Ang Hunahuna sa Bibliya

Daotan ba ang Paggamit ug Kontraseptibo?

UNSAY imong hunahuna? Daotan ba kon ang mga tawong minyo mogamit ug kontraseptibo o mga pamaagi aron dili makapanamkon? Ang imong tubag tingali nagdepende sa imong relihiyon. Ang Katoliko nagtudlo nga “daotan gayod” ang bisan unsang buhat nga gituyo aron mapugngan ang pagsamkon. Gipasiugda sa doktrina sa Katoliko nga ang katuyoan sa pagpakigsekso mao gayod ang pagpanganak. Busa, alang sa Katoliko “daotan” ang paggamit ug kontraseptibo.

Alang sa kadaghanan lisod kining dawaton. Usa ka artikulo sa Pittsburgh Post-Gazette bahin niini nga ulohan miingon nga “kapin sa 75 porsiyento sa mga Katoliko sa Tinipong Bansa nag-ingon nga angayng tugotan sa simbahan ang paggamit ug artipisyal nga pamaagi sa pagpugong sa pagsamkon. . . . Ug minilyon ang wala gayod manumbaling niana nga balaod.” Ang usa kanila, si Linda, nga may tulo ka anak, walay lipod-lipod nga miadmitir nga naggamit ug kontraseptibo apan miingon: “Wala ako tulisoka sa akong konsensiya kay para nako wala ako makasala.”

Unsa may gisulti sa Pulong sa Diyos bahin niini nga isyu?

Ang Kinabuhi Bililhon

Alang sa Diyos bililhon ang kinabuhi sa usa ka bata, bisan kadtong binhi nga nagtubo pa lang sa tagoangkan. Si Haring David sa Israel giinspirar sa Diyos sa pagsulat: “Gisalipdan mo ako sa sulod sa tiyan sa akong inahan. . . . Ang imong mga mata nakakita bisan sa binhi pa ako sa tagoangkan, ug ang tanan nga bahin niini nahisulat diha sa imong basahon.” (Salmo 139:13, 16) Magsugod ang kinabuhi panahon sa pagpanamkon, ug gipakita diha sa Balaod ni Moises nga manubag ang usa ka tawo kon siya makapahinabog kadaot sa bata nga anaa sa tagoangkan. Gani, ang Exodo 21:22, 23 nag-ingon  nga kon ang babayeng mabdos o ang iyang gisabak mamatay tungod kay naangin siya sa away sa duha ka tawo, kining butanga kinahanglang iatubang sa gitudlo nga mga maghuhukom. Ilang timbang-timbangon ang mga kahimtang ug kon kini ba tinuyo, apan ang silot kinahanglang “kalag alang sa kalag,” o kinabuhi alang sa kinabuhi.

Kini nga mga prinsipyo ikapadapat sa paggamit ug kontraseptibo kay ang ubang pamaagi sa pagpugong sa pagsamkon makapahulog sa gisabak. Kining maong mga pamaagi supak sa prinsipyo sa Diyos may kalabotan sa pagtahod sa kinabuhi. Apan ang kadaghanang kontraseptibo dili makapahulog sa gisabak. Mahimo bang gamiton kining matanga sa kontraseptibo?

Walay mabasa diha sa Bibliya nga nagsugo sa mga Kristohanon sa pagpanganak. Tinuod, ang Diyos nagsugo sa unang magtiayon ug sa pamilya ni Noe: “Magmabungahon ug magdaghan kamo ug pun-a ang yuta.” Apan wala kana isugo ngadto sa mga Kristohanon. (Genesis 1:28; 9:1) Busa ang magtiayon nay magdesisyon kon manganak ba sila, kon pila ka buok ang ilang anak, ug kon kanus-a sila manganak. Wala usab hukmi sa Kasulatan ang pagpugong sa pagpanganak. Nan, sumala sa Bibliya, personal nga desisyon na sa bana ug asawa kon mogamit ba sila ug kontraseptibo nga dili makahulog sa gisabak. Apan, nganong supak man ang Katoliko bahin sa paggamit ug kontraseptibo?

Kaalam sa Tawo Kontra Kaalam sa Diyos

Usa ka Katolikong reperensiya miingon nga niadtong ikaduhang siglo K.P. gipadapat sa nag-angkong mga Kristohanon ang usa ka Stoic nga balaod nga sumala pa niini, ang bugtong katuyoan sa pagpakigsekso mao ang pagpanganak. Kini nga panglantaw gibase sa pilosopiya, dili sa Bibliya. Kini gipasukad dili sa kaalam sa Diyos, kondili sa kaalam sa tawo. Ug kini nga pilosopiya nagpadayon sa daghang kasiglohan ug gipasobrahan sa lainlaing Katolikong mga teologo. a Busa nahimo na hinuong sala ang pagpakigsekso kon ang katuyoan lang niini mao ang pagtagamtam ug kalipay, ug sa ingon daotan ang pagpakigsekso nga walay tuyo nga manganak. Apan wala magtudlo niana ang Bibliya.

Sa balaknong paagi, ang basahon sa Proverbio sa Bibliya nagsaysay sa kalipay nga bation dihang ang bana ug asawa magsekso: “Inom ug tubig gikan sa imong kaugalingong biawan, ug sa dinagayday gikan sa imong kaugalingong atabay. . . . Himoang mapanalanginan ang imong tinubdan sa tubig, ug pagmaya uban sa asawa sa imong pagkabatan-on, usa ka hiligugmaon nga bayeng osa ug usa ka makabibihag nga kanding sa bukid. Tugoting ang iyang mga dughan magtagbaw kanimo sa kalipay sa tanang panahon. Sa iyang gugma maanaa ka unta kanunay sa hilabihang kalipay.”—Proverbio 5:15, 18, 19.

Ang seksuwal nga relasyon sa bana ug asawa maoy gasa sa Diyos. Apan dili lamang pagpanganak ang bugtong katuyoan niini. Ang pagpakigsekso sa magtiayon maoy pagpasundayag usab ug gugma ug pagmahal sa usag usa. Busa kon ang magtiayon mogamit ug kontraseptibo kay dili nila gustong manganak, ila na kanang desisyon, ug dili sila angayng hukman sa uban.—Roma 14:4, 10-13.

[Footnote]

NAHIBULONG KA BA?

◼ Sala ba kon ang bana ug asawa magsekso aron sa pagtagamtam ug kalipay?—Proverbio 5:15, 18, 19.

◼ Unsay angay palandongon sa mga Kristohanon kon mogamit sila ug kontraseptibo?—Exodo 21:22, 23.

◼ Sa unsang paagi angayng lantawon sa uban ang mga magtiayon nga naggamit ug kontraseptibo?—Roma 14:4, 10-13.

[Blurb sa panid 11]

Ang Diyos nagsugo sa unang magtiayon ug sa pamilya ni Noe: “Magmabungahon ug magdaghan kamo ug pun-a ang yuta.” Apan wala kana isugo ngadto sa mga Kristohanon