Ang Pagkapositibo Makaayo ba sa Panglawas?

“Ang kasingkasing nga malipayon maayo nga tambal,” misulat ang maalamong hari sa Israel mga 3,000 ka tuig na ang milabay. (Proverbio 17:22) Ang mga doktor karon mouyon sa kaalam nianang mga pulonga nga gikan sa Diyos. Apan dili tanang tawo dunay “kasingkasing nga malipayon.”

Halos kitang tanan dunay problema sa kinabuhi nga tungod niini kita maluya ug makabaton ug negatibong panglantaw. Bisan pa niana, ang mga panukiduki nga nahimo dili pa dugay nagpakita nga bisan pa sa mga kalisod, maayo nga magbaton kita ug positibo nga tinamdan.

Ang pagkapositibo gihubit ingong “malaomong panghunahuna o disposisyon; masaligong tinamdan sa umaabot.” Unsay bation sa usa ka tawong positibo kon siya mapakyas? Lantawon niya ang kapakyasan ingong lumalabay lang. Kini wala magpasabot nga dili siya makadawat sa tinuod. Hinunoa, kini iyang dawaton ug susihon. Dayon, kon itugot sa kahimtang, molihok siya aron mausab o moarang-arang ang situwasyon.

Sa laing bahin, basolon sa tawong negatibo ug tinamdan ang iyang kaugalingon sa iyang mga kapakyasan. Siya nagtuo nga ang iyang kapakyasan maoy tungod sa iyang kabuang, kawalay abilidad, o sa iyang dili maayong panagway. Tungod niini dili na siya maningkamot sa pagpauswag sa iyang kahimtang.

Ang pagkapositibo ba may epekto sa atong panglawas ug pagkatawo? Oo. Sa dihang gitun-an sa mga siyentipiko sa Mayo Clinic sa Rochester, Minnesota, U.S.A. ang kapin sa 800 ka pasyente sulod sa 30 ka tuig, ilang nasuta nga ang mga tawong positibog tinamdan mas himsog ug panglawas ug mas taas ug kinabuhi. Ilang nakita usab nga ang mga tawong positibog tinamdan mas makasagubang sa tensiyon ug dili daling madutlan ug depresyon.

Dili sayon nga magmapositibo niining kalibotan nga daghan kaayog problema. Busa dili ikatingala nga daghan ang dili positibo ug panghunahuna. Unsa may himoon aron masagubang kini nga problema? Diha sa kahon, makakita kag pipila ka sugyot nga makatabang kanimo.

Bisan tuod ang malipayong disposisyon dili makasulbad sa mga problema, kini makaamot sa pagbaton ug mas himsog ug mas malipayong kinabuhi. Ang Bibliya nag-ingon: “Alang sa nangaguol, ang matag adlaw daotan; apan alang sa mga malipayon ug kasingkasing, ang matag adlaw pista kanunay.”—Proverbio 15:15, The Jerusalem Bible.

[Kahon/Hulagway sa panid 26]

Pipila ka Sugyot Aron Makabaton Kag Positibong Panglantaw a

◼ Kon maghunahuna ka nga dili ka ganahan sa usa ka kalihokan o dili ka molampos sa imong gihunahuna nga buhaton, wad-a kini sa hunahuna. Hunahunaa ang maayong mga butang.

◼ Kalipayi ang imong trabaho. Bisan unsa pay imong trabaho, pangitag usa ka butang bahin sa imong trabaho nga makapalipay kanimo.

◼ Pangitag mga higala nga positibo ug tinamdan.

◼ Atubanga ang mga problema nga puwede nimong masulbad; dawata na lang ang mga kahimtang nga dili na nimo mausab.

◼ Matag adlaw, pagsulat ug tulo ka makalipayng mga butang nga nahitabo kanimo.

[Footnote]