Mga Kalamidad Hapit Nang Matapos

ANG mga linog, gubat, kagutom, ug sakit maoy pipila ka butang nga gitagna ni Jesus nga ilhanan sa “kataposan sa sistema sa mga butang” nga atong gikinabuhian karon. (Mateo 24:3, 7, 8; Lucas 21:7, 10, 11) Siyempre, dili ang Diyos ang mabasol niini. Dili si Jesus ni ang iyang Amahan, si Jehova nga Diyos.

Apan human nga matuman kining gitagnang mga ilhanan, ipadangat unya sa Diyos ang iyang Gingharian—usa ka langitnong kagamhanan nga pagamandoan ni Jesu-Kristo—ug ang kalaglagan niadtong dili modawat sa pagkasoberano ni Jehova. (Daniel 2:44; 7:13, 14) Human niana, ang yuta mahimo nang malinawon nga puy-anan, diin dili na angay kahadlokan ang mga kalamidad. Sa bug-os nga diwa, matuman na unya ang saad sa Diyos: “Ang akong katawhan magapuyo sa malinawong puloy-anang dapit ug sa mga pinuy-anan sa bug-os nga pagsalig ug sa walay-pagkatugaw nga mga dapit-pahulayan.”—Isaias 32:18.

Pamati sa Diyos Aron Makabaton Ka ug Kinabuhing Walay Kataposan!

Sama sa gisaysay na sa nag-unang artikulo niini nga seryal, ang pagpamati sa mga pasidaan  makaluwas ug kinabuhi. Kana nga prinsipyo labi nang mapadapat diha sa mga pasidaan sa Diyos nga narekord sa Bibliya. Ang Diyos nagsaad: “Kon bahin sa nagapatalinghog kanako, siya magapuyo sa kasegurohan ug dili matugaw sa kalisang sa katalagman.”—Proverbio 1:33.

Ang mga Saksi ni Jehova naningkamot sa pagpamati sa Diyos pinaagi sa regular nga pagbasa sa iyang dinasig nga Pulong ug sa pagpadapat sa mga pagtulon-an niini. Ikaw gidapit usab nila sa paghimo niini. Oo, ang tanan nga masinundanong mamati kang Jehova dili angayng mahadlok sa umaabot ug sa kalaglagan nga modangat unya sa mga daotan. Hinunoa, sila makalaom nga makabaton ug kinabuhing walay kataposan sa Paraiso sa yuta, diin sila “makakaplag gayod sa ilang tumang kalipay sa kadagaya sa pakigdait.”—Salmo 37:10, 11.

[Kahon sa panid 8]

KAHUPAYAN ALANG SA MGA NAGBANGOTAN

Namatyan ka na bag mga minahal sa kinabuhi, tingali tungod sa kalamidad o ubang trahedya? Hapit 2,000 ka tuig kanhi, ang suod nga higala ni Jesus nga si Lazaro wala damha nga namatay. Sa pagkahibalo niini, si Jesus miadto sa baryo ni Lazaro, sa Betania, ug gipukaw siya gikan sa “pagkatulog” sa kamatayon.—Juan 11:1-44.

Gihimo ni Jesus kini nga milagro dili lamang aron ipasundayag ang iyang gugma kang Lazaro ug sa iyang pamilya kondili aron sa pagpamatuod usab nga tinuod ang saad ni Jesus bahin sa pagbanhaw niadtong “tanan nga anaa sa handomanang mga lubnganan” sa magmando na siya sa Gingharian. (Juan 5:28, 29) Oo, sa umaabot nga Paraiso, wagtangon ni Jesus ang tanang kadaot nga nagsugod sa rebelyon didto sa Eden. a—1 Juan 3:8.

[Footnote]

[Kahon/Hulagway sa panid 9]

NABAG-O SA LINOG ANG DAGAN SA AKONG KINABUHI

Sa 1971, usa ako ka batan-ong inahan nga nangandoy nga mahimong mag-aawit sa opera. Gikan sa akong yutang namat-an ug kahayag sa Winnipeg, Manitoba, Canada, mibalhin ako niadtong 1957 ngadto sa Hollywood, California, U.S.A., nga namasin nga mainila ako sa natad sa musika nga gimahal ko pag-ayo.

Sa matag ting-init sulod sa siyam ka tuig, si Mama, nga usa ka Saksi ni Jehova, mobiyahe gikan sa Canada sa pagbisita nako. Iyang pahimuslan kining mga higayona sa pagpakigsulti kanako bahin sa Bibliya, kay nagtuo gayod siya nga naundan kana sa labing maayong tambag bahin sa kalipay ug sa pamilyahanong kinabuhi. Gimahal ko si Mama ug ako matinahorong namati kaniya. Apan, matag higayong molakaw na siya, akong ilabay ang mga basahon nga iyang gihatag kanako, kay nagtuo ako nga ang kinabuhi nga akong gisubay husto.

Dayon, sayo sa Martes sa buntag sa Pebrero 1971, nahigmata ako sa linog nga 6.6 ang gikusgon. Makabungog ang kabanha, ug ang pag-uyog kusog kaayo. Sa katarantar, dalidali nakong giadto ang akong anak nga wala ra maunsa diha sa kuna. Sa dihang mihunong ang linog, nagpasad sa salog ang mga sulod sa kabinet ug ang buak nga mga bildo, ug mibaganaw sa lagwerta ang tubig sa swimming pool. Bisan pag luwas ang akong anak, wala na ako makatulog ug balik.

Si Mama nakahisgot nako nga ang “dagkong mga linog” maoy bahin sa “kataposang mga adlaw.” (2 Timoteo 3:1; Lucas 21:7-11) Niana nga ting-init mibalik siya alang sa iyang tinuig nga pagbisita nga wala nay dalang mga basahon sa Bibliya. Kay nakasangyaw na kanako sulod sa siyam ka tuig nga walay resulta, nagtuo siya nga wala akoy interes. Nasayop gayod siya! Gikan sa iyang pag-abot, gibombardiyohan ko siyag mga pangutana. Kalit lang nga mibugnaw ang akong gana sa pag-awit ug ang akong pagtinguha nga mainila.

Nianang semanaha mismo mitambong ako sa Kristohanong mga tigom uban ni Mama sa Kingdom Hall sa among dapit, ug human niadto nagsige na akog tambong sa mga tigom. May gikasabot siya nga motudlo kanako sa Bibliya diha sa balay. Ako nabawtismohan sa 1973, ug karon nagagugol ug aberids nga 70 ka oras matag bulan sa pagsangyaw sa maayong balita sa Gingharian sa Diyos ngadto sa uban. (Mateo 24:14) Imbes makadugmok sa akong pagtuo sa Diyos, ang linog nakapalig-on hinuon sa akong pagtuo.—Sumala sa giasoy ni Colleen Esparza.