Dugmok nga Kasingkasing, Dugmok nga Pagtuo

“NAGPASAD ang patayng mga lawas bisan diin, ug dili na namo mapunting kon diin nagtindog kaniadto ang among balay,” miingon ang usa ka lalaki nga taga-Sri Lanka human nga gipayhag sa tsunami ang iyang baryo niadtong Disyembre 2004. Diha sa usa ka artikulo bahin niini nga kalamidad, usa ka editor sa relihiyosong mantalaan miingon nga siya usahay “mag-ampo nga nanakmol.”

Giisip sa kadaghanang tawo nga kastigo gikan sa Diyos ang mga kalamidad. Usa ka bagyo nga nakapahinabog dako kaayong kalumpagan ginganlan sa usa ka magsusulat ingong “ang kumo sa Diyos.” Sa Tinipong Bansa, gitawag sa ubang mga lider sa relihiyon ang mga kalamidad sama sa Bagyong Katrina ingong “kasuko sa Diyos” diha sa “mga siyudad sa kahilayan.” Sa Sri Lanka, gibasol sa militanteng mga Budhista ang mga Kristiyano nga silay nakaingon sa tsunami, nga nakapasamot sa panagkontrahay niining mga relihiyona. Ang sinaligan sa usa ka templo sa Hindu nagtuo nga nasuko ang diyos nga si Shiva tungod kay daotan na ang mga tawo. Usa ka lider sa Budhista sa Tinipong Bansa miingon bahin sa mga kalamidad: “Wala kami masayod kon nganong may mahitabong ingon niini. Wala gani kami mahibalo kon nganong ania kita dinhi.”

Kon makakita kag mga hulagway sa nangagubang mga balay, nakalas nga mga kinabuhi, ug mga tawong dugmok ug kasingkasing, dili ba makapangutana ka, ‘Nganong gitugotan sa Diyos ang daghan kaayong pag-antos’? O dili ba makahunahuna ka, ‘tingali ang Diyos duna gayoy mga katarongan kon nganong gitugotan niya kini nga mahitabo apan wala niya ipadayag kon unsa kining mga katarongana’? Kining mga butanga hisgotan sa sunod nga mga artikulo. Gihisgotan usab niini ang pipila ka praktikal nga mga lakang nga mahimong himoon aron malikayan ang kadaot ug kamatayon kon ugaling may mahitabong kalamidad.

[Hulagway sa panid 3]

Daghang lider sa relihiyon way hanaw kon nganong gitugotan sa Diyos ang mga kalamidad