Gidisenyo ba Kini?

Hilo sa Lawalawa

◼ Mas gaan kini kay sa gapas, apan mas lig-on kay sa puthaw. Sa daghang tuig ang mga siyentipiko nanukiduki sa hilo nga ginalalik sa usa ka klase sa lawalawa. Ang hilo nga kumpayotanan niini nga lawalawa​—kinalig-onan sa pito ka matang sa hilo nga malalik niini—​nakakuhag dakong pagtagad. Kini mas lig-on ug dili masuphan ug tubig kay sa hilo nga ginalalik sa mga ulod, nga kasagarang gigamit sa paghimog panapton.

Hunahunaa: Ang paggamag hilo nga sama sa Kevlar kinahanglan ug init kaayo nga temperatura ug organikong pangpatunaw. Sa kasukwahi, ang lawalawa mogamag hilo diha sa normal nga temperatura ug mogamit ug tubig agig pangpatunaw. Dugang pa, ang hilo nga kumpayotanan sa lawalawa mas lig-on kay sa Kevlar. Kon ang balayan sa lawalawa padakoon sama sa nataran sa dulang potbol, kini makapahunong sa naglupad nga dako kaayong ayroplano!

Busa ang mga tigdukiduki naikag sa kalig-on sa hilo nga kumpayotanan sa lawalawa. “Ang mga siyentipiko interesado sa pagsundog sa kalig-on ug sa kagahi niini aron makahimo silag mga butang sama sa tsaliko nga dili madutlag bala ug mga kable sa taytayan,” misulat si Aimee Cunningham sa magasing Science News.

Apan lisod sundogon kining hilo nga kumpayotanan sa lawalawa, kay kini gihimo man sulod sa lawas sa lawalawa ug ang paagi sa paghimo niini wala pa gayod matugkad. “Kini mopabati kanato nga kita wala diay angay ikapanghambog kay daghang utokang mga tawo napakyas sa pagsundog nianang ordinaryong magama sa mga lawalawa sa suok-suok sa atong balay,” matod pa sa biologong si Cheryl Y. Hayashi, nga gikutlo diha sa magasing Chemical & Engineering News.

Unsay imong hunahuna? Ang lawalawa ba ug ang samag-puthaw ka lig-ong hilo niini sulagma lang mitungha, o gidisenyo ba kini sa usa ka intelihenteng Maglalalang?

[Hulagway sa panid 24]

Gipadak-ang hulagway sa hilo nga gipagula sa lawalawa

[Credit Line]

Copyright Dennis Kunkel Microscopy, Inc.