Ang Hunahuna sa Bibliya

Unsa Gayoy Kahulogan sa Pagkaulo Diha sa Kaminyoon?

SA DAGHANG nasod ang mga seremonyas sa kasal kasagarang naglakip sa pagbayloay ug mga panaad diin ang pangasaw-onon manaad nga motuman sa iyang bana. Bisan pa niana, daghang babaye ang dili moangay nga ang ilang bana maoy ilang ulo. Tagda kon unsay gitudlo sa Bibliya bahin niini. Imong makita nga kini balanse ug praktikal.

Panglantaw sa Diyos sa Pagkaulo

Ang paghubit sa Bibliya sa pagkaulo mabasa diha sa Efeso 5:22-24: “Ang mga asawa kinahanglang magpasakop sa ilang mga bana ingon nga sa Ginoo, tungod kay ang bana maoy ulo sa iyang asawa ingon nga si Kristo usab maoy ulo sa  kongregasyon . . . Sa pagkatinuod, ingon nga ang kongregasyon nagapasakop kang Kristo, mao man usab ang mga asawa angay nga magpasakop sa ilang mga bana sa tanang butang.” Ingong “ulo sa iyang asawa,” ang bana maoy manguna sa pamilya, ug ang asawa mosunod sa pagtultol ug motahod sa pagkaulo sa iyang bana.​—Efeso 5:33.

Ang awtoridad sa bana dunay utlanan kay siya kinahanglang magpasakop sa Diyos ug kang Kristo. Wala siyay katungod sa pagdiktar sa iyang asawa sa paglapas sa mga balaod sa Diyos o sa pagkompromiso sa iyang gibansay sa Bibliya nga konsensiya. Apan bisan pa niini nga mga limitasyon, siyay gihatagan sa Diyos ug responsibilidad sa paghimog importanteng mga desisyon sa pamilya.​—Roma 7:2; 1 Corinto 11:3.

Ang Bibliya nagsugo sa bana sa pagpasundayag sa iyang pagkaulo diha sa dili mahakogong paagi, nga unahon ang kaayohan sa iyang asawa kay sa iyang kaugalingong kaayohan. Ang Efeso 5:25 nag-ingon: “Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini.” Ang bana nga nagsunod sa kinalabwang panig-ingnan sa gugma ni Kristo dili maghunahuna sa iyang kaugalingon lamang kon magpasundayag sa iyang pagkaulo.

Dugang pa, ang Bibliya nagtudlo sa bana sa pagpakiglabot sa iyang asawa “sumala sa kahibalo.” (1 Pedro 3:7) Dili lang angayng mahibalo ang bana sa pisikal ug emosyonal nga mga kalainan sa lalaki ug babaye. Siya kinahanglang makasabot usab sa mga panginahanglan sa iyang asawa.

“Siya Imong Kapikas”

Ang pagpasakop ba sa asawa nagpasabot nga siya maghilom na lang? Tagda si Sara, nga gihisgotan sa Bibliya ingong panig-ingnan sa pagkamasinugtanon sa iyang bana nga si Abraham. (1 Pedro 3:5, 6) Siya nagpasakop sa iyang bana maylabot sa dagko ug gagmayng mga butang, sama sa pagbiya sa haruhay nga puy-anan nga magpuyo na lang diha sa mga tolda ug sa pag-andam ug pagkaon nga wala sa panahon. (Genesis 12:5-9; 18:6) Apan may kalabotan sa usa ka seryosong butang, subsob nga iyang gipahayag ang iyang panglantaw nga sukwahi nianang kang Abraham. Kini nahitabo sa dihang buot ni Sara nga palayason ni Abraham ang iyang puyopuyo nga si Hagar ug ang iyang panganay nga si Ismael. Imbes badlongon si Sara, giingnan sa Diyos si Abraham sa ‘pagpamati sa tingog ni Sara.’ Kasamtangan, si Sara padayong nagpasakop kang Abraham pinaagi sa paghulat kang Abraham nga molihok imbes nga magbuot-buot siya sa pagpalayas kang Hagar ug Ismael.​—Genesis 21:8-14.

Ang panig-ingnan ni Sara nagpakita nga imbes nga mora lang siyag tawotawo, ang asawa maoy “kapikas” sa iyang bana, nga angay pasidunggan. (Malaquias 2:14) Ingong kapikas, ang asawa dunay ikasugyot sa paghimog mga desisyon sa pamilya ug may igong awtoridad, kasagaran sa pagdumala sa panimalay ug bisan sa panalapi. Siyempre, ingong ulo sa pamilya, ang bana maoy responsable sa paghimo sa kataposang mga desisyon.​—Proverbio 31:10-31; 1 Timoteo 5:14.

Pagtahod sa Awtor sa Kaminyoon

Gilalang ni Jehova nga Diyos ang lalaki ug babaye, ug iyang gimugna ang kaminyoon ingong sagradong panaghiusa. (Genesis 2:18-24) Iyang espesipikong gihisgotan usab ang mga papel sa bana ug asawa nga makapalipay gayod kanila.​—Deuteronomio 24:5; Proverbio 5:18.

Ingong Tigmugna sa kaminyoon, si Jehova may katungod ug katakos sa pagtakda ug mga sukdanan alang sa kaminyoon. Ang mga magtiayon nga nagtuman sa ilang papel ug nagsunod sa kahikayan sa Diyos sa pagkaulo, dili lang tungod sa pagkapraktikal niini, kondili tungod sa ilang pagtahod sa awtoridad sa Diyos, makabatog pabor ug suporta sa Diyos.

NAKAPAMALANDONG KA BA?

◼ Kinsay nagpakita ug hingpit nga panig-ingnan sa pagkaulo?​—Efeso 5:25.

◼ Gilimitehan ba sa Diyos ang awtoridad sa bana?​—1 Corinto 11:3.

◼ Unsay katuyoan sa kaminyoon ug sa kahikayan sa pagkaulo?​—Proverbio 5:18.

[Hulagway sa panid 28]

Ang pagpasundayag sa pagkaulo sumala sa panig-ingnan ni Kristo moresultag kalipay ug katagbawan sa magtiayon