Pagpaniid sa Kalibotan

◼ “Ang gidaghanon sa mga kalamidad nga gipahinabo sa klima mitriple gikan sa katuigan sa 1970 hangtod sa katuigan sa 1990 tungod tingali sa pag-init sa yuta o kaha sa uban pang hinungdan.”​—THE ECONOMIST, BRITANYA.

◼ Usa ka batang lalaki nga nag-edad ug 10 ka bulan dunay lisensiyadong pusil nga giisyu sa estado sa Illinois, U.S.A. Ang lisensiya gihangyo sa iyang amahan, ug makita diha niana ang gitas-on sa bata nga duha ka piye ug tulo ka pulgada, ug ang iyang gibug-aton nga 20 libra. Ang mga aplikante didto makakuhag lisensiya bisag pila pay edad.​—CABLE NEWS NETWORK, U.S.A.

◼ Ang mga siyentipiko nakahimog yelo gikan sa tubig nga “ang temperatura mas init pa kay sa nagbukal nga tubig.” Gawas pa sa “ordinaryong” yelo, makahimo pag “labing menos 11 ka klaseng yelo gikan sa tubig nga lainlaig temperatura ug presyur.”​—SANDIA NATIONAL LABORATORIES, U.S.A.

Kagawasan sa Relihiyon Gikompirmar sa Georgia

Ang European Court of Human Rights nagpakanaog ug desisyon batok sa gobyerno sa Georgia tungod kay gipasagdan niini nga lutoson ang mga Saksi ni Jehova. Gikompirmar sa korte ang katungod sa mga Saksi ingong Kristohanong relihiyon sa pagtigom alang sa pagsimba ug pagtuon sa Bibliya ug gimandoan ang gobyerno sa pagbayad sa mga biktima sa ilang gasto sa pagpasakag sumbong ug sa ilang pag-antos. Gikan sa Oktubre 1999 hangtod sa Nobyembre 2002, 138 ka beses nga giatake ang mga Saksi ni Jehova ug 784 ka sumbong ang gisang-at ngadto sa mga awtoridad sa Georgia. Apan, wala silay gihimong aksiyon sa mga sumbong. Ang kapolisan midumili gani sa pagresponde dihadiha ug sa pagpanalipod sa mga biktima. Ang kapintasan mikunhod sukad sa Nobyembre 2003.

Karaang Obserbatoryo sa Adlaw sa Peru

Ang mga arkeologo nag-ingon nga ang katingad-anan nga 2,300 ka tuig nga kagun-oban sa Peru dunay obserbatoryo sa adlaw. Ang kagun-oban, nga gitawag ug Chankillo, dunay naglinya nga 13 ka torre sa ibabaw sa bungtod, nga morag mga ngipon kon tan-awon sa layo. Ang mga lantawanan “giposisyon aron inig-tingtugnaw ug ting-init ang adlaw mosubang ug mosalop diha sa nag-atbang nga mga lantawanan, nga pinaagi niini matino kon kanus-a magsugod ang sinugdanan ug tunga-tunga sa tuig,” matod pa sa magasing Science. Sa ubang mga panahon sa tuig, ang adlaw makita nga mosubang ug mosalop diha sa tunga-tunga nga bahin sa mga lantawanan. Kay init man kining dapita, importanteng mahibalo kon kanus-a ang maayong panahon nga mananom, busa “ang mga tawo [kinahanglang] mahibalo sa eksaktong petsa.”

[Diagram/​Hulagway sa panid 29]

(Alang sa aktuwal nga pagkahan-ay, tan-awa ang publikasyon)

June solstice

Equinox

December solstice

Observatory

[Credit Line]

REUTERS/​Ivan Ghezzi/​Handout

Mga Hulagway nga Makapalaig Buot sa mga Babaye

“Ang mga babaye dili ganahan sa ilang lawas bisag unsa pay ilang gidak-on, korte, gitas-on, o edad kon makakita silag mga hulagway sa guwapa ug niwang kaayong mga babaye sa hapin sa mga magasin.” Mao kanay report sa University of Missouri-Columbia, sa Amerika. Sumala kang Laurie Mintz, usa sa mga propesor sa edukasyon ug sikolohiya, “gituohan nga ang tambok nga mga babaye mas lainan sa ilang lawas kay sa niwang nga mga babaye human makakitag mga hulagway sa niwang nga mga babaye diha sa TV ug mga magasin.” Apan, “among nakita nga dili lang tambok nga mga babaye ang lainan sa ilang lawas, kondili bisag kinsa nga makakita niining mga hulagwaya.” miingon si Mintz.