Ang Hunahuna sa Bibliya

Igo na ba ang “Pagkabuotan”?

“NAGBINUOTAN gayod ako,” miingon ang batan-ong dalaga nga ginganlag Allison. Sama kaniya, daghan ang nagtuo nga igo na sa Diyos ang pagkabuotan.

Ang uban nagtuo nga bisan kon makahimo sila ug dakong sala, pasayloon ra gihapon sila sa Diyos basta nagminatarong sila. Nagtuo sila nga ang Diyos mas mopasaylo kay sa mosilot.

Siyempre ang “pagkabuotan” lainlain ug kahulogan sa matag tawo. Apan unsay giingon sa Bibliya? Unsay atong kinahanglang himoon aron kahimut-an sa Diyos? Unsay ipasabot sa pagkabuotan sa panan-aw sa Diyos?

Pagdawat sa Giya sa Atong Maglalalang

Sanglit Maglalalang man nato si Jehova nga Diyos, siya gayod ang angayng mohatag kanato ug giya sa pamatasan. (Pinadayag 4:11) Diha sa Bibliya, ang Diyos naghatag ug mga balaod ug mga prinsipyo nga mogiya sa atong paggawi ug pagsimba. Gisugo sa Diyos ang iyang katawhan, nga nag-ingon: “Tumana ninyo ang akong tingog, ug buhata ninyo ang mga butang sumala sa tanan nga akong gisugo kaninyo; ug kamo mahimong akong katawhan ug ako mahimong inyong Diyos.”—Jeremias 11:4.

Busa aron ‘mahimong buotan’ sa panan-aw sa Diyos, kinahanglang mahibalo kita kon unsa ang iyang mga sukdanan ug dayon magkinabuhi nga nahiuyon niini. Pananglitan, kon gusto kang mahimong higala sa usa ka tawo, sayron usa nimo kon unsay iyang gusto o dili gusto, dayon molihok ka sa paagi nga makapahimuot kaniya. Ang Bibliya nagpakita nga kita mahimong higala ni Jehova—sa ato pa, higala nga makapahimuot kaniya sama sa patriarka nga si Abraham. (Santiago 2:23) Dugang pa, kay mas taas man ug sukdanan ang Diyos kay sa atong sukdanan, dili ang Diyos ang angayng magpasibo sa atong mga sukdanan.—Isaias 55:8, 9.

Pagkamasinugtanon Hinungdanon Kaayo

Dili ba gayod kita kahimut-an sa Diyos kon dili kita motuman sa “gagmay” nga mga sugo? Ang uban tingali nagtuo nga ang pagtuman sa pipila ka “gagmay” nga mga sugo dili hinungdanon. Apan ang tanang balaod sa Diyos hinungdanon. Matikdi nga diha sa 1 Juan 5:3, ang Bibliya wala maghisgot nga dunay dili hinungdanong sugo sa dihang kini nag-ingon: “Kini ang kahulogan sa paghigugma sa Diyos, nga atong bantayan ang iyang mga sugo.” Kon ato gayong tumanon ang tanang balaod sa Diyos, atong gipasundayag ang atong dakong gugma kaniya.—Mateo 22:37.

Si Jehova nahibalo nga kita dili hingpit. Kon kita tinuod nga nagbasol sa atong mga sala ug maningkamot nga mohunong na sa pagpakasala, siya andam nga mopasaylo kanato. (Salmo 103:12-14; Buhat 3:19) Apan mahimuot ba ang Diyos kon lapason nato ang pipila ka balaod, sa pagtuo nga pasayloon ra kita tungod kay nagmasinugtanon kita sa ubang mga sugo? May pananglitan sa Bibliya nga nagpakita nga dili gayod kana puwede.

Si Haring Saul sa Israel namili ug sugo sa Diyos nga iyang sundon. Sa dihang nakiggubat sa mga Amalekanhon, siya gisugo nga dili niya iyawaton ang ilang inalimahang mga hayop. Siya gimandoan sa ‘pagpatay niini.’ Bisan tuod gisunod niya  ang ubang sugo, wala patya ni Saul ang “kinamaayohan sa mga karnero ug sa mga baka.” Kay ngano? Tungod kay gusto kining panag-iyahon ni Saul ug sa iyang tanang ginsakpan.—1 Samuel 15:2-9.

Sa dihang gipangutana ni manalagnang Samuel si Saul kon nganong wala niya tumana ang sugo sa Diyos, si Saul mireklamo ug nangatarongan nga siya nagtuman sa sugo. Iyang gitagsa-tagsa ug hisgot ang maayong mga butang nga nahimo niya ug sa katawhan, lakip na ang mga halad nga ilang gitanyag sa Diyos. Si Samuel nangutana: “May dako bang kalipay si Jehova sa mga halad-nga-sinunog ug sa mga halad sama sa pagsunod sa tingog ni Jehova? Tan-awa! Ang pagsunod mas maayo pa kay sa halad, ang pagpamati kay sa tambok sa mga laking karnero.” (1 Samuel 15:17-22) Busa ang atong paglapas sa pipila ka sugo sa Diyos dili nato mabayran pinaagig mga paghalad o paghimog ubang matarong nga mga buhat.

Ang mga Sukdanan sa Diyos—Maoy Pamatuod sa Iyang Gugma

Si Jehova mahigugmaong naghatag kanato ug mga giya aron dili kita managhap kon unsaon siya pag-alagad nga makapalipay kaniya. Diha sa Bibliya siya naghatag ug klarong giya sa pamatasan, nga nag-ingon: “Mao kini ang dalan. Lakaw kamo niini.” (Isaias 30:21) Kon ang iyang giya maoy atong sundon, dili kita malibog ug magpaling-paling sa nagkasumpaking mga ideya sa mga tawo bahin sa pamatasan. Ug kita makasalig nga ang paggiya sa Diyos maoy alang sa atong kaayohan.—Isaias 48:17, 18.

Nganong peligro ang pagbuot-buot ug pili ug atong kaugalingong sukdanan sa pamatasan? Kitang tanan nakapanunod sa kinaiya nga hakogan. Kita mahimong malimbongan sa atong kasingkasing mismo. (Jeremias 17:9) Basin isalikway nato ang mga sugo nga gihatag sa Diyos nga sa atong hunahuna lisod sundon o mapig-oton ra.

Pananglitan, ang dili kasado nga paris tingali nagdulog, sa pagtuo nga ila na kining personal nga desisyon kay wala may laing tawong nalangkit. Lagmit sila nahibalo nga ang ilang gibuhat supak sa Bibliya apan sila tingali moingon nga basta “walay masakit,” dili ra masuko ang Diyos. Ang ilang kailibgon makapabuta kanila sa bug-os nga kahulogan ug sa mga epekto sa ilang mga buhat. Ang Bibliya nagpasidaan: “Adunay dalan nga matul-id atubangan sa usa ka tawo, apan ang kataposan niana mao ang mga dalan sa kamatayon.”—Proverbio 14:12.

Ang tanang balaod ni Jehova nagpabanaag sa iyang gugma sa tawo ug sa iyang tinguha nga kita dili mag-antos. Ang mga tawo nga naglapas sa mga sukdanan sa Diyos bahin sa seksuwal nga moralidad o ubang panggawi dili malipayon ug dili malamposon sa kinabuhi. Hinunoa, nagubot lang hinuon ang ilang kinabuhi. Sa laing bahin, ang pagsunod sa balaod sa Diyos makatabang kanato sa paglakaw sa dalan sa pagkamatarong, ug sa ingon dili kita makahatag ug kadaot sa atong kaugalingon ug sa uban.—Salmo 19:7-11.

Kon sinsero ka sa imong tinguha nga mahimong matarong sa panan-aw sa Diyos, nan sunda gayod ang iyang paggiya. Ug imong masinati mismo nga ‘ang mga sugo ni Jehova dili mabug-at.’—1 Juan 5:3.

NAKAPAMALANDONG KA BA?

◼ Nganong angay natong dawaton ang paggiya sa atong Maglalalang?—Pinadayag 4:11.

◼ Kinahanglan ba gayod natong tumanon ang tanang sugo sa Diyos?—1 Juan 5:3.

◼ Nganong dili maayo nga kitay magbuot-buot ug pili sa atong kaugalingong mga sukdanan sa pamatasan?—Proverbio 14:12; Jeremias 17:9.

[Hulagway sa panid 21]

Ang imo bang panglantaw bahin sa moralidad sama nianang sa Diyos?