Mga Batan-on Nangutana . . .

Siya ba ang Angay Nakong Minyoan?

Gahinig panahon ang pagtubag sa mosunod nga pasulit:

Unsang mga hiyasa ang imong ginapangita karon sa usa nga gusto nimong minyoan? Sa listahan sa ubos, butangig ✔ ang upat ka hiyas nga maoy labing hinungdanon para kanimo.

․․․․․ hitsuraan

․․․․․ dasig sa espirituwal

․․․․․ mahigalaon

․․․․․ kasaligan

․․․․․ inila

․․․․․ hinlo ug moral

․․․․․ siaw

․․․․․ may tumong sa kinabuhi

May naibgan ka ba niadtong batabata ka pa? Sa listahan sa ibabaw, butangig X ang kinaiya nga imo gayong nagustohan kaniya kaniadto.

WALAY daotan sa bisan haing kinaiya sa itaas. Ang matag usa nianang mga kinaiyaha maayo. Apan dili ka ba mouyon nga kon duna kay maibgan, ang kasagaran nimong makita mao ra ang panggawas nga mga kinaiya, sama nianang gilista sa wala nga bahin sa itaas?

Apan samtang magkahamtong ka, mosugod ka na pagtan-aw sa mas hinungdanong mga hiyas, sama nianang gilista sa tuo nga bahin sa itaas. Pananglitan, makaamgo ka nga ang guwapa kaayo ninyong silingan dili diay kasaligan o kaha ang inila kaayong ulitawo sa inyong klase daotan diayg moral. Kon ‘lapas ka na sa pagbuswak sa pagkabatan-on’—ang yugto sa kinabuhi diin unang motungha ang kusog kaayong seksuwal nga tinguha—lagmit ang imong tan-awon mao na ang mas hinungdanong mga hiyas aron matubag ang pangutana, Siya ba ang angay nakong minyoan?—1 Corinto 7:36.

Hinungdanon ba Kon Kinsay Akong Pilion?

Sa paglabay sa panahon, tingali daghan kag magustohan. Apan dili mahimo nga bisan kinsa ray imong pilion. Sa pagkatinuod, gusto kag kapikas nga imong makauban sa imong tibuok nga kinabuhi, usa nga motabang kanimo sa pag-ugmad sa imong mga katakos ug mga hiyas ug nga kaniya buot mo usab nga buhaton ang ingon. (Mateo 19:4-6) Kinsa kaha siya? Sa dili pa nimo tubagon ang maong pangutana, ‘panamin’ usa ug susiha pag-ayo ang imong kaugalingon.—Santiago 1:23-25.

 Aron mas mailhan nimo ang imong kaugalingon, tubaga ang mosunod nga mga pangutana:

Unsa may akong maayong mga hiyas?

․․․․․

Unsa may akong mga kahuyangan?

․․․․․

Unsa may akong panginahanglan sa emosyonal ug espirituwal?

․․․․․

Dili sayon ang pag-ila sa imong kaugalingon, apan kining mga pangutanaha makatabang kanimo nga mas makaila ka sa imong kaugalingon. a Kon mas nakaila ka sa imong kaugalingon mas makaarang ka sa pagpili sa tawo nga makatabang kanimo sa pag-ugmad sa imong maayong mga hiyas, usa nga dili magpasamot sa imong mga kahuyangan. Apan komosta man kon sa imong hunahuna nakakita ka nag tawo nga angay nimong minyoan?

Molampos Kaha ang Among Relasyon?

Sa pagtubag nianang pangutanaha, susihag maayo ang tawo nga imong nagustohan. Apan pagbantay! Basin ang imo rang tan-awon mao ang imong gustong makita. Busa ayaw pagdalidali. Ilha gayod ang iyang tinuod nga pagkatawo.

Daghang managtrato wala magtagad sa mas hinungdanong mga butang. Hinunoa, ang gilantaw nila mao ra ang mga butang diin magkasinabot sila: ‘Parehas mig gusto nga musika.’ ‘Ang gusto nakong buhaton gusto pod niya.’ ‘Magkasinabot gyod mi sa tanang butang!’ Apan sumala sa nahisgotan na, kon tinuod nga lapas ka na sa pagbuswak sa pagkabatan-on, dili kay kini ra ang imong tagdon. Kinahanglang tan-awon nimo ang “natago nga pagkatawo sa kasingkasing.”—1 Pedro 3:4; Efeso 3:16.

Pananglitan, inay isentro ang imong pagtagad sa mga butang nga inyong gikauyonan, hayan mas mailhan nimo siya kon imo siyang obserbahan sa dihang kamo dili magkasinabtanay. Sa ato pa, unsay iyang reaksiyon kon maglalis kamo—iya bang  iinsistir ang iyang gusto, nga tingali ‘mosinta sa kasuko’ o mogamit ug “mapasipalahong sinultihan”? (Galacia 5:19, 20; Colosas 3:8) O siya ba makataronganon—andam magpaubos kon wala ray malapas nga prinsipyo aron masulbad ang problema?—Santiago 3:17.

Laing butang nga tagdon: Siya ba adunay kiling sa pagkontrolar kanimo o siya ba abughoan? Sukit-sukiton ka ba niya sa tanan nimong kalihokan? “Ang pagkaigihan ug pagkaabughoan dili maayong timailhan,” nag-ingon ang usa ka batan-ong babaye nga ginganlag Nicole. “Nakadungog kog mga managtrato nga naglalis tungod kay nasuko ang usa nga wala siya teleponohi sa iyang trato aron magpahibalo kon asa siya—sa akong hunahuna, ilhanan kana nga dunay problema.”

Unsay panglantaw sa uban sa imong trato? Maayo nga makigsulti ka sa mga tawo nga dugay-dugay nang nakaila kaniya, sama sa hamtong nga mga igsoon sa iyang kongregasyon. Pinaagi niini imong mahibaloan kon “may maayong panghimatuod kaniya.”—Buhat 16:1, 2. b

Angay ba Kamong Magbulag?

Komosta man kon imong maamgohan nga ang imong trato dili diay mahimong maayong kapikas sa umaabot? Nan, maalamon gayod nga ikaw makigbulag. Ang Bibliya nag-ingon: “Maalamon ang tawo nga nakakita sa katalagman ug nagtago sa iyang kaugalingon.”—Proverbio 22:3. c

Sa ngadtongadto basin makakita ka na usab ug laing trato. Walay duhaduha nga nianang higayona mas timbang na ang imong panglantaw, nga imong nabatonan tungod sa imong kasinatian. Nianang panahona, ang pangutana nga “Siya ba ang angay nakong minyoan?” tingali matubag na nimo ug oo!

Ang dugang nga mga artikulo gikan sa seryeng “Mga Batan-on Nangutana . . .” makita diha sa Web site nga www.watchtower.org/ype

[Mga footnote]

MGA BUTANG NGA ANGAYNG PALANDONGON

◼ Unsang mga hiyas ang imong nabatonan nga maghimo kanimong maayong bana o asawa sa umaabot?

◼ Unsang mga hiyasa ang imong gipangita sa usa ka kapikas?

◼ Sa unsang mga paagi mas mailhan pa nimo ang kinaiya, panggawi, ug reputasyon sa imong trato?

[Kahon sa panid 19]

Mahimo kaha siya nga maayong bana?

BUTANG NGA ANGAYNG TAGDON

▪ Giunsa niya paggamit ang awtoridad nga iyang nabatonan?—Mateo 20:25, 26.

▪ Unsay iyang mga tumong?—1 Timoteo 4:15.

▪ Milihok na ba siya aron makab-ot ang maong mga tumong?—1 Corinto 9:26, 27.

▪ Kinsay iyang mga higala?—Proverbio 13:20.

▪ Unsay iyang tinamdan bahin sa kuwarta?

—Hebreohanon 13:5, 6.

▪ Unsang matanga sa kalingawan ang iyang gusto?—Salmo 97:10.

▪ Unsay gipaila sa iyang pagpamesti?—2 Corinto 6:3.

▪ Sa unsang paagi gipasundayag niya ang iyang gugma kang Jehova?—1 Juan 5:3.

KINAIYA

▪ Kugihan ba siya?—Proverbio 6:9-11.

▪ Responsable ba siya sa pinansiyal?—Lucas 14:28.

▪ Maayo ba siyag dungog?—Buhat 16:1, 2.

▪ Gitahod ba niya ang iyang mga ginikanan?—Exodo 20:12.

▪ Mahunahunaon ba siya sa uban?—Filipos 2:4.

MGA ILHANAN SA PROBLEMA

▪ Dali ba siyang masuko?—Proverbio 22:24.

▪ Misulay ba siya sa pag-agni kanimo sa paghimog imoral nga buhat?—Galacia 5:19.

▪ Manapat ba siya o sakit manulti?—Efeso 4:31.

▪ Moinom ba siya ug alkoholikong ilimnon aron malingaw?—Proverbio 20:1.

▪ Abughoan ba siya ug kaugalingon ray gihunahuna?—1 Corinto 13:4, 5.

[Kahon sa panid 20]

Mahimo kaha siya nga maayong asawa?

BUTANG NGA ANGAYNG TAGDON

▪ Sa unsang paagi nagpasakop siya sa pamilya ug kongregasyon?—Efeso 5:21, 22.

▪ Unsay gipaila sa iyang pagpamesti?—1 Pedro 3:3, 4.

▪ Kinsay iyang mga higala?—Proverbio 13:20.

▪ Unsay iyang tinamdan maylabot sa kuwarta?—1 Juan 2:15-17.

▪ Unsay iyang mga tumong?—1 Timoteo 4:15.

▪ Milihok na ba siya aron makab-ot ang maong mga tumong?—1 Corinto 9:26, 27.

▪ Unsang matanga sa kalingawan ang iyang gusto?—Salmo 97:10.

▪ Sa unsang paagi gipasundayag niya ang iyang gugma kang Jehova?—1 Juan 5:3.

KINAIYA

▪ Kugihan ba siya?

—Proverbio 31:17, 19, 21, 22, 27.

▪ Maayo ba siyang mogunit ug kuwarta?—Proverbio 31:16, 18.

▪ Maayo ba siyag dungog?—Ruth 4:11.

▪ Gitahod ba niya ang iyang mga ginikanan?—Exodo 20:12.

▪ Mahunahunaon ba siya sa uban?—Proverbio 31:20.

MGA ILHANAN SA PROBLEMA

▪ Siya ba palaaway?—Proverbio 21:19.

▪ Misulay ba siya sa pag-agni kanimo sa paghimog imoral nga buhat?—Galacia 5:19.

▪ Siya ba sakit manulti o manapat?—Efeso 4:31.

▪ Moinom ba siya ug alkoholikong ilimnon aron malingaw?—Proverbio 20:1.

▪ Abughoan ba siya ug kaugalingon ray gihunahuna?—1 Corinto 13:4, 5.