Usa ka Harianong Bato

TINAMPO SA MAGSUSULAT SA PAGMATA! SA CANADA

SULOD sa daghang siglo, kini gigamit sa mga mananagat ug sa mga maglalawig ingong kasaligang timailhan. Kanunay kining gihimong ulohan sa mga magbabalak, mga magsusulat, ug mga pintor. Gibatbat sa usa ka ensiklopedia ang maong bato ingong “misteryoso ug madanihon kaayo.” Sa silangang tumoy sa Gaspé Peninsula sa Gulpo sa St. Lawrence, ang Percé Rock nagbuntaog sa tunga sa masidlak ug asul nga katubigan sa Dagat Atlantiko. Ang dakong bato adunay gitas-on nga mga 433 metros, gilapdon nga mga 90 metros, ug kahabogon nga kapin sa 88 metros.

Usa ka panahon niadto, katkaton sa isog nga mga molupyo didto ang pangpangong kilid sa bato aron kuhaon ang mga itlog gikan sa mga salag sa langgam. Ugaling, aron mapreserbar ug mapanalipdan ang bato ug mga langgam nga mopasilong didto, gideklarar sa gobyerno sa Quebec ang Percé Rock ug ang kasikbit nga Isla sa Bonaventure ingong mga dangpanan sa mga langgam. Ang Isla sa Bonaventure maoy dangpanan sa ikaduhang kinadak-ang pundok sa langgam nga gannet sa tibuok kalibotan panahon sa tingsanay.

Nag-ingon ang pipila nga ang Percé Rock kanhi sumpay sa dakong yuta ug lagmit may upat ka arko. Apan karon usa na lang kinig arko—ang gilapdon kapig 30 metros—sa tumoy sa bato patunong sa dagat. Sa paghunas, ang bato madugtong sa dakong-yuta agi sa tagaytay sa balas. Sa gintang nga mga upat ka oras, ang mga maisogon makabaktas abot gayod sa tiilan sa bato ug unya makapangapkap ubay niini nga masablig-sabligan ug tubig sa dagat sulod sa mga 15 minutos aron maabot ang arko.

Alang sa mga adbenturero, adunay pasidaan. Usa ka tumatan-aw nga nangapkap ibabaw sa tumpag nga mga tipak sa bato aron maabot ang arko diin makita na ang dagat miasoy: “Matag pipila ka gutlo makadungog kag makahahadlok nga dinaguok sa mga bato nga mosulod sa tubig samag gagmayng mga bomba. Matumpag ug magbanggaay ang pipila ka bato, nga samag mga buto sa pusil.”

Sumala sa namatikdan sa daghang bisita, ang katahom sa Percé Rock makapahingangha. Bisan pa niana, kini maoy usa lang sa daghang matahom nga mga talan-awon nga gitanyag sa atong makaiikag kaayong yuta. Nagkadaiya ug daghan kaayo kini sila! Sa dihang ikaw makakita niini nila, mahimong madasig ka usab sa ‘paghunong ug pagtagad sa katingalahang mga buhat sa Diyos.’—Job 37:14.

[Picture Credit Line sa panid 23]

© Mike Grandmaison Photography