Paagi 7

Pagtudlo Pinaagig Panig-ingnan

Nganong hinungdanon kini? Ang atong paggawi makatudlo sa uban kon unsay angayng igawi. Samtang ang atong mga pulong makahatag lang ug impormasyon. Pananglitan, tingali sultihan sa mga ginikanan ang ilang mga anak nga angayng magmatinahoron sila ug nga sila kinahanglang mosulti sa tinuod. Apan, kon kini nga mga ginikanan maningka sa usag usa o maningka sa ilang mga anak ug mamakak agig pasangil sa ilang mga kasaypanan, sila nagtudlo nga ingon gayod niana ang mga hamtong. Ang pagsundog sa ginahimo sa mga ginikanan maoy “usa sa labing epektibong paagi sa pagkat-on sa mga bata,” miingon ang awtor nga si Dr. Sal Severe.

Ang problema: Ang mga ginikanan dili hingpit. “Ang tanan nakasala ug wala makaabot sa himaya sa Diyos,” misulat si apostol Pablo. (Roma 3:23) Kon bahin sa pagpugong sa atong sinultihan, ang disipulo nga si Santiago nagsulat: “Ang dila, walay usa ka tawo ang arang makapaaghop niini.” (Santiago 3:8) Dugang pa, ang mga bata mosulay gayod sa pagsukod sa pailob sa ilang mga ginikanan. “Makurat gyod ko nga kining akong duha ka anak maayo kaayong mopasuko nako,” miingon si Larry, kinsa kalmado ug mapugnganon sa kaugalingon.

Ang solusyon: Bisag dili hingpit, paningkamot nga mahimo kamong maayong mga panig-ingnan. Ug gamita ang inyong panagsang kasaypanan sa pagtudlog maayong pagtulon-an. “Kon masingkahan nako ang akong mga anak o makahimo akog sayop nga desisyon nga nakaapekto kaayo kanila,” miingon si Chris, nga duhay anak, “dawaton nako ang akong sayop ug mangayo akog pasaylo. Kini nagtudlo sa akong mga anak nga ang mga ginikanan masayop usab ug nga kaming tanan kinahanglang maningkamot sa pagpauswag sa among panggawi.” Si Kostas, nga gihisgotan sa sinugdan, miingon: “Akong nakita nga kay mangayo man akog pasaylo kon makasingka ako, ang akong mga anak nakakat-on sa pagpangayog pasaylo kon sila masayop.”

Si Jehova nga Diyos nag-ingon: “Ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan ni Jehova.” (Efeso 6:4) Kon lahi ang ginahimo sa ginikanan kay sa iyang gisulti, mas makapikal kini sa mga bata kay sa mga hamtong. Busa, nganong dili nimo pangutan-on ang imong kaugalingon inigtapos sa adlaw: Kon tibuok adlaw ako nga walay tingog-tingog, unsang pagtulon-an ang makuha sa akong mga anak sa akong aksiyon? Mosibo ba kini sa mga pagtulon-an nga akong gipaningkamotang itudlo pinaagig pulong?

[Blurb sa panid 9]

“Ikaw ba nga nagatudlo sa uban, dili magtudlo sa imong kaugalingon?”​—Roma 2:21

[Mga hulagway sa panid 9]

Kon mangayog pasaylo ang ginikanan, ang bata makakat-on usab sa pagpangayog pasaylo