Gikan sa Among mga Magbabasa

Ang Pagtuo sa Usa ka Bata (Agosto 2006) Nangandoy ako nga makita unta nako si Dustin ug ang minilyon pang nangamatay, nga nagdagan-dagan ug naglukso-lukso sa kabaskog sa ilang pagkabatan-on diha sa umaabot nga bag-ong kalibotan.

A. A., Sri Lanka

Natandog gayod ako sa pagtuo ug talagsaong kaisog ni Dustin. Ang iyang eksperyensiya nakatabang kanako sa pagtimbang-timbang sa importansiya sa kamatuoran sa akong kinabuhi ug sa paghatag ug pagtagad sa mga butang nga angay nakong unahon. Akong nakat-onan nga ang paghupot ug suod nga relasyon kang Jehova ug ang buluhaton sa Gingharian mao ang angay nakong hatagan ug unang pagtagad.

M.C.V., Brazil

Natandog gayod ako sa makapadasig, mapabilhon nga tinamdan ni Dustin sa kamatuoran. Ang iyang binuhatan nagpakita nga nagtinguha gayod siya sa pagpahimuot kang Jehova ug sa pag-alagad sa uban. Sama kang Dustin, ako nagtinguha usab sa ‘pagdagan sa lumba hangtod sa kataposan ug sa pagsunod sa pagtuo’!

M. N., Japan

Ako siyete anyos. Salamat sa inyong pagpatik niini nga eksperyensiya. Natandog ako sa lig-ong pagtuo ni Dustin kang Jehova, bisan pag duna siyay sakit nga dili na matambalan. Ang iyang panig-ingnan nakapalig-on kanako sa pagkugi pa sa pag-alagad sa Diyos.

T. D., Italya

Makaiikag nga mga Disenyo sa mga Tanom (Septiyembre 2006) Nalingaw kaayo ako niini nga artikulo sulod sa usa ka oras ug tunga! Daghan kaayo akog nakat-onan niini! Naghimo pa gani ko ug mga dayagram aron masabtan nako kinig maayo. Apan matikdi palihog nga ang fraction nga 13/21 dili mao ang hustong proporsiyon sa usa ka sirkulo, kondili ang nabilin nga proporsiyon niini nga 222.5 grado.

L. C. Tinipong Bansa

Ang “Pagmata!” nagtubag: Ang pipila sa among magbabasa husto sa pag-ingon nga mga 222.5 grado ang hustong proporsiyon sa usa ka sirkulo. Nganong ang among artikulo nag-ingon man nga ang hingpit nga anggulo maoy 137.5 grado—ang sukod kon sukdon paatras ang mao gihapong anggulo? Ang website sa MathWorld nag-ingon: “Ang hingpit nga anggulo mao ang anggulo kon tungaon ang usa ka sirkulo [360°] sa hustong proporsiyon (apan gisukod paatras mao nga dili kini moabot ug 180°).” Aron ipatin-aw kon nganong mao kini ang pagsukod sa mga matematiko ug mga siyentipiko sa hingpit nga anggulo, ang Ingles nga matematiko nga si Dr. Ron Knott nag-ingon: “Ang mas gamay nga anggulo mao ang atong makita.” Busa, bisan pa husto ang proporsiyon nga mga 13/21 (kapin sa katunga), naandan na nga 137.5 grado (ubos sa katunga) ang sukod sa hingpit nga anggulo.”

“Gipriso Tungod sa Ilang Pagtuo” (Abril 2006) Dili ako Saksi ni Jehova, apan dako kaayo ko ug pagtahod sa mga membro sa inyong relihiyon. Nakaila ako ug pipila ka Saksi sa nabilanggo ako sa mga kampo konsentrasyon sa Gross-Rosen ug sa Buchenwald. Sulondan ang ilang paggawi ug talagsaon ang ilang pagtuo mao nga sila gitahod ug gidayeg sa ubang mga binilanggo. Bisan gani ang mga SS (pinili nga mga sundalo ni Hitler) nakadayeg usab kanila. Ang akong pultahan bukas kanunay para sa mga Saksi ni Jehova.

P. V., Tinipong Bansa