Paagi 6

Sabta ang Pagbati sa Imong Anak

Nganong hinungdanon kini? Gusto ug gikinahanglan gayod sa mga bata nga ang labing importanteng mga tawo sa ilang kinabuhi mahibalo sa ilang gibati. Kon sawayon dayon sa mga ginikanan ang ilang mga anak sa dihang mopadayag sila sa ilang gibati, ang mga bata lagmit dili na ganahang mosulti pa kanila ug magtuo nga dili sila makabuot kon unsay angayng bation ug hunahunaon.

Ang problema: Makakurat pamation ang mga bata sa dihang mopadayag sila sa ilang hunahuna ug pagbati. Tinuod, ang uban nga isulti sa mga anak makapabalaka sa mga ginikanan. Pananglitan, ang naguol kaayo nga bata tingali moingon, “Maayo pang mamatay na lang ko.” a Lagmit wala ra sa buot nga motubag ang ginikanan nga, “Ayaw pagbinuang diha!” Ang mga ginikanan tingali mabalaka nga ang pagdawat sa negatibo nga pagbati o kaisipan sa bata sama rag miuyon sila niini.

Ang solusyon: Ipadapat ang tambag sa Bibliya nga “magmaabtik sa pagpaminaw, magmahinay sa pagsulti, magmahinay sa pagkapungot.” (Santiago 1:19) Hinumdomi nga gisabot ni Jehova nga Diyos ang negatibong pagbati sa daghan niyang matinumanong mga alagad kay iya mang gipasulat kini diha sa Bibliya. (Genesis 27:46; Salmo 73:12, 13) Pananglitan, sa dihang si Job nag-antos ug grabeng mga pagsulay, siya nakaingon nga gusto na niyang mamatay.​—Job 14:13.

Tinuod, ang ubang hunahuna ug pagbati ni Job kinahanglang tul-iron. Apan gisabot ni Jehova ang pagbati ni Job ug wala siya pugngi sa pagsulti, hinunoa iyang gihatagan si Job ug importansiya pinaagi sa mapailobong paghatag kaniya ug higayon sa pagbubo sa iyang kasingkasing. Malulotong gitul-id siya ni Jehova human nga nakapahungaw siya sa iyang gibati. Ang usa ka Kristohanong amahan miingon: “Kay gitugotan man ako ni Jehova sa pagbubo sa akong kasingkasing kaniya diha sa pag-ampo, nan makataronganon lang nga tugotan nako ang akong mga anak sa pagsulti kanako sa ilang maayo ug dili maayong pagbati.”

Sa sunod higayon nga matental ka sa pagsulti sa imong anak, “Ayaw pagbinuang diha” o “Hunahuna ra na nimo,” hinumdomi ang gibantog nga lagda ni Jesus: “Sumala sa buot ninyo nga pagabuhaton sa mga tawo nganha kaninyo, mao usab ang inyong pagabuhaton ngadto kanila.” (Lucas 6:31) Pananglitan, handurawa nga gidaogdaog ka diha sa trabahoan o nahigawad ka tungod tingali kay nasayop ka. Imong gipahungaw ang imong kaguol ngadto sa usa ka suod nga higala, ug imo siyang giingnan nga naglisod ka sa imong trabaho. Unsay imong gusto nga himoon sa imong higala? Sultihan ka nga wala nay kaso kay gamay ra na nga problema ug moingon dayon nga ikaw man say mabasol? O mas gusto ka ba nga moingon ang imong higala: “Dili bitaw na lalim. Makaguol gyod na”?

Ang mga bata ug mga hamtong modawat gayod ug tambag kon sa ilang tan-aw ang nagtambag nakasabot gayod kanila ug sa mga problema nga ilang giatubang. “Ang kasingkasing sa maalamon nagapahinabo nga ang iyang baba magpakita ug hait nga salabotan, ug sa iyang mga ngabil nagadugang kini sa pagkamadanihon,” nag-ingon ang Pulong sa Diyos.​—Proverbio 16:23.

Sa unsang paagi makatino ka nga ang imong tambag gipatalinghogan?

[Footnote]

[Blurb sa panid 8]

“Kon ang usa magahatag ug tubag sa usa ka butang nga wala pa niya madungog, kana maoy kabuangan sa iyang bahin.”​—Proverbio 18:13