Kon Nganong Gibiyaan Ko ang Sirkos

Sumala sa giasoy ni Marcelo Neím

NATAWO ko sa Montevideo, Uruguay. Bisan pag ang akong mga ginikanan mahinadlokon sa Diyos, wala sila masakop sa bisan unsang relihiyon. Ang akong inahan namatay sa usa ka aksidente sa dihang ako mga kuwatro anyos, ug ako gipadako sa mga paryente nga naningkamot sa pagsilsil kanakog maayong mga prinsipyo. Sa dihang 20 anyos na ko, midesisyon ko sa pagbiyahe aron akong masinati ang nagkalainlaing nasod ug kultura.

Didto ko sa Colombia nagsugod pagtrabaho sa sirkos ingong katabang. Akong napanid-an ang malipayong dagway sa mga sirkador sa dihang gipakpakan sila sa mga tawo, ug gusto kong magsirkador. Busa gipraktis ko ang usa ka pasundayag nga nagsakayg bisikleta, nga sa inanay gigamit ko ang mas nagkagamayng bisikleta hangtod makapasundayag na ko nga migamit sa bisikletang ang gidak-on maoy kuwatro ka pulgada ug tres-kuwarto—usa sa kinagamyan sa kalibotan. Mabutang kadto sa akong palad. Nagkapopular na ko sa dakong bahin sa Amerika del Sur. Sa nag-edad kog 25 anyos, ako nakaabot sa Mexico ug nagtrabaho sa ubay-ubayng sirkos.

Bug-os Nausab ang Akong Kinabuhi

Nagustohan ko ang kinabuhi sa sirkos. Naglakip kadto sa sigeng biyahe, pagpuyo sa nindot kaayong mga hotel, ug sa pagkaon sa mahalong mga restawran. Apan sa samang higayon, mibati kog kahaw-ang sa akong kinabuhi, ug wala koy paglaom sa umaabot. Usa niana ka hapon, nausab ang akong kinabuhi. Ang tig-anunsiyo sa pasundayag sa sirkos mihatag kanakog usa ka librong iyang nadawat, nga nag-ulohang Pinadayag—Hingpit nga Sangkoanan Niini Haduol Na! a Pagkahuman sa pasundayag akong gibasa kadto hangtod sa kaadlawon. Bisag wala ko hisabti pag-ayo kadtong libroha, nahingangha ko sa katin-awan bahin sa pula nga mapintas nga mananap ug sa bigaon diha sa Pinadayag. (Pinadayag 17:3–18:8) Unya, samtang naghinlo ko sa puy-anang treyler nga akong napalit, nakakita kog laing libro sa samang mga magpapatik, ang Ikaw Mabuhing Walay Kataposan sa Paraiso sa Yuta.* Mas sayon kadtong sabton, ug naamgohan ko dayon nga kinahanglang mosangyaw ko. Busa gisugdan ko dayon ang paghisgot sa akong nakat-onan uban sa tanang tawo nga akong nahibalag.

Pag-aginod sa panahon, gibati ko nga kinahanglang mokontak ko sa mga Saksi ni Jehova. Ang numero sa telepono sa dalagitang Saksi nga nagbilin sa libro sa akong higala nasulat diha sa librong Pinadayag.  Busa mitelepono ko, ug gidapit ako sa iyang amahan sa pagtambong sa usa ka kombensiyon sa mga Saksi ni Jehova sa Tijuana, Mexico. Ako nakadayeg sa gugma nga gipakita didto ug nakombinsir nga kini ang matuod nga relihiyon. Bisan diin moadto ang sirkos, ako motambong sa lokal nga Kingdom Hall ug mokuhag literatura aron ipanagtag sa di-pormal nga paagi.

May nahitabo nga dugang nagkombinsir kanako nga ako nagsubay sa hustong dalan. Gidapit ko sa mga Saksi sa pagtambong sa Memoryal sa kamatayon ni Kristo ug ilang gipatin-aw nga ang mga Kristohanon kinahanglang motambong niana. Apan kadto ang unang gabii sa pasundayag sa sirkos, ug naghunahuna ko nga imposible ang pagtambong. Hugot ko kadtong giampo kang Jehova, ug ang katingad-anang butang nahitabo. Duha ka oras una sa pasundayag, ang suga napalong! Busa, ako nakatambong sa Memoryal ug human niadto mibalik alang sa pasundayag. Alang kanako, si Jehova mitubag sa akong pag-ampo.

Usa niana ka higayon, nanagtag kog mga tract samtang naglinya diha sa usa ka bangko. Nakit-an ko sa usa ka Kristohanong ansiyano ug iyang gidayeg ang akong kadasig. Iya kong gidasig sa pagsangyaw sa organisadong paagi, ubos sa pagdumala sa usa ka kongregasyon. Mahigugmaon niyang gipatin-aw nga kinahanglang mohimo kog mga kausaban sa akong kinabuhi sa paghimo niana. Sa panahong ako namalandong bahin sa maong mga kausaban, ako gitanyagan ug dakog-suweldong trabaho sa usa ka sirkos sa Tinipong Bansa. Nabahin ang akong kasingkasing. Gusto kong moadto sa Tinipong Bansa, apan kon ako kadtong dawaton, ambot ba kon unsay mahitabo sa dalan nga gisugdan ko pagsubay. Kadto ang una kong pagsulay, ug dili ko gustong pakyason si Jehova. Bisan pag ang akong kaubang mga sirkador wala makatuo, akong gibiyaan ang sirkos, nakig-uban sa usa ka kongregasyon, gipaputol ang taas kong buhok, ug gihimo ang ubang kausaban sa akong pagkinabuhi aron makaalagad kang Jehova.

Makapatagbaw nga Kinabuhi nga Walay mga Pagbasol

Niadtong 1997 sa dayon na kong mabawtismohan ingong Saksi ni Jehova, ako may ikaduhang pagsulay, nga mao ang laing higayon sa pag-adto sa Tinipong Bansa, nga niadtong higayona aron magpasundayag alang sa usa ka popular nga programa sa telebisyon didto sa Miami ug libre ang tanan kong gastos. Apan gusto ko nang magpabawtismo ug tumanon ang akong pagpahinungod kang Jehova niadtong panahona. Busa gibalibaran ko ang maong tanyag, sa dakong katingala sa hawas sa programa sa telebisyon.

Nangutana ang pipila ka tawo kon nagbasol ba ko sa akong pagbiya sa kinabuhi sa sirkos. Ang akong tubag mao nga ang pagpakighigala ug ang gugma ni Jehova dili gayod nako ibugti sa akong kinabuhi kaniadto. Bisan pag ang akong bag-ong karera ingong bug-os-panahong Kristohanong ministro dili mohatag kanakog pagdayeg, kabantogan, o bahandi niining kalibotana, wala ko na batia ang kahaw-ang. Nahupngan ko sa bililhong paglaom sa pagkinabuhi sa paraisong yuta ug sa pag-abiabi pag-usab sa akong inahan sa panahon sa pagkabanhaw.—Juan 5:28, 29.

[Footnote]