Unsay Paglaom sa mga Kabos?

DILI sayop nga mangamas sa pagpanginabuhi, basta eksakto ang suweldo. Matikdi ang giingon sa usa ka magsusulat sa Bibliya: “Nasayran ko nga walay mas maayo . . . kay sa pagmaya . . . ug usab nga ang matag tawo mokaon ug moinom ug magpahimulos ug maayo sa tanan niyang kahago. Kini ang gasa sa Diyos.”—Ecclesiastes 3:12, 13.

Apan sumala sa ato nang nasayran, ang sistema sa ekonomiya niining kalibotana nag-obligar sa mga tawo sa pagtrabahog bug-at apan mohatag lang kanila ug gamayng suweldo. Daghan gihapon ang pobre, nga nangamas intawon sa adlaw-adlaw aron mabuhi. Halos wala silay ganang ‘magmaya’ ug “magpahimulos ug maayo” tungod sa kalisod sa ilang kinabuhi. Dato na kaayo ang kalibotan, apan lagmit katunga sa tanang tawo walay tsansa nga makapahimulos nianang tanang bahandi.

Ang Diyos Mahingawaon sa mga Kabos

Ang Maglalalang sa tawo, si Jehova nga Diyos, wala malipay niining kahimtanga. Si Jehova naluoy sa mga kabos. Atong mabasa sa Bibliya: “[Ang Diyos] dili gayod malimot sa pagtuaw sa mga sinakit.” (Salmo 9:12) Si Jehova maoy usa ka Diyos nga mahingawaon sa mga kabos.

Mahitungod kang Jehova, ang Bibliya nag-ingon: “Kanimo modangop ang alaot, ang batang ilo-sa-amahan. Ikaw nahimong iyang magtatabang.” (Salmo 10:14) Matikdi nga gilantaw sa maong teksto sa Bibliya ang mga tawong nag-antos ingong mga indibiduwal. a Oo, ang Diyos may kahingawa sa matag usa ug nagtagad sa ilang tagsa-tagsa ka panginahanglan. Alang kaniya ang matag usa bililhon ug takos sa iyang pagtagad. Gidapit ni Jehova ang tanang tawo, dato ug pobre, sa pagkat-on gikan kaniya ug mahimong iyang mga higala.

Usa ka butang nga makat-onan sa mga tawo gikan sa Diyos mao ang pagpakitag kaluoy ug empatiya sa uban. Ang mga Saksi ni Jehova nag-isip sa ilang grupo ingong usa ka dakong espirituwal nga pamilya. Sila nagpabili sa usag usa ingong mga indibiduwal—ang tinuod nga Kristohanong gugma dagaya nga ginapasundayag sa ilang taliwala. Si Ginoong Jesu-Kristo misulti kaniadto sa iyang mga sumusunod: “Kamong tanan mga igsoon.” (Mateo 23:8) Busa, ang tanan nga makigbahin sa matuod nga pagsimba mahimong bahin sa usa ka panagsoonay nga dili mapihigon sa dato o pobre. Sila  may kahingawa sa usag usa ug nagdinasigay sa usag usa sa malisod nga mga panahon.

Ang Bibliya naundan ug mga prinsipyo nga makapahuwas ug diyutay sa daotang mga epekto sa kakabos. Gipakita diha sa Kasulatan nga gisaway sa Diyos ang paghugaw-hugaw sa lawas, sama sa pagpanabako ug paghubog-hubog. (Proverbio 20:1; 2 Corinto 7:1) Ang tawo nga nagsunod nianang mga prinsipyoha makadaginot ug kuwarta nga igasto unta alang sa daotang mga bisyo. Iyang malikayan ang mga sakit nga resulta sa pagpanabako ug paghubog-hubog ug ang gastos sa pagpatambal. Ang Bibliya nagtudlo usab sa mga tawo sa pagsalikway sa materyalistikong panghunahuna ug kadalo. (Marcos 4:19; Efeso 5:3) Pinaagi sa pagpadapat niana nga tambag sa Pulong sa Diyos, malikayan usab sa tawo ang pagwaldas-waldas sa iyang kuwarta sa sugal.

Ang Bibliya dunay praktikal nga mga prinsipyo alang sa matag adlaw nga pagkinabuhi, bisan sa panahon sa grabeng kalisod. Matikdi kining mosunod nga kasinatian:

Sa usa ka nasod diin daghan ang walay trabaho, gipameligro sa usa ka trabahante sa pabrika ang iyang trabaho tungod sa iyang pagpananghid sa pagpalta sa pagtrabaho aron makatambong sa Kristohanong mga tigom. Mahimo na unta siyang papahawaon sa iyang superbisor sa trabaho. Apan, siya ug ang ubang mga empleyado nakurat sa dihang gitugotan siya sa superbisor sa pagpalta. Ang superbisor miingon nga dili niya gustong mohunong siya sa pagtrabaho diha sa iyang pabrika ug gidayeg siya ingong “usa ka sulondang trabahante.” Ngano man?

Ang trabahante, nga usa ka Saksi ni Jehova, nagpadapat sa mga prinsipyo sa Bibliya. Kay gusto man niyang “magmaminatud-on sa tanang butang,” siya dili mamakak o mangawat ug busa siya nailhan nga matinud-anon. (Hebreohanon 13:18) Agig pagtuman sa inspiradong prinsipyo diha sa Colosas 3:22, 23, siya nagtrabaho nga ‘tibuok-kalag.’ Sa ato pa, siya masinundanon sa iyang amo ug tininuod nga nagtrabaho matag adlaw.

Tinuod, nagkinabuhi kita ilalom sa usa ka sistema sa ekonomiya diin nagpatigbabaw ang kadalo ug ganansiya ray gipalabi. Ang uban nga nagpadapat sa mga prinsipyo sa Bibliya mahimong naglugos gihapon sa pagpangitag pagkaon, besti, ug  puy-anan nga ilang gikinahanglan. Apan sila dunay hinlo nga tanlag atubangan sa ilang Maglalalang ug masaligong nagpaabot sa maayong panahon sa unahan nga ipahinabo ni Jehova, “ang Diyos nga nagahatag ug paglaom.”—Roma 15:13.

Permanenteng Solusyon sa Kakabos

Gipadayag diha sa Bibliya ang dakong kasuko ni Jehova batok sa mga tawong nagsuportar sa pagdaogdaog sa mga kabos. Ang inspiradong Pulong sa Diyos nag-ingon: “Alaot kadtong nagahimo ug madaotong mga regulasyon ug kadtong kinsa, sa kanunayng pagsulat, nagsulat ug lunlon nga kasamok, aron isalikway ang mga timawa gikan sa legal nga kaso ug sa pag-agaw sa hustisya gikan sa mga sinakit . . . , aron ang mga babayeng balo mahimong ilang inagaw sa gubat, ug aron ilang agawan bisan ang mga bata nga ilo-sa-amahan!” (Isaias 10:1, 2) Tinuyo man o dili ang ilang kawalay pagtagad sa mga kabos, ang mga tawong nagkontrolar sa palakat sa ekonomiya niining katilingban karon maoy bahin sa malupigong sistema nga pagapulihan sa Labing Gamhanan nga Diyos.

Ang manalagna nga si Isaias dunay makapahinuklog nga pangutana sa maong mga tigdaogdaog: “Unsay inyong buhaton sa adlaw sa pagtagad ug sa paggun-ob, sa dihang kini moabot gikan sa halayo?” (Isaias 10:3) Si Jehova magalaglag kanila ug sa dili-makataronganong sistema nga ilang gipatunhay.

Apan, ang katuyoan sa Diyos dili maoy paglaglag lang sa mga tigdaogdaog. Wad-on usab niya ang inhustisya diha sa kinabuhi sa mga matarong ug kasingkasing. Pinaagi sa usa ka superyor nga matang sa kagamhanan, iyang hatagan ang tanang tawo ug makapatagbaw, malipayong kinabuhi diin wala nay kakabos. Aron magmauswagon nianang panahona, ikaw dili na kinahanglan ug dakong panulondon nga salapi, impluwensiyadong mga kaila, o maayong abilidad sa negosyo. Sa unsang paagi kita makaseguro nga mahitabo gayod kining maong mga kausaban?

Si Jesu-Kristo, ang tinudlo ni Jehova nga magmamando sa katawhan, naghisgot nianang maanindot nga palaaboton ingong panahon sa “paglalang-pag-usab.” (Mateo 19:28) Kining pulonga nagpasabot ug pagbag-o ug pagsugod pag-usab sa tawhanong kinabuhi. Pinaagi sa paggamit sa pulong nga “paglalang-pag-usab,” gipasiugda ni Jesus ang paghatag ni Jehova ug kahigayonan sa  matarong nga mga tawo nga magkinabuhi sumala sa kabubut-on sa atong mahigugmaong Maglalalang. Usa sa daghang kaayohan nga iyang ihatag sa katawhan nianang panahona mao ang bug-os nga pagkawagtang sa kalisod sa panalapi nga giantos sa daghan kaayong tawo.

Ang Bibliya matagnaong nagpahayag bahin sa pagmando ni Jesu-Kristo: “Pagaluwason niya ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang. Maluoy siya sa timawa ug sa kabos, ug pagaluwason niya ang mga kalag sa mga kabos. Gikan sa pagpanglupig ug sa kapintasan tubson niya ang ilang kalag, ug ang ilang dugo mahimong bililhon sa iyang mga mata.”—Salmo 72:12-14.

Kining maanindot nga palaaboton bukas alang kanimo. Apan aron imong makab-ot ang mga sukdanan sa Diyos alang niadtong makabaton ug kinabuhi sa bag-ong kalibotan, ikaw kinahanglang magtuon una bahin sa kabubut-on sa matuod nga Diyos ug dayon magpadapat niana. Paghimog maalamong mga desisyon pinasukad sa imong kahibalo nga mabatonan gikan sa Pulong sa Diyos. Hunahunaa kanunay ang maanindot nga kaugmaon nga ginatanyag sa Diyos alang sa tanang katawhan. Dili ka gayod mahigawad. Ang Pulong sa Diyos nagsaad: “Ang kabos dili kanunay nga hikalimtan, ni mahanaw gayod ang paglaom sa mga maaghop.”—Salmo 9:18.

[Footnote]

[Blurb sa panid 9]

Ang usa ka maanindot nga palaaboton bukas alang kanimo

[Kahon/Hulagway sa panid 10]

Angay ba Akong Mobalhin sa Dapit Diin Mas Maarang-arang ang Kahimtang?

Ang Pulong sa Diyos wala magdiktar sa mga tawo kon asa sila angayng magpuyo ug magtrabaho. Apan, ang mga prinsipyo sa Bibliya makatabang sa usa ka tawo sa pagtino kon maayo bang mobalhin sa laing nasod tungod sa kalisod sa panginabuhi. Matikdi ang mosunod nga mga pangutana ug ang Kasulatanhong mga prinsipyo nga mapadapat.

1. Natental ba akong moadto sa laing nasod tungod sa way-pasikaranang mga estorya nga akong nadungog? Ang Proverbio 14:15 nag-ingon: “Si bisan kinsa nga walay kasinatian motuo sa tagsatagsa ka pulong, apan ang usa nga maalamon magapalandong sa iyang mga lakang.” Human makabalhin ngadto sa usa ka adunahang nasod, usa ka lalaki nga taga-Sidlakang Uropa miingon: “Dali ka lang kuno nga makasapi dinhi kay ang kuwarta morag mga dahon nga manubo lang sa mga kahoy. Hangtod karon, nangita pa ko kon asa kanang mga kahoya.”

2. Timbang ba ang akong panglantaw sa mga panginahanglan sa akong pamilya? Gikinahanglan ba gayod namo ang mga butang nga gusto namong paliton? Tulubagon sa mga ulo sa pamilya ang pagtagana sa materyal nga mga panginahanglan sa ilang asawa ug mga anak. (1 Timoteo 5:8) Apan ang mga amahan may tulubagon usab sa Diyos sa pag-edukar sa ilang mga anak sa moral ug espirituwal nga paagi. (Deuteronomio 6:6, 7; Efeso 6:4) Ang usa ka amahan makatagana tingali ug mas daghang materyal nga mga butang kon mobalhin siya sa laing dapit. Apan dili siya makatagana sa iyang mga anak ug moral ug espirituwal nga pagbansay kon dili niya sila makauban sa daghang semana, bulan, o mga tuig.

3. Naamgohan ko ba nga kon dugay kaming dili magkita sa akong asawa, mameligro kaming makasala ug pagpanapaw? Ang Pulong sa Diyos nagpasidaan sa mga magtiayon sa paghatag ug pagtagad sa seksuwal nga mga panginahanglan sa usag usa.—1 Corinto 7:5.

4. Naamgohan ko ba nga mahimo akong makadawat ug bug-at nga silot gikan sa awtoridad kon mosulod ako sa usa ka nasod sa ilegal nga paagi? Ang matuod nga mga Kristohanon obligado sa pagsunod sa balaod sa nasod.—Roma 13:1-7.

[Mga hulagway sa panid 8, 9]

Ang mga prinsipyo sa Bibliya praktikal, dato man kita o pobre

[Picture Credit Line sa panid 7]

Top: © Trygve Bolstad/Panos Pictures