“Jehova, Palihog Paalagara Ko Nimo”

Sumala sa giasoy ni Danielle Hall

Sa bata pa ko, ganahan kaayo ko nga moadto ila Lola nga silingan ra namo. Motagpilaw siya kada hapon. Kon ako siyang maatlan nga naghigda,mobangon siya ug manglingkod kami sa katre ug basahan niya akog mga estorya sa Bibliya. Pirme niya akong sultihan, “Ayaw gayod kalimot nga gimahal ka ni Jehova. Ug kon imo siyang higugmaon, iya ka gayod nga amomahon.” Ang iyang gisulti mitidlom gayod sa akong hunahuna ug kasingkasing.

SI Lola namatay niadtong 1977, sa kuwatro anyos pa ako. Siya ug ang tanang paryente ni Papa sa among lungsod sa Moe, sa Australia, mga Saksi ni Jehova. Ang akong mga ginikanan dili Saksi, apan si Papa dili supak nila. Sa ulahi ang among pamilya mibalhin sa Tintenbar, usa ka gamayng lungsod sa New South Wales nga duol sa dagat. Ako ug ang akong magulang nga lalaki nga si Jamie motambong usahay sa mga tigom sa mga Saksi uban ni Papa.

Sa otso anyos ako, nagbulag ang akong mga ginikanan. Mibalik si Papa sa Moe, samtang ako ug si Jamie mipuyo uban kang Mama. Si Mama dili interesado sa Bibliya ug dili siya gusto nga motambong kami sa mga tigom sa mga Saksi. Naguol kaayo ko niini. Akong nahinumdoman ang giingon ni Lola nga mitisok sa akong kasingkasing. Gihigugma ko gayod si Jehova! Ug gusto ko nga moalagad  kaniya. Busa nag-ampo ako kang Jehova ug miingon kaniya nga Saksi sab ko. Mao sab nay gibati ni Jamie.

Mga Pagsulay Diha sa Tunghaan

Wala madugay human niana, gipasulti sa among maestro ang tagsa-tagsa ka bata kon unsay ilang relihiyon aron masulat diha sa iyahang rekord. Sa dihang si Jamie na ang gitawag, siya kusog nga miingon, “Saksi ni Jehova ko.” Napugwat ang maestro ug iyang gipaotro ug sulti si Jamie. Dayon ang maestro miingon, “Dili man ka Saksi. Mag-estorya ra ta unya.” Sa ako nang turno, misulti sab ko sa makusog, “Saksi ni Jehova ko.” Napikal na ang maestro mao nga iya kining gisumbong sa prinsipal.

“Dinhi sa listahan, dili Saksi ni Jehova ang gisulat sa inyong ginikanan nga maoy inyong relihiyon,” matod pa sa prinsipal. “Pero mao nay among relihiyon,” matinahoron kaming mitubag. Sukad niadto wala na sila mangutana pag-usab.

Akong gipaambit sa akong mga klasmet ang akong gamayng nahibaloan sa Bibliya. Nagdala ako ug librong Akong Basahon sa mga Estorya sa Bibliya ug akong basahan usahay ang usa ka batang babaye nga nagtuo ug Diyos. a Kay nagkinabuhi man ako ingong Kristohanon, dili gayod ako popular sa eskuylahan, ug may panahon nga magmingaw kaayo ko.

Kinasingkasing ako nga nag-ampo kanunay kang Jehova, mao nga nahimo nako siya nga kinasuorang higala. Kada adlaw inig-uli gikan sa eskuylahan, molingkod ko sa akong katre ug akong idetalye pag-estorya kang Jehova ang tanang panghitabo nianang adlawa. Pirme kong maghilak. Gadagayday ang mga luha, ako mangaliyupo, “Jehova, palihog paalagara ko nimo uban sa imong katawhan.” Motawhay gayod ang akong panimati dihang makaampo na ako.

Makapadasig nga Sulat

Sa diyes anyos ako, si Jamie mibalik sa Moe ug miipon ug puyo kang Papa. Nag-inusara na lang ako sa espirituwal. Dayon, sa miadto ko sa balay sa among silingan, nakakita kog mga magasin nga gipatik sa mga Saksi ni Jehova. Nalipay kaayo ko nga nagsaulo sa adres sa sangang buhatan sa Australia ug dayon midalidalig pauli aron isulat kini. Misulat ako sa sangang buhatan nga nagpatin-aw sa akong kahimtang ug nangayog espirituwal nga tabang. Nakahilak gayod ako sa ilang makapatandog, taas nga sulat nga gisulat para lang gayod kanako. Pamatuod kini nga gimahal ako ni Jehova!

Gidasig ako sa maong sulat sa pagsundog sa batang babaye nga Israelinhon kinsa nahimong alagad ni Naaman, ang pangulo sa Siryanhong kasundalohan niadtong panahon sa Bibliya. Bisag binihag ug layo sa iyang yutang natawhan, siya suod sa iyang Diyos nga si Jehova. Ug pinaagi sa iyang maisogong pagpahayag bahin sa iyang pagtuo, iyang gipakita nga siya tinuod nga Saksi ni Jehova.—2 Hari 5:1-4.

Ang sulat gikan sa sangang buhatan nagkanayon: “Kay bata ka pa man, angay kang mag-alagad kang Jehova pinaagi sa pagpasakop sa imong ginikanan ug sa pagkugi sa pagtuon sa eskuylahan. Unya, pakigsuod kang Jehova pinaagi sa pag-ampo ug pagtuon.” Diha sa kataposan sa sulat kini ang giingon: “Hinumdomi, Danielle, bisag asa pa kita magpuyo, si Jehova nagauban gayod kanato. Nahibalo kami nga nagtuo ka gayod niini.” (Roma 8:35-39) Kini nga sulat, nga karaan ug gision na, naa kanunay sa akong Bibliya.  Daghang beses na nako kining nabasa ug ako makahilak gayod matag higayon nga ako kining basahon.

Wala madugay human niana, nakadawat akog laing sulat. Kini nag-ingon nga gihatagan ako sa akong amahan ug suskrisyon sa mga magasing Bantayanang Torre ug Pagmata! Nalipay kaayo ko! Duna na koy regular nga suplay sa espirituwal nga pagkaon. Inig-abot sa matag isyu sa magasin, ako kining hutdon pagbasa. Hangtod karon ania gihapon kanako ang unang mga kopya niining makaikag nga mga magasin. Niining higayona ginabisitahan na ako sa usa ka ansiyano sa duol nga kongregasyon. Nadasig kaayo ako sa iyang mga pagduaw, bisag dili siya magdugay.

Mga Kausaban nga Nakapauswag Kanako sa Espirituwal

Bisan pag miarang-arang ang akong espirituwalidad, nangandoy gihapon ako nga makaalagad kang Jehova sa bug-os. Busa, sa nag-edad ako ug 13, akong gihangyo si Mama nga kang Papa na ako mopuyo. Gimahal ko pag-ayo si Mama, ug pinangga sab ko niya, apan gusto ko gayod nga makaalagad sa Diyos. Sa misugot siya, mibalik ako sa Moe ug nagsugod sa pagtuon sa Bibliya uban sa kongregasyon didto. Kami ni Jamie gipatambong usab ni Papa sa tanang tigom. Wala gayod kami pasagdi sa mga Saksi didto. Ako ug si Jamie kusog nga miuswag sa espirituwal ug ligas lang ug bulan ang among pagbawtismo. Oo, ang akong pag-ampo sa bata pa natubag gayod. Nag-alagad na ako kang Jehova uban sa iyang katawhan!

Sa kasamtangan, nasuod ako sa akong uyoan ug iyaan, si Philip ug Lorraine Taylor, nga sakop usab sa Kongregasyon sa Moe. Ila akong giisip nga ilang anak. Sa mibalhin sila sa isla sa Bougainville, sa Papua New Guinea, sa pag-alagad diin mas dako ang panginahanglan ug mga magwawali sa Gingharian, ila akong gidapit ug mahinangpon nga gidawat ko kini. Kinse anyos lang ako niadtong higayona, apan misugot si Papa ug Mama nga mouban ko nila.

Sa didto na sa Bougainville, akong gipadayon ang akong pag-eskuyla pinaagig sulat. Kon dili ko magtuon, akong igugol ang akong libreng panahon sa pagsangyaw. Makapalipay kaayo ang pag-alagad uban sa mga misyonaryo ug mga payunir! Wala pa ako makahimamat sukad ug mga tawo nga sama ka mapaubsanon sa mga tawo didto, ug daghan kanila interesado kaayo sa pagtuon sa Bibliya.

Sa ulahing bahin nianang tuiga dihay nahitabong kagubot sa politika, ug peligroso kaayo kon magpabilin pa ako didto. Ang akong kasingkasing morag gikumot sa dihang mibiya ako sa buotang mga molupyo niining gamayng isla. Sa milupad na ang ayroplano, nakita nako si Tiyo Philip nga nagtindog nga nagbabay nako. Naghilak ako nga nangaliyupo sa hilom kang Jehova nga unta iya akong paalagaron ingong misyonarya sa laing nasod.

Natubag ang Ubang mga Pag-ampo

Sa Australia, nagtrabaho ako sa bupiti ingong aprentis sa nakatapos ako sa hayskul. Sa kasamtangan, nagminyo pag-usab si Papa ug dako kaayong pamilya ang iyang giatiman. Si Jamie nagpuyo uban ni Mama. Dihay panahon nga nagtapon-tapon ako ug puyo kang Papa ug Mama. Lisod ang akong kahimtang. Kinahanglang ipasimple nako ang akong kinabuhi aron akong kahatagan ug dakong pagtagad ang akong espirituwal nga mga tumong. Busa sa 1994 nagsugod ako sa pagpayunir sa Moe.

Malipayon na usab ako. Ang akong batan-ong mga higala sa kongregasyon mahunahunaon sa espirituwal, ug dako silag natabang kanako. Gani, niadtong 1996, naminyo ako sa usa kanila—si Will—usa ka brader nga malumong mosulti, buotan, ug mapaubsanon. Siya usa gayod ka panalangin gikan kang Jehova.

Malipayon kaayo kami sa among kaminyoon. Usa ka adlaw niana, si Will mipauli sa balay human mag-alagad uban sa nagapanawng magtatan-aw nga nagduaw sa mga kongregasyon sa among dapit. Iya akong gipalingkod ug dayon gipangutana, “Mosugot ka ba nga mobalhin ta sa pagtabang sa laing kongregasyon?” Miambak ang akong kasingkasing sa kalipay. Apan, nagpasiaw ko nga nangutana: “Asa man? Sa Vanuatu? Sa Fiji?” Sa dihang mitubag si Will nga sa Morwell, ako miingon, “Naa ra man na sa duol!” Nangatawa mi ug mahinangpon kaayo ming mibalhin sa silingang kongregasyon sa pag-alagad ingong mga payunir.

Ang among unang tulo ka tuig sa Morwell tugob sa kalipay ug mabungahon. Dayon dihay lain na pod nga sorpresa. Gidapit kami sa sangang buhatan sa mga Saksi ni Jehova sa Australia sa pag-alagad ingong mga espesyal payunir. Ang among teritoryo? Sa East Timor, usa ka gamayng nasod sa sidlakang suok sa kapuloan sa Indonesia. Milugmaw gayod ang akong mga luha. Akong gipasalamatan si Jehova nga iyang gitubag  ang akong tanang pag-ampo. Doble ang akong nadawat nga panalangin kay dili lang nahimo ako nga iyang alagad kondili ako ug ang akong bana makaalagad pa gyod sa laing nasod.

Nag-alagad sa Laing Nasod

Sa Hulyo 2003 miabot kami sa Dili nga mao ang kaulohan sa nasod. Usa lang ang kongregasyon sa tibuok nasod, ang Kongregasyon sa Dili, nga dunay 13 ka espesyal payunir gikan sa Australia ug pipila ka Saksi nga taga-didto. Pobre kaayo ang mga igsoon sa Timor; kadaghanan nawad-ag mga butang ug namatyan ug mga membro sa pamilya tungod sa 24 ka tuig nga giyera sibil nga natapos sa 1999. Daghan usab ang gilutos pag-ayo sa ilang pamilya tungod sa ilang bag-ong relihiyon. Apan, bisan pa sa ilang kalisod ug kakabos sila adunahan sa espirituwal ug malipayon.—Pinadayag 2:8, 9.

Among nakita nga ang kadaghanan sa mga taga-Timor diyosnon ug matuohon sa Bibliya. Gani, dili na namo maato pagdumala ug pagtuon sa Bibliya ang mga interesado! Sa ngadto-ngadto, ang pipila sa among unang mga gidumalahan ug pagtuon nabawtismohan ug nag-alagad uban kanamo. Nalipay kaayo kami sa ilang espirituwal nga pag-uswag.

Dayon, sa 2006, nagkagubot na usab sa Dili. Ang mga panag-away sa mga tribo miresulta ug gubat. Daghang balay ang gipanglungkab ug gipangsunog, ug ang mga igsoon midangop sa mga balay sa mga espesyal payunir. Ang among balay ug tugkaran nahimong temporaryong puy-anan sa mga igsoon nga namakwet, ug dihay higayon nga miabot ug halos usa ka gatos ka tawo ang mipuyo uban kanamo! Ang among dakong garahe nahimong kosina, komedor, ug temporaryong Kingdom Hall.

Bisan pa sa pagrinakrakay ug pagbuto-buto sa granada diha sa among duol, ang balay alang sa mga payunir nga among gipuy-an nahimong malinawong dangpanan. Among nasinati nga gipanalipdan gayod kami ni Jehova. Sugdan namo ang matag adlaw ug panaghisgot ug teksto sa Bibliya. Nagpadayon gihapon kami sa pagtigom. Nagdumala usab kami ug mga panagtuon sa Bibliya sa mga interesado.

Sa milabay ang daghang semana, among nakita nga peligrosong magpabilin pa sa Dili ang mga igsoon nga natawo sa sidlakan sa nasod. Busa ang mga brader nga nagapanguna nag-organisar ug bag-ong grupo sa Baucau, ang ikaduha sa kinadak-ang siyudad, nga biyaheon ug tulo ka oras pasidlakan gikan sa Dili. Ug kami ni Will didto giasayn.

Miabot kami sa Baucau sa Hulyo 2006, halos eksaktong tulo ka tuig sukad sa among pag-abot sa East Timor. Ang sakop sa among bag-ong grupo maoy upat ka espesyal payunir ug unom ka Saksi nga taga-Timor. Bisan pag gibiyaan niining unom ka igsoon ang tanan nilang butang sa Dili, dagko lang gihapon silag pahiyom. Nakadayeg gayod kami sa ilang pagkamaunongon ug sa ilang pagsakripisyo sa kaugalingon!

Nag-alagad gihapon kami ni Will sa Baucau. Gimahal gayod namo ang among asaynment ug giisip namo kini ingong dugang nga panalangin gikan kang Jehova. Kon akong hinumdoman ang nangagi, makaingon gayod ako nga husto si Lola. Wala gayod ako pasagdi ni Jehova. Nagpasalamat gayod ako kaniya nga nakapribilehiyo ako sa pag-alagad kaniya uban sa iyang katawhan. Mahinamon usab ako nga makita pag-usab si Lola diha sa pagkabanhaw. Ug nianang tungora mapasalamatan ko siya sa paghatag kanako ug yawi nga nagbukas sa pultahan sa usa ka malipayon ug magantihon kaayong kinabuhi.

[Footnote]

[Hulagway sa panid 26]

Ako ug si Lola

[Hulagway sa panid 28, 29]

Ako ug ang akong bana, si Will