Gikan sa Among mga Magbabasa

Ang Arka ni Noe ug ang Pagdisenyog mga Barko (Enero 2007) Nahibalo gayod ko nga ang arka talagsaon pagkagama, apan wala ko masayod kon unsa ka maayo kini pagkagama. Tin-aw ang pagkasaysay sa artikulo kon sa unsang paagi ang gitas-on, gilapdon, ug gihabogon sa arka naghimo niini nga luwas nga sakyan. Naghimo kog hulad sa arka uban sa kabataan sa among kongregasyon, nga gisunod ang dayagram nga gipakita. Naghimo sab kamig mga hayop nga papel ug gibutang kini sa sulod sa arka ug nagdrowing ug mga hulagway ni Noe ug sa iyang pamilya. Daghan kamig nakat-onan bahin sa pagkatukod sa arka kay nakasulay kami sa paghimog hulad niini. Daghan kaayong salamat.

T. A., Japan

Ang akong sayis anyos nga anak nga lalaki ganahan maghimog mga hulad. Kami sa akong anak nalipay sa pagkakita sa mga instruksiyon sa paghimog hulad sa arka diha sa kataposang bahin sa artikulo sa Pagmata! Nalingaw kaayo kami niadtong hapona tungod sa inyong nindot nga artikulo! Tungod kay nagkinabuhi man kita niining puliki nga kalibotan ug kay kanunay man nga makaatubang ug mga pagpamit-os sa eskuylahan ang atong gagmayng mga anak, dako gayod nga panalangin nga gitagan-an kita ug mga basahong sama sa Pagmata! nga makatabang sa mga ginikanan sa pagmatuto sa ilang mga anak sa paagi ni Jehova.

M. F., Amerika

Mga Batan-on Nangutana . . . Sa Unsang Paagi Mabuntog Nako Kining Bisyoha? (Nobyembre 2006) Natandog ang akong kasingkasing sa dihang akong nabasa ang artikulo ug nakaamgo nga si Jehova moatiman ug motabang kanato sa pagsulbad sa atong mga problema. Bisag makasala kita pag-usab, si Jehova “andam sa pagpasaylo.” (Salmo 86:5) Ang pagkasayod niini makatabang kanamong mga batan-on sa ‘pagkalagiw gikan sa mga tinguha nga iya sa pagkabatan-on.’​—2 Timoteo 2:22.

V.F.F., Brazil

Mga Batan-on Nangutana . . . Nganong Daghan man Kaayong Lagda? (Disyembre 2006) Ako nagtuon ug Bibliya sulod na sa unom ka tuig. Bisag estrikto kaayo ang akong mga ginikanan kanamo, nahibalo ako nga sila nahingawa gayod kanako. Sa nabasa nako kini nga artikulo, kini nakatabang kanako sa pagsabot sa mga kabalaka sa akong mga ginikanan ug sa pag-apresyar sa pagtagad mismo ni Jehova kanako.

K. T., Thailand

Usa Ako ka Mausikong Anak Kanhi (Disyembre 2006) Ako nakakat-on sa kamatuoran sa 1992. Apan dihay higayon sa akong kinabuhi nga wala ako mosubay sa dalan ni Jehova. Sama ni Meros Sunday, may mga panahon nga nalingaw gayod ako sa akong paagi sa pagkinabuhi apan may mga panahon usab nga dili, ug human sa tulo ka tuig nga wala mag-alagad kang Jehova, nangayo akog tabang kaniya. Karon ako mibalik na kang Jehova! Salamat sa inyong gihimo.

D. K., Ukraine

Mga Batan-on Nangutana . . . Kanus-a Ako Makasugod sa Pagpakigdeyt? (Enero 2007) Ako 15 anyos. Samtang nagduaw ako sa akong iyaan ug uyoan, nakaila nako ang usa ka lalaking Saksi nga 17 anyos. Nagsugod kami sa pag-chat sa Internet, nga sa sinugdan dili pirme. Apan wala magdugay, adlaw-adlaw na kaming nag-estoryahanay, ug kami nagkasuod. Dayon akong nabasa kini nga artikulo ug akong naamgohan nga kami managtrato na diay. Pinaagi sa tabang sa akong mga ginikanan ug sa artikulo sa Pagmata! nakahimo akog maayo kaayong desisyon​—ako siyang gibulagan. Managhigala gihapon kami, apan akong giuna ang akong relasyon kang Jehova. Mapasalamaton kaayo ko nga natabangan ako niini nga artikulo sa pagkaamgo nga nasipyat ko.

D. D., Canada