Paagi 4

Iklaro ang mga Balaod sa Panimalay ug Ayaw Paglangan-langan sa Pagpatuman Niini

Nganong hinungdanon kini? Si Ronald Simons, usa ka sikologo sa University of Georgia, miingon: “Ang tinuod, maayog lakat ang mga bata kon may klarong mga balaod ug kon ipahamtang gayod ang disiplina sa dihang may malapas nga balaod. Kon walay klarong balaod ug walay tarong nga pagdisiplina, ang mga bata mahimong dili matinagdanon, makiako, ug dili malipayon​—ug ang mga tawo sa ilang palibot mahimong miserable usab.” Ang Pulong sa Diyos yanong nag-ingon: “Kon imong gihigugma ang imong mga anak, imo silang pantonon.”​—Proverbio 13:24, New Century Version.

Ang problema: Ang pagtakda ug dili sobra ka estriktong mga balaod sa imong mga anak ug ang pagpadapat niini nagkinahanglag panahon, paningkamot, ug pailob. Ug daw kinaiya na sa mga bata ang paghagit-hagit sa paglapas niining mga balaora. Si Mike ug Sonia, nga nagpadako ug duha ka gagmayng bata miingon bahin niini: “Ang mga bata adunay ilang kaugalingong mga hunahuna ug kagustohan ug dunay dala sa pagkatawo nga kiling sa pagpakasala.” Gipangga pag-ayo niining maong mga ginikanan ang ilang duha ka gagmayng bata. Apan sila miadmitir, “Usahay, ang mga bata gahig-ulo ug walay laing gihunahuna kondili ang ila rang kaugalingon.”

Ang solusyon: Sunda ang paagi ni Jehova sa pagdumala sa nasod sa Israel. Ang usa ka paagi sa iyang pagpasundayag sa iyang gugma sa iyang katawhan mao nga iyang giklaro ang mga balaod nga iyang gidahom nga ilang sundon. (Exodus 20:2-17) Iyang gilatid ang daotang mga resulta kon lapason nila kini nga mga balaod.​—Exodus 22:1-9.

Busa, nganong dili maglista ug mga balaod sa pamilya nga imong gituohan nga kinahanglang tumanon sa imong mga anak. Ang ubang mga ginikanan nagsugyot nga maglista ug pipila lang ka balaod nga pagasundon, tingali mga lima o sobra pa. Dili lisod ipatuman ang pipila lang ka balaod sa panimalay ug mas dali nga mahinumdoman. Tapad sa mga balaod, isulat ang mga silot kon sila makalapas niana. Paneguroa nga ang disiplina dili ra kaayo sobra ug nga andam ka sa pagpahamtang niini. Sublia kanunay ang mga balaod aron ang tanan​—lakip kang Mama ug Papa—​mahibalo kon unsay angay nilang himoon.

Kon malapas ang balaod, ipahamtang dayon ang disiplina sa kalmado, hinugtanay, ug dili magkasumpaki nga paagi. Hinumdomi: Kon nasuko ka, paghulat nga mokalma ka ayha pa magdisiplina. (Proverbio 29:22) Apan, ayaw paglangan-langan sa pagdisiplina. Ayaw pahangyo. Kay kon maglangan-langan ka, ang imong anak magtuo nga mahimo ra diayng lapason ang mga balaod. Sama kini sa giingon sa Bibliya: “Tungod kay ang hukom batok sa usa ka daotang buhat wala dayon ipahamtang, mao nga ang kasingkasing sa mga anak sa mga tawo bug-os nga napunting sa pagbuhat ug daotan.”​—Ecclesiastes 8:11.

Unsa pay laing paagi nga imong ikapakita nga ikaw ang may awtoridad sa pamilya sa paagi nga makaayo sa imong mga anak?

[Blurb sa panid 6]

“Himoa lang ang inyong pulong nga Oo magkahulogan ug Oo, ang inyong Dili, Dili.”​—Mateo 5:37