Paagi 3

Ipakita nga Ikaw ang May Awtoridad

Nganong hinungdanon kini? Ang mga pagpanukiduki nagpakita nga ang mga ginikanan nga mahigugmaon ug matinabangon apan nagpakita nga sila ang may awtoridad sa panimalay ug nagtakda ug mga limitasyon makabaton ug mga anak nga hawod sa tunghaan, mas maayong makig-atubang ug mga tawo, masaligon sa kaugalingon, ug mas malipayon kay sa mga bata kansang mga ginikanan sobra ka mapatumanon sa gusto sa ilang mga anak o kaha dagmalan,” nag-ingon ang magasing Parents.

Ang problema: Gikan sa pagkabata hangtod sa pagkatin-edyer, ang mga bata mosuki sa imong pagdumala kanila. “Ang mga bata makamatikod dayon sa dihang ang ilang mga ginikanan magpanuko sa paggamit sa ilang awtoridad ug sa dihang sila moangka,” misulat si John Rosemond, ang awtor sa librong Parent Power! “Mahitungod sa isyu kon kinsay magbuot sa pamilya, kon dili ipakita sa mga ginikanan nga sila ang angay magbuot, nan but-an sila sa mga bata,” siya miingon.

Ang solusyon: Ayawg kabalaka nga masuko kanimo ang imong mga anak o sila masagmuyo kon imong ipakita nga ikaw ang may awtoridad sa pamilya. Wala gimbut-i ni Jehova nga Diyos, ingong Magtutukod sa pamilya, nga ang mga anak may awtoridad usab sa pamilya. Hinunoa, iyang gitudlo ang mga ginikanan sa pagdumala sa pamilya ug gisugo ang mga anak: “Magmasinugtanon [kamo] sa inyong mga ginikanan.”​—Efeso 3:14, 15; 6:1-4.

Mapakita nimo nga ikaw ang may awtoridad bisag dili ka maghari-hari. Sa unsang paagi? Pinaagi sa pagsunod sa panig-ingnan ni Jehova. May gahom siya sa pagpugos sa iyang tawhanong mga anak sa pagtuman sa iyang kabubut-on, apan siya nangaliyupo, nga nag-agni sa atong kaayo. “Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba,” nag-ingon ang iyang Pulong. (Isaias 48:18) Buot ni Jehova nga magmasinugtanon kita kaniya, dili tungod kay nahadlok kita kaniya, kondili kay ato siyang gihigugma. (1 Juan 5:3) Siya makataronganon sa iyang gipangayo kanato ug nahibalo nga kita ang makabenepisyo kon kita magkinabuhi subay sa iyang mga sukdanan sa pamatasan.​—Salmo 19:7-11.

Sa unsang paagi imong mapakita ang imong awtoridad sa timbang nga paagi? Una, kinahanglang kombinsido ka nga imo kining obligasyon sa Diyos. Ikaduha, kinahanglang kombinsido ka nga ang pagkinabuhi subay sa mga sukdanan sa Diyos sa pamatasan makahatag gayod ug kaayohan kanimo ug sa imong mga anak.​—Roma 12:2.

Unsay imong kinahanglang buhaton aron imong ikapakita sa hustong paagi ang imong awtoridad?

[Blurb sa panid 5]

“Disiplinaha ang imong mga anak, ug . . . sila makapalipay sa imong kasingkasing.”​—Proverbio 29:17, New Revised Standard Version