Pagpaniid sa Kalibotan

◼ “Diha sa ordinaryong panimalay sa Amerika karon, mas daghan ang telebisyon kay sa mga tawo. Katunga sa tanang panimalay sa Amerika dunay tulo ka TV o sobra pa.”​—ASSOCIATED PRESS, U.S.A.

◼ Adlaw-adlaw diha sa mga korte sa tibuok Habagatang Aprika, 82 ka bata ang gikiha nga “nanglugos o nag-among-among ug ubang mga bata.” Sumala pa sa uban, daghan niadtong gisumbong miingon nga ang ilang pagpangabuso “ilang gisundog sa ilang nakita sa telebisyon.”​—THE STAR, HABAGATANG APRIKA.

Kakulag Tulog Diyutay rag Mahimong Trabaho

Ang batasan sa pagkatulog sa mga Katsila nakaapektar sa gidaghanon sa ilang mahuman nga trabaho. Si Dr. Eduard Estivill, nga nagdumalag usa ka klinika sa Barcelona alang niadtong may problema sa pagkatulog, nag-ingon nga kon itandi sa ubang mga taga-Uropa, ang mga Katsila mas sayo nga momata, mas daghag oras nga gigugol sa trabaho, mas gabii nang manihapon, ug wala pay 40 minutos ang kinatulgan. Apan, ang kakulang ug tulog moresulta ug pagkasapoton, pagkalimtanon, pagkamabalak-on, ug depresyon. Busa si Dr. Estivill nagtambag: “Ang mga tawo nga utok ang gigamit sa pagtrabaho o kadtong makigbahin sa ubang mga kalihokan nga nagkinahanglag paminsar kinahanglang matulog ug pito ngadto sa walo ka oras kada adlaw.”

Trigo Para Pangpainit sa Balay Panahon sa Tingtugnaw?

Husto bang gamiton ang trigo aron lang mapainit ang balay panahon sa tingtugnaw? Ang mantalaang Frankfurter Allgemeine Sonntagszeitung sa Alemanya miingon nga tungod sa pagbahar sa presyo sa trigo ug pagtaas sa presyo sa aseite, mas barato kon isugnod sa mag-uuma ang iyang trigo kay sa ibaligya kini aron ipalit ug aseite. Ang pagpatunghag duha ka kilo ug tunga nga trigo mokantidad ug 20 cents, apan kon isugnod, mopatungha kinig kainit nga katumbas nianang sa usa ka litrong aseite nga mokantidad ug 60 cents. Busa kini ang problema nga gihisgotan sa mantalaan: Makaako ka ba “sa pagsugnod ug trigo samtang ang ubang mga tawo gipanggutom”?

Pagbisita sa Papa Ginegosyo

Sa dihang mibisita ang papa sa Alemanya sa 2006, ang mga pabrika, negosyante, ug ang turismo nangandam ug maayo aron makasapi sa iyang pagbisita. Ang simbahan usab namilig mga kasosyo sa negosyo nga mao ray makabaligya sa mga sobenir sa pagbisita sa papa. Lakip sa mapalit nga mga sobenir mao ang mga rosaryohan, kandila, binotelyang bendita, tasa, kalo, kamiseta, mga key ring, ug bandera sa Batikano. Ang magasing Der Spiegel nag-ingon: ‘Ang Iglesya Katolika abtik kaayong manapi, nga mora bag wala gayod mangabog si Jesu-Kristo ug mga negosyante gikan sa templo.’

Kublan na sa Kapintasan Tungod sa mga Dula sa Video

“Tungod sa pagsigeg dula ug mapintas nga mga dula sa video, ang mga tawo dili na ngilngigan sa tinuod na nga mga kapintasan,” matod pa sa mga sikologo nga nanukiduki sa Iowa State University, U.S.A. Ang unang mga panukiduki nagpakita nga ang pagsigeg dula ug mga dula sa video “makapaagresibo sa hunahuna, makapasuko, makapakusog sa pinitik sa kasingkasing ug sa pagginhawa, ug makapaagresibo sa paggawi.” Gisusi niini nga panukiduki ang gikusgon sa pinitik sa kasingkasing niadtong giobserbahan ug usab ang ilang reaksiyon sa mapintas nga salida nga aktuwal nga nahitabo human nga sila nakadula ug mapintas o dili mapintas nga mga dula sa video. Ang resulta nagpakita nga “kadtong nagdula ug mapintas nga dula sa video naanad na sa tanang matang sa kapintasan ug sa ngadto-ngadto ang ilang pagbati makublan.”