Dili na Ulipon sa Alkoholikong Ilimnon

Ang kasarangang pag-inom ug alkoholikong ilimnon makapagana sa pagkaon o makapalipay sa usa ka selebrasyon. Apan, may mga tawo nga magkaproblema ug dako kon moinom ug alkoholikong ilimnon. Tagda ang mosunod nga sugilanon sa usa ka tawo nga nakalingkawas sa pagkahimong ulipon sa alkoholikong ilimnon.

BISAN hangtod karon sakitan gihapon ako dihang maghisgot sa gubot nga kahimtang kaniadto sa among panimalay. Si Papa ug Mama palainom. Dayon kulatahon ni Papa si Mama. Makatilaw ako pirme sa iyang mga kumo. Kuwatro anyos pa lang ako sa dihang midesisyon sila nga magbulag. Nahinumdom ako nga gikuha ako ug gipapuyo sa balay sa akong Lola.

Mibati ako nga walay nahigugma kanako. Sa siyete anyos pa ako, mohungoy ako sa silong sa balay aron moinom ug bino nga ginama sa balay, nga morag makaalibyo sa akong kaguol. Sa nag-edad ako ug 12, ako ang giawayan ni Mama ug Lola. Nasuko pag-ayo si Mama nga tungod niana iya akong gibuno ug rik. Maayo na lang kay nakaambak ako! Dili kini ang unang higayon nga nameligro ang akong kinabuhi. Apan, ang mga ulat sa akong lawas dili sama ka lalom sa emosyonal nga mga ulat sa akong kasingkasing.

Sa nag-edad ako ug 14, nagsige na ako ug inom. Sa kataposan, sa nag-edad ako 17 mikagiw ako. Ang pag-inom-inom nakahatag kanako ug pagbati nga may kagawasan, ug isog kaayo ako, mao nga magkagubot ang mga painitan sa among lugar. Ang pag-inom-inom ray makapalipay kanako. Sa usa lamang ka adlaw, makahurot ako ug kutob singko litros nga bino, pipila ka botelya sa serbisa, ug ubang isog nga mga ilimnon.

Sa nagminyo ako, ang akong pag-inom-inom problema kaayo sa akong asawa. Ang kasilag ug daotang buut misamot, ug kulatahon nako siya ug ang mga bata, nga nakapatungha ug samang daotang kahimtang sa panimalay nga akong gidak-an. Halos ang tanan nakong kinitaan akong ipalit ug alkoholikong ilimnon. Kami walay mga muwebles sa balay, busa ako ug ang akong asawa matulog sa salog. Wala akoy nakitang katarongan nga mabuhi pa ug wala usab maningkamot sa pagpauswag sa among kahimtang.

Usa ka adlaw niana, nakigsulti ako sa usa sa mga Saksi ni Jehova. Nangutana ako kon nganong daghan kaayo ang pag-antos, ug gipabasa kanako sa Saksi ang saad sa Diyos diha sa Bibliya bahin sa usa ka kalibotan nga walay mga problema. Kana nakapakombinsir kanako sa pagtuon sa Bibliya uban sa mga Saksi. Sa dihang gipadapat nako ang mga pagtulon-an sa Bibliya ug gimenosan ang akong pag-inom-inom, ang kinabuhi sa among pamilya miuswag ug dako. Bisan pa niana, naamgohan ko nga kon gusto gayod akong moalagad nga dalawaton kang Jehova nga Diyos, kinahanglang buntogon ko ang akong problema sa pag-inom. Human sa tulo ka bulan nga  pakigbisog, nalibre na ako sa pagkaulipon sa alkoholikong ilimnon. Paglabay sa unom ka bulan, gipahinungod nako ang akong kinabuhi ngadto sa Diyos ug gisimbolohan kini pinaagi sa pagpabawtismo.

Tungod sa akong paghunong sa pag-inom-inom, nakabayad ako sa akong mga utang. Sa ngadto-ngadto mipalit ako ug balay ug awto usab, nga among gigamit sa pagtambong sa Kristohanong mga tigom ug sa pagsangyaw sa balay ug balay. Sa kataposan, may pagtahod na ako sa akong kaugalingon.

Usahay diha sa mga salosalo, dalitan ako ug alkoholikong ilimnon. Daghan ang wala makahibalo sa akong grabe nga pakigbisog, ug usa lang ka pag-inom ang gikinahanglan aron maulipon na usab ako sa alkoholikong ilimnon. Hidlawon gihapon ako ug alkoholikong ilimnon. Nagkinahanglag tim-os nga pag-ampo ug determinasyon aron makagahom ako sa pagbalibad sa pag-inom. Kon uhawon ako, moinom ako ug bisan unsa nga dili makahubog kutob sa akong mahurot. Wala na gayod ako makainom ug alkoholikong ilimnon sulod na sa napulo ka tuig.

Si Jehova makahimo sa butang nga dili mahimo sa tawo. Siya nakatabang kanako sa pagkabaton ug kagawasan nga para nako daw imposibleng mabatonan! Gibati gihapon nako ang mga kasakit nga gibati nako sa bata pa ako, ug padayon akong nakigbisog batok sa negatibo nga panghunahuna. Sa positibong bahin, ako napanalanginan nga nakabaton ug maayong relasyon uban sa Diyos, usa ka kongregasyon sa matuod nga mga higala, ug usa ka maayong pamilya nga sama nako ug pagtuo. Bug-os kasingkasing nga gitabangan ako sa akong asawa ug mga anak sa akong pagpakigbisog batok sa pag-inom ug alkoholikong ilimnon. Ang akong asawa miingon: “Dili lalim ang akong kinabuhi kaniadto. Karon, mapasalamaton kaayo ako kang Jehova nga malipayon ang akong pamilya uban sa akong bana ug duha ka anak.”—Tinampo.

[Blurb sa panid 21]

Sa nag-edad ako ug 14, nagsige na ako ug inom

[Blurb sa panid 22]

Si Jehova makahimo sa butang nga dili mahimo sa tawo

[Kahon/Mga hulagway sa panid 22]

ANG BIBLIYA UG ANG ALKOHOLIKONG ILIMNON

◼ Wala idili sa Bibliya ang pag-inom ug alkoholikong ilimnon. Kini nag-ingon nga ang “bino makapalipay sa kasingkasing sa may-kamatayong tawo” ug gasa sa Diyos ngadto sa katawhan. (Salmo 104:14, 15) Ang Bibliya naghisgot usab sa bino ingong simbolo sa kauswagan ug kasegurohan. (Miqueas 4:4) Gani, ang unang milagro nga gihimo ni Jesu-Kristo mao ang paghimo sa tubig nga bino diha sa usa ka kombira sa kasal. (Juan 2:7-9) Ug sa nakadungog si apostol Pablo nga si Timoteo ‘subsob nga magkasakit,’ gisugyotan siya ni Pablo sa pag-inom ug “diyutayng bino.”—1 Timoteo 5:23.

◼ Ang gidili sa Bibliya mao ang sobrang pag-inom ug alkoholikong ilimnon:

“Ang mga palahubog . . . dili gayod makapanunod sa gingharian sa Diyos.”—1 Corinto 6:9-11, “The Jerusalem Bible.”

“Ayaw kamo pagkahubog sa bino, nga niini adunay unodnong pagpatuyang.”—Efeso 5:18.

“Kinsa man ang may kaalaotan? Kinsa man ang may kabalisa? Kinsa man ang may mga panagkabingkil? Kinsa man ang may kabalaka? Kinsa man ang may mga samad sa walay hinungdan? Kinsa man ang may lubog nga mga mata? Kadtong mga nagpabilin ug dugay uban sa bino, kadtong nanulod aron sa pagpangita sa sinagol nga bino. Ayaw tan-awa ang bino kon kini magapula, kon kini magapangidlap sulod sa kopa, kon kini magadagayday nga tanglas. Kay sa kataposan kini mamaak ingon sa usa ka halas, ug magabuga ug hilo ingon sa usa ka bitin. Ang imong mga mata makakita ug katingad-ang mga butang, ug ang imong kasingkasing mosulti ug hiwi nga mga butang.”—Proverbio 23:29-33.

Sama sa gipakita sa nagauban nga artikulo, ang uban nga dunay mga problema sa alkoholikong ilimnon maalamong nakapili sa paglikay niini sa bug-os.—Mateo 5:29.