Ang Akong Gugma sa Musika, sa Kinabuhi, ug sa Bibliya

Sumala sa giasoy ni Boris N. Gulashevsky

Handurawa ang usa ka tawong buta nga mga 60 anyos na ug duha ka beses na nga giatake sa kasingkasing. Nanglugmaw ang iyang mga luha nga nagpasalamat sa Diyos sa paghatag kaniya ug higayon sa pagkaila Kaniya. Mao kanay nahitabo kanako 11 ka tuig kanhi.

NATAWO ako niadtong 1930 sa baryo sa Tsibulev, sa distrito sa Cherkassy, sa Ukraine. Sa 1937, panahon sa pagpanglupig ni Stalin, ang akong amahan gidakop ug gihukman ingong “kaaway sa nasod.” Giilog ang among apartment, ug gilikayan kami sa kadaghanan sa among kaila. Wala madugay, daghan kanila gipangdakop usab. Niadtong panahona ang mga tawo walay pagsalig, mabudhion, ug mahadlokon.

Ang akong manghod nga babaye, si Lena, natawo duha ka bulan human gidakop ang akong amahan. Niana nga tingtugnaw, si Mama, si Lena, ang akong magulang nga lalaki nga si Nikolai, ug ako nagpuyo sa usa ka gamayng lawak nga walay bentana ug pugon. Human niana, namalhin kami sa balay sa akong Lolo. Kami ni Nikolai maoy tig-akatar sa balay, tigbughag kahoy, ug tig-ayoayo sa mga guba. Ganahan kong mohimog mga sapatos ug mamanday. Gusto usab akog musika, busa naghimo ko ug balalaika (instrumento sa musika) gikan sa piraso nga playwod ug nakakat-on ako sa pagtugtog ug sista ug mandolin.

Nabunyagan ako ingong Katoliko. Apan kay wala man ako makasabot sa mga doktrina ug kostumbre sa simbahan, ang pagkawalay Diyos nga maoy gituohan sa mga ateyista morag mas makataronganon para nako. Human sa Gubat sa Kalibotan II, nakig-anib ako sa Komsomol (Komunistang organisasyon sa mga batan-on), ug dihay mga higayon nga ako ug ang ubang mga membro nakiglantugi batok niadtong motuo ug Diyos sa pagpamatuod nga walay Diyos.

 Sa Dihang Nabuta Ako

Human giatake sa Alemanya ang Unyon Sobyet niadtong 1941, daghang beses silang naggubatay diha sa among baryo panahon sa ikaduhang gubat sa kalibotan. Sa Marso 16, 1944, nasamdan ako sa pagbinombahay ug nabuta ako. Tungod niana ako nagmagul-anon, nawad-ag paglaom, ug nag-antos sa gibating sakit.

Sa dihang ang panaggubat didto na sa kasadpan ug nangatras na ang mga Aleman, nakasuroy-suroy na ako diha sa hardin ug namati sa awit sa kalanggaman. Kay naluoy si Mama nako, iya akong hatagan ug isog nga ilimnon, ug dapiton ako sa mga tawo sa among lugar sa pagtugtog ug musika sa ilang mga salosalo. Nanigarilyo ako ug akong gilumsan sa alkoholikong ilimnon ang akong kaguol. Ngadto-ngadto nakaamgo ako nga dili kini makasulbad sa akong problema.

Ang akong iyaan nga maestra nakabalita bahin sa mga eskuylahan para sa mga buta ug iyang gikombinsir si Mama sa pagpaeskuyla kanako. Sa 1946, nag-eskuyla ako nianang lugar nga gitawag na karon ug Kam’yanets’-Podil’s’kyy, diin nagkugi ako sa pagtuon. Nakakat-on ako sa pagbasa ug Braille ug sa pagmakenilya niini. Gipadayon usab nako ang akong pagtuon sa pagtugtog ug mga instrumento sa musika, nga naggugol ug daghang oras aron mahanas sa pagtugtog ug concertina. Nakita sa luyoluyo sa prinsipal nga interesado ako sa pagtugtog busa gipahulam niya kanako ang iyang akordyon. Nakakat-on usab ako sa pagtugtog ug piano.

Nagtukod Ako ug Akong Kaugalingong Balay

Sa 1948, akong giminyoan ang usa sa mga maestra sa maong eskuylahan, kinsa nakatabang kanako sa akong pagtuon. Ang iyang bana namatay panahon sa gubat ug may duha siya ka anak nga babaye. Sa nakagraduwar ako, mibalhin akog puyo sa iyang balay. Naningkamot gayod ako nga mahimong maayong bana ug amahan, nga nanginabuhi pinaagi sa pagtugtog ug musika. Dayon, sa 1952, natawo ang among anak nga lalaki.

Naghikay ako sa pagtukod ug balay alang sa among pamilya, nga nanuhol ug mga tawo sa pag-ugbok sa pundasyon ug sa pagtaod sa bungbong, apan akoy nagtrabaho sa ubang bahin sa balay. Pinaagi sa paghilam-hilam ug sa paghanduraw, nahimo nako ang trabaho. Akong hilam-hilamon ang usa ka pirasong kahoy, ug akong handurawon ang porma niini. Human niana ako kining himoong mga gamit. Ang puthaw nga mga himan akong orderon sa pabrika. Maggama akog tisa nga pugon, muwebles, ug mohimog uban pang trabaho.

Orkestra sa mga Plawta

Nabansay akog dugang sa pagtugtog ug mga instrumento sa musika ug nahimong propesyonal nga musikero. Human mahanas sa pagtugtog ug lainlaing mga instrumento sa musika, ako nagtuon sa pagtugtog ug plawta. Dihay higayon nga akong giayo ang usa ka gamayng plawta nga kawayan. Sa ngadto-ngadto, nakakat-on ako sa paggama ug akong kaugalingong mga plawta. Niadtong panahona, ang mga eksperto wala magdahom nga posible diayng makahimog plawta nga baho ug tingog, kay ang dagko god nga plawta hinay man kaayog tingog. Maoy hinungdan kon nganong walay orkestra nga pulos lang plawta.

 Apan, nakagama ako ug plawta nga dunay linain nga pangpalanog sa tingog. Kini nagpasabot nga posibleng makagama ug mga plawta nga baho ang tunog apan dili hinay ang tingog. Sa ngadto-ngadto, nagsugod ako sa paggama ug lainlaing gidak-on sa mga plawta nga mopagawas ug lainlaing nota nga kon idungan pagtugtog, nindot kaayong pamation.

Una pa niana, nag-organisar ako ug mga orkestra nga nagtugtog ug ordinaryong mga instrumento sa musika. Ang usa sa akong mga orkestra pulos buta ang mga musikero. Dayon sa 1960, nag-organisar ako ug orkestra nga lunlon plawta ang gitugtog​—way sama niining matanga sa orkestra sa tibuok Sobyet Unyon ug tingali sa tibuok kalibotan.

Mga Nakat-onan ug mga Pagduhaduha

Sa 1960, diha akoy gipaayo nga mga instrumento sa musika sa usa ka eksperto nga nakig-estorya kanako bahin sa relihiyon. Siyempre, nakigdebate ako kaniya ug nangatarongan nga walay Diyos. Dayon siya miingon nga maayong mamati lang una ko samtang iyang basahon ang Bibliya. Kay wala pa man ako makabasa niini sukad, naminaw ko.

Natandog gayod ako sa asoy bahin sa pagpaningkamot ni Jacob sa pagtagana sa panginahanglan sa iyang pamilya. Nakahilak ako nga namati sa asoy bahin kang Jose nga gibaligya sa iyang mga igsoon, sa iyang mga pagsulay, ug sa pagpasaylo niya sa iyang mga igsoon sa ulahi. (Genesis, mga kapitulo 37, 39-45) Ang Bulawanong Lagda nakapaikag kaayo kanako kay nagtudlo kini kanato sa pagtratar sa uban sa paagi nga gusto nato nga ilang itratar kanato. (Mateo 7:12) Niining paagiha ako nakabaton ug kahibalo sa Bibliya ug nakakat-on sa paghigugma niini.

Nagsugod ako sa pagtambong sa mga tigom sa Baptist uban sa akong higala ug gihatagan ako ug “Bag-ong Testamento” nga Braille ug giganid ko kini pagbasa. Apan, akong namatikdan nga nagkasumpaki ang gisulti niini ug ang mga doktrina sa Baptist. Pananglitan, gipakita diha sa Bibliya nga lahi ang Diyos ug lahi si Jesus ug nga ang Diyos labaw kang Jesus. (Mateo 3:16, 17; Juan 14:28; Buhat 2:32) Apan, ang mga Baptist nag-ingon nga ang Diyos ug si Jesus managsama, nga sila bahin sa Trinidad. Daghang higayon ko nang nabasa ang akong “Bag-ong Testamento,” nga giusa-usa paghilam ang matag pulong, ug nakaseguro gayod ako nga kining doktrinaha wala sa Bibliya.

Ang pulong “impiyerno” makita diha sa hubad sa Bibliya nga among gigamit. Akong gisulayan paghanduraw ang impiyerno nga gitudlo sa Baptist​—usa ka nagkalayo nga dapit diin ang daotan sakiton sa walay kataposan. Gilainan ako niini! Ang Bibliya nag-ingon nga ang Diyos gugma, ug dili gayod ako makatuo nga mohimo siya ug dapit nga sama niini. (1 Juan 4:8) Paglabay sa panahon, misamot ang akong pagduhaduha bahin sa impiyerno ug sa uban pang mga doktrina sa Baptist.

Dagkong mga Kausaban

Pagka-1968, ang akong mga humabdos nga babaye minyo na ug may mga anak na. Nianang panahona, ako ug ang akong asawa dili na maayog relasyon. Dihang mamalandong ako niadtong panahona, nagmahay ako nga wala kaayo kami magpakitag gugma ug pailob sa usag usa. Nagdiborsiyo kami, ug ako naminyo pag-usab duha ka beses apan natapos ra gihapon kini sa diborsiyo.

Sa 1981, mihawa ako sa Kam’yanets’-Podil’s’kyy, diin didto ako nagpuyo sulod sa 35 ka tuig, ug mibalhin ako sa Yoshkar-Ola, mga 600 kilometros sidlakan sa Moscow. Didto nagpadayon ako sa paghimog mga plawta. Usa sa akong mga orkestra dunay 45 ka membro nga nagtugtog ug lainlaing klase sa mga plawta. Lainlain ang gidak-on niini nga mga plawta, gikan sa tagning ug tingog nga plawta nga otso pulgadas ang gitas-on ug mga tunga sa pulgada ang diametro ngadto sa double-bass nga plawta nga kapin sa tres metros ang gitas-on ug otso pulgadas ang diametro. Ang among mga konsiyerto gisibya diha sa radyo ug telebisyon, ug nagpasundayag kami sa lainlaing bahin sa nasod.

Niadtong 1986, sa bangga sa musika sa tibuok Unyon Sobyet, nakadawat ako ug medalya ug sertipiko agig pasidungog tungod sa akong pag-ugmad ug teknik sa pagtugtog ug plawta. Paglabay sa pipila ka tuig dihay gipasalida nga dokumentaryong pelikula nga nag-ulohang Solo for Pipe, or the Fairy Tale of a Musician. Ang mantalaang Mariiskaya Pravda nag-report: “Si Boris Nikolaievich Gulashevsky, nga maoy gihisgotan niini nga pelikula, nakadawat ug sertipiko agig pasidungog ingong amahan sa orkestra sa plawta nga walay sama niini nga makita sa tibuok Rusya.”

Nangita sa Kamatuoran

Sa dihang mibalhin ako sa Yoshkar-Ola, nagpamembro ako sa librarya aron makagamit ug mga basahon para sa mga buta. Daghan akog nabasa  bahin sa mga doktrina sa mga Katoliko, Pentekostal, ug Metodista. Misimba usab ako sa Ortodoksong Simbahan. Sa akong katingala, akong nakita nga parehas ra sila ug gitudlo sa Baptist, nga ako nang nahibaloan nga dili binase sa Bibliya.

Ang Ortodoksong pari nga si Alexander Men misulat nga ang Diyos dunay personal nga ngalan​—Yahweh. Siya miingon usab nga kaniadto ang mga Hudiyo putli ug pagsimba, nga sa ulahi nahugawan sa paganong mga doktrina ug idolatriya. Natandog kaayo ako sa iyang mga sinulat ug napalig-on ang akong tinguha sa pagpangita sa kamatuoran.

Mas Determinado Pa

Sa usa sa akong mga orkestra, dihay manunugtog nga ginganlag Liza, nga halos buta usab. Naminyo kami sa 1990, ug nainteres usab siya sa relihiyon. Nianang tuiga miduaw ako sa akong inahan, kinsa nagpuyo uban sa akong manghod nga si Lena didto sa Baranovichi, Belarus. Sa hangyo sa akong inahan, misimba ako sa Katoliko ug nangalawat. Nianang panahona dihay mga kausaban sa gobyerno ug ekonomiya sa Unyon Sobyet, ug ang wali sa pari pulos lang bahin sa politika. Busa napamatud-an nako nga dili gayod kini ang akong gikinahanglan.

Sa 1994, duha ka beses akong giatake sa kasingkasing ug migrabe ako. Nianang tuiga usab namatay ang akong inahan. Bisan pa niining tanan, nagpadayon ako sa pagbasa sa Bibliya. Kawhaan ug lima ka beses na nakong nabasa ang “Bag-ong Testamento,” human niana wala na ako magtagad sa pag-ihap. Apan nagpadayon gihapon ako pagbasa ug mas midaghan ang akong mga pangutana. Nakita nako nga dili nako masabtan ang Bibliya kon walay motabang kanako.

Midan-ag ang Kahayag

Sa 1996, dihay mga Saksi ni Jehova nga nanuktok sa among pultahan sa Yoshkar-Ola. Wala koy salig kanila kay gibalita diha sa mga mantalaan nga kuyaw sila nga sekta. Apan namalandong ako, ‘Unsa mang kadaot ang ilang mahimo kanako?’ Ang akong unang gipangutana kanila mao ang bahin sa Trinidad. Sila mitubag nga kining pulonga o ideya dili mabasa diha sa Bibliya. Nalipay ko tungod kay mao usab kanay akong pagtuo.

Milukso ang akong kasingkasing sa dihang akong nabasa ang ngalan sa Diyos nga Jehova diha sa Exodo 6:3 sa Ruso nga Ortodoksong Bibliya. Nakurat ako sa panglimbong nga gihimo sa mga relihiyon sa pagtago niining ngalana gikan sa mga tawo. Ug nakadayeg ako nga ang mga Saksi maoy nagdala sa ngalan sa Maglalalang ug nagpadayag niini ngadto sa uban!​—Isaias 43:10.

Akong gibombardiyohan ug mga pangutana ang mga Saksi. Pananglitan: “Nganong naghisgot man ug impiyerno ang Bibliya? Nganong ang popular nga Ruso nga Ortodoksong Bibliya nag-ingon man nga ang yuta sunogon?” Nagpungasi ang akong mga pangutana, apan sa dihang natubag kini gikan sa Bibliya, ako nakaamgo nga mao na kini ang relihiyon nga dugay na nakong gipangita. Ako miluhod ug nagpasalamat sa Diyos nga nanglugmaw ang mga luha tungod sa kalipay.

Wala madugay miuban ako sa mga Saksi sa ilang mga tigom, ug nakadayeg ako sa pagkamapatalinghogon sa mga mamiminaw ug sa pagkinanaas sa mga panid sa Bibliya samtang dihay nagpakigpulong. Kon ang mamumulong magkutlo ug teksto sa Bibliya, tan-awon kini sa tumatambong diha sa ilang Bibliya. Wala pa gayod ako makasinati ug sama niana sukad. Niana nga tigom ang mga Saksi nanganta ug alawiton nga gipasukad sa Isaias 35:5 nga gisugdan niining mga pulonga: “Matang buta pakit-on na.”

Nagtuon ako sa Bibliya uban sa mga Saksi upat ka beses sa usa ka semana. Wala madugay akong nasayran kon nganong gitugotan sa Diyos ang mga kasakit ug ang mga gubat ug kon unsaon niya pagsulbad ang pag-antos. Naikag ako ilabina sa dihang nahibaloan nako ang mahigugmaong saad sa Diyos bahin sa iyang Gingharian, nga pinaagi niini matuman ang iyang kabubut-on alang sa matinumanong mga tawo sa pagtagamtam ug kinabuhing walay kataposan diha sa usa ka paraisong yuta. (Genesis 1:28; Isaias 65:17-25; Pinadayag 21:1-5) Mas mitin-aw kanako ang mga kamatuoran sa Bibliya ug sa Nobyembre 16, 1997, nagpabawtismo  ako agig simbolo sa akong pagpahinungod sa Diyos.

Nahiusa sa Pag-alagad sa Diyos

Wala madugay human nga ako nabawtismohan, si Liza nagsugod usab sa pagtuon sa Bibliya. Bisag paralisado, kusog nga miuswag ang iyang espirituwalidad ug nabawtismohan siya sa 1998. Bisag gisakwat siya paingon sa bawtismohanan, determinado gihapon siya sa pag-alagad sa Diyos sa bug-os kalag. Nagsuhol kami ug masahista, apan si Liza kinahanglan gihapong mag-ehersisyo. Ngadto-ngadto, naayo siya sa paralisis. Karon, gawas nga tigtambongan na siya sa tanang tigom, makigbahin usab siya sa pagpamalaybalay ug sa pagsangyaw sa lagyong mga teritoryo.

Matag higayong mosangyaw ako, mag-ampo ako nga unta hatagan ako ug kaisog. Human makaampo, akong kuhaon ang akong sungkod ug moadto ako sa hunonganan sa trambiya agi sa dalan nga akong agian kanunay. Kon may madunggan akong mga tunob nga nagpaingon kanako, mosugod ako pagpakig-estorya bahin sa Bibliya. Sa dihang makasakay na ako sa trambiya, molingkod ako diha sa tunga-tunga, makig-estorya sa mga tawo bahin sa Bibliya, ug magtanyag ug literatura. Kon dunay magpakitag interes, pangayoon nako ang numero sa ilang telepono.

Di pa dugay, nakahigayon ako sa pagpakig-estorya sa usa ka maestro sa musika diha sa usa ka sanatoryum. Nahingangha siya sa kaalam nga makita diha sa Bibliya. Sa dihang mipauli na kining tawhana, nagsugod siya sa pagtuon sa Bibliya uban sa mga Saksi ni Jehova. Niini gihapon nga sanatoryum akong nahimamat ang direktor sa usa ka lokal nga pabrika nga dunay anak nga lalaki nga buta. Akong gipaambit kaniya ang akong paglaom, ug siya nainteres ug mapasalamaton tungod sa kamatuoran sa Bibliya nga iyang nadungog.

Sukad nga nabawtismohan ako, nakatabang ako ug walo ka tawo nga mahimong mga magwawali sa Gingharian ug nakadumalag daghang pagtuon sa Bibliya. Si Jehova nagpadayon sa pagtabang kanako ug sa akong asawa pinaagi sa among Kristohanong mga igsoon. Ila kaming basahan ug binase sa Bibliya nga mga publikasyon ug amo kining estoryahan. Irekord usab nila sa teyp ang mga pakigpulong sa kombensiyon ug sa kongregasyon alang kanamo. Kining tanan nakatabang sa pagsilsil sa mga kamatuoran sa Bibliya diha sa among kasingkasing ug sa pagpaambit niini nga mga kamatuoran ngadto sa uban. Busa ang kongregasyon nahimong “makapalig-on nga tabang” kanamo.​—Colosas 4:11.

Daghang tuig sa akong kinabuhi ang akong nagugol sa musika, ug karon ako malipayong nag-awit ug mga alawiton sa Gingharian. Akong nasag-ulo ang halos tanang awit diha sa Rusong songbok nga Mag-awit ug mga Pagdayeg Kang Jehova. Nagtuo ako nga nakaplagan ako ni Jehova niining daotang kalibotan ug iya akong gitabangan nga makagawas gikan sa espirituwal nga kangitngit. Busa kombinsido ako nga moabot ra ang adlaw nga iya usab akong pagawason niining literal nga kangitngit.

[Hulagway sa panid 19]

Nagtugtog ug C-major bass nga plawta

[Hulagway sa panid 20]

Nagtugtog ug akordiyon, sa 1960

[Hulagway sa panid 20, 21]

Orkestra sa mga plawta

[Hulagway sa panid 23]

Uban kang Liza karon