Paagi 1

Pangitag Maayong Tambag

Nganong hinungdanon kini? Sa dihang kugoson sa ginikanan sa unang higayon ang ilang bag-o pang natawong bata, lainlain sila ug bation. “Dili matukib ang gibati ko nga kalipay,” miingon si Brett, nga usa ka amahan nga nagpuyo sa Britanya. “Apan gibati ko usab nga dako kaayo kini nga responsibilidad ug nga dili pa ako andam niini.” Si Monica, nga usa ka inahan nga nagpuyo sa Argentina, miingon: “Nabalaka ako kon makatagana ba kaha ako sa mga panginahanglan sa akong gamayng batang babaye. Ako nakapangutana, ‘Mapadako ko kaha siya nga mahimong usa ka responsableng hamtong?’”

Mabati mo ba usab ang kalipay ug kabalaka niini nga mga ginikanan? Sa pagkatinuod, ang pagpadako ug bata kapoy kaayo nga trabaho apan kini makapagaan sa pagbati, makapaguol apan makapalipay usab. Sama sa giingon sa usa ka amahan, “kausa lang moagi ang yugto sa pagmatuto ug anak.” Kay dako man kaayo ug impluwensiya ang mga ginikanan sa panglawas ug kalipay sa ilang mga anak, tingali mobati ka nga nagkinahanglan ka gayod ug kasaligang tambag kon sa unsang paagi mahimo ka nga mas maayong ginikanan.

Ang problema: Ang tanan daw dunay tambag kon unsaon pagmatuto ug mga anak. Kaniadto, ang bag-ong mga ginikanan mag-agad sa panig-ingnan sa ilang mga ginikanan o sa ilang tinuohan ingong ilang giya. Apan diha sa daghang kayutaan, ang kahikayan sa pamilya nagakadaot ug ang relihiyon wala nay impluwensiya. Tungod niini, daghang ginikanan mangayog tambag sa mga propesyonal nga mga magtatambag kon unsaon sa pagkahimong maayong ginikanan. Ang uban nga itambag niini nga mga eksperto gipasukad sa maayong mga prinsipyo. Sa ubang mga kahimtang ang tambag nga ihatag nila magkasumpaki ug sa ngadto-ngadto isipon nga kinaraan.

Ang solusyon: Pangayog tambag sa usa ka Persona nga mas nahibalo kon unsaon sa pagmatuto ug mga anak​—ang Maglalalang sa tawo, si Jehova nga Diyos. (Buhat 17:26-28) Ang Iyang Pulong, ang Bibliya, naundan ug prangkang tambag ug praktikal nga mga pananglitan nga makatabang kanimo nga mahimong mas maayong ginikanan. “Ihatag ko ang tambag nga ang akong mata magatan-aw kanimo,” siya nagsaad.​—Salmo 32:8.

Unsang tambag ang gihatag sa Diyos ngadto sa mga ginikanan nga makatabang kanila sa pagmatuto ug malipayong mga anak?

[Blurb sa panid 3]

“Salig kang Jehova sa bug-os mong kasingkasing ug ayaw pagsalig sa kaugalingon mong pagsabot.”​—Proverbio 3:5