Ingon ba Gayod Niana Katas-a ang Ilang mga Edad?
Ingon ba Gayod Niana Katas-a ang Ilang mga Edad?
Sumala sa Bibliya, si Adan nabuhi ug 930 ka tuig, si Set 912 ka tuig, ug si Matusalem nabuhi ug 969 ka tuig—31 ka tuig na lang ang kulang, usa ka libo na! (Genesis 5:5, 8, 27) Kadto bang mga tuiga samag gitas-on sa atong mga tuig karon, o mas mugbo kini, nga tingali sama rag gitas-on sa mga bulan karon, matod pa sa uban?
Gipakita diha sa Bibliya nga kadtong mga tuiga sama rag gitas-on sa atong tuig. Hunahunaa: Kon ang usa ka tuig kaniadto sama pag gitas-on sa atong bulan, kining mga tawhana bata pa kaayo nga nangahimong amahan: si Kenan wala pay sayis anyos, ug si Mahalalel ug Enoc mga singko anyos lang.—Genesis 5:12, 15, 21.
Dugang pa, ang mga tawo kaniadto dunay giisip nga mga adlaw, mga bulan, ug mga tuig. (Genesis 1:14-16; 8:13) Gani, ang sunod-sunod nga pag-asoy ni Noe sa mga hitabo makatabang kanato sa pagtino sa gitas-on sa usa ka bulan. Ang pagtandi sa Genesis 7:11, 24 ug Genesis 8:3, 4 nagpakita nga ang lima ka bulan—gikan sa ika-17ng adlaw sa ikaduhang bulan ngadto sa ika-17ng adlaw sa ikapitong bulan—mokabat ug 150 ka adlaw. Nan, klaro nga ang pag-ihap ni Noe sa usa ka bulan maoy 30 ka adlaw, busa ang 12 ka bulan mototal ug usa ka tuig.—Genesis 8:5-13. a
Unsa mang kalakiha nga makaabot man ug 900 ka tuig o kapin pa ang edad sa tawo kaniadto? Ang Bibliya nag-ingon nga gilalang sa Diyos ang tawo aron mabuhi sa walay kataposan ug nga ang sala ni Adan miresulta ug pagkadili-hingpit ug kamatayon sa tawo. (Genesis 2:17; 3:17-19; Roma 5:12) Kadtong nabuhi sa wala pa ang Lunop mas duol pa kaayo sa kahingpitan kay kanato karon, mao nga tag-as silag mga edad. Pananglitan, pito lang ka kaliwatan ang diperensiya ni Matusalem gikan kang Adan.—Lucas 3:37, 38.
Apan, sa dili madugay wagtangon ni Jehova nga Diyos ang tanang lama sa sala ni Adan gikan niadtong tanan nga nagpasundayag ug pagtuo sa giula nga dugo sa iyang anak, si Jesu-Kristo. “Ang suhol nga ginabayad sa sala mao ang kamatayon, apan ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.” (Roma 6:23) Oo, hapit nang moabot ang panahon nga ang edad ni Matusalem nga 969 mubo na lang para kanato!
[Footnote]
a Tan-awa ang Insight on the Scriptures, Tomo 2, panid 1214, nga gipatik sa mga Saksi ni Jehova.
[Graph sa panid 30]
(Alang sa aktuwal nga pagkahan-ay, tan-awa ang publikasyon)
1000
Matusalem
Adan
Set
900
800
700
600
500
400
300
200
100
Ang ordinaryong tawo karon