paraiso! Lakip niadtong makapahimulos sa pagkakita niana mao kadtong bilyonbilyong pamanhawon gikan sa mga patay. Kalipayi ang mga saad sa Diyos: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Salmo 37:29; Pinadayag 21:3, 4.

[Blurb sa panid 9]

Sa dihang natapos ang usa ka kalibotan, dihay mga mahinadlokon sa Diyos nga nakalabang-buhi

[Hulagway sa panid 10]

Sa dihang matapos kining kalibotana, ang yuta pagahimoong paraiso