“Magmapasalamaton Kamo”

◼ Ang Bibliya kanunayng nagdasig sa mga magsisimba sa Diyos sa pagpasalamat. “Maayo nga magpasalamat kang Jehova,” nag-ingon ang Salmo 92:1. Si apostol Pablo nagtambag usab: “Magmapasalamaton kamo.”—Colosas 3:15.

Adunay maayong rason nga magmapasalamaton. Si Propesor Robert Emmons sa University of California sa Davis, nag-ingon: “Ang mga nanukiduki bahin sa pagkamapasalamaton nakaingon nga kini makatabang sa mga tawo sa pag-atubang sa mga problema sa adlaw-adlaw, ug ilabina sa tensiyon, ug usab sa paglantaw sa kaugalingon nga bililhon.”

Ang magasing Time naghisgot ug ubang mga kaayohan: “Ang mga tawo nga nag-isip sa ilang kaugalingon nga mapasalamaton . . . mas lagsik ug mas positibo ug panglantaw sa kinabuhi, dili tensiyonado, ug dili kaayo atakehon ug grabeng depresyon.”

Apan makasubo nga ang Bibliya nagtagna nga “sa kataposang mga adlaw,” daghang tawo “magmahigugmaon sa ilang kaugalingon” ug “dili-mapasalamaton.” (2 Timoteo 3:1-5) Unsay himoon sa matuod nga mga Kristohanon aron dili sila matakdan niini nga tinamdan? Ang Awtor sa Bibliya nag-ingon: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.” (Isaias 48:17) Pinaagi sa pagtuman sa mga balaod sa Diyos, kita dili mag-antos sa kaguol sama sa mga tawo nga sobra kaayong nangagpas ug hinakog nga mga pangandoy. Dugang pa, kita gipasaligan nga si Jehova nakakita sa atong mga paningkamot ug kita iyang gantihan. (Hebreohanon 6:10) Tungod niini nga mga kaayohan, matukmod gayod kita sa ‘pagpasalamat kang Jehova.’—Salmo 107:8.