Hamugaway nga mga Panahon Alang Kang Kinsa?

I-PLAY

Hamugaway nga mga Panahon Alang Kang Kinsa?

NAGKINABUHI kita sa usa ka adunahang kalibotan. Dili ka ba makatuo niana? Ang tinuod, ang ubang mga nasod dili makahurot ug gasto sa tanan nilang kuwarta tungod sa kadaghan niini. Gibanabana nga ang total nga bili sa mga produkto ug serbisyo sa tibuok kalibotan niadtong 2005 mikabat ug kapin sa $60 trilyones. Kon kining dako kaayong kantidad iapod-apod sa tanang molupyo sa yuta, halos $9,000 ang madawat sa matag tawo nga buhi karon. Ug nagkadako ang maong kantidad.

Apan bisan pa sa kaadunahan sa kalibotan, daghan gihapon ang kabos. Sumala pa sa basahon sa Hiniusang Kanasoran di pa dugay, ang bahandi sa tulo ka kinadatoang tawo sa kalibotan mas dako pa kay sa total nga kantidad sa mga produkto sa 48 ka kinapobrehang mga nasod. Ug ang UN Development Programme nag-ingon nga 2.5 bilyones ka tawo ang nanglimbasog nga mapaigo ang gamay kaayo nilang salapi sa matag adlaw aron lang mabuhi. Milyon-milyon ang kulang ug pagkaon ug walay hinlong tubig nga mainom.

Sa Tinipong Bansa, ang mga sosyologo nanukiduki bahin sa grupo sa mga tawong anaa na sa utlanan nga mapobre. Dako gayod ug purohan nga kining mga tawhana mag-ilaid sa kakabos. Ingon niini ang kahimtang sa kapin sa 50 milyones ka tawo bisan pag adunahan kaayo ang ilang nasod.

Ngano man nga bisag daghan kaayog kuwarta ang mga bangko ug mga tipiganag bahandi sa gobyerno, milyon-milyon gihapon ang nag-antos sa kakabos? Nganong daghan man ang wala kaayoy tsansa nga makapahimulos sa nagkadakong bahandi sa kalibotan?

[Blurb sa panid 3]

Ang tulo ka kinadatoang tawo sa kalibotan mas sapian pa kay sa tanang 48 ka kinapobrehang mga nasod

[Hulagway sa panid 2, 3]

Ang mga batang trabahante niining pabrika sa tisa mokita ug mga 50 cents ang adlaw

[Credit Line]

[Picture Credit Line sa panid 3]

PAGMATA!