Ang Hunahuna sa Bibliya

Pasayloon ba sa Diyos ang Bug-at nga mga Sala?

ANG pagkamaluluy-on maoy usa sa pangunang mga hiyas sa Diyos. (Salmo 86:15) Unsa ka dako ang iyang kaluoy? Usa ka salmista misulat: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog? Kay ang matuod nga pagpasaylo anaa kanimo, aron nga ikaw kahadlokan.” (Salmo 130:3, 4) Laing teksto nag-ingon: “Ingon sa pagkalayo sa sidlakan gikan sa kasadpan, sa mao nga gilay-on iyang gipahilayo gikan kanato ang atong mga kalapasan. Ingon sa usa ka amahan nga magapakitag kaluoy sa iyang mga anak, si Jehova nagpakitag kaluoy kanila nga nahadlok kaniya. Kay siya nahibalo pag-ayo sa atong pagkaumol, nga nahinumdom nga kita abog.”​—Salmo 103:12-14.

Dayag nga si Jehova bug-os ug madagayaong mopasaylo, ug iyang gihunahuna nga kita dunay mga kakulangan ug dili hingpit, ug nga kita “abog.” Tagda ang pipila ka pananglitan diha sa Bibliya nga nagpasundayag kon unsa ka dako ang kaluoy sa Diyos.

Tulo ka beses nga gilimod ni apostol Pedro si Kristo. (Marcos 14:66-72) Sa dili pa magtutuo si apostol Pablo, iyang gilutos ang mga sumusunod ni Kristo. Sa dihang patyon na unta ang uban kanila, si Pablo wala motutol. Miuyon pa gani siya sa dihang gipatay ang usa kanila. (Buhat 8:1, 3; 9:1, 2, 11; 26:10, 11; Galacia 1:13) Sa wala pa mahimong mga Kristohanon, ang ubang mga membro sa kongregasyon sa Corinto mga palahubog, mangingilkil, ug mga kawatan. (1 Corinto 6:9-11) Apan silang tanan sa ulahi nakabaton sa pabor sa Diyos. Nganong gipasaylo man sila sa Diyos?

Tulo ka Lakang Aron Kaluy-an sa Diyos

“Ako gipakitaan ug kaluoy, tungod kay ako walay alamag ug milihok uban ang kawalay-pagtuo,” misulat si Pablo. (1 Timoteo 1:13) Ang iyang prangka nga mga pulong nagpahayag sa unang lakang nga gikinahanglan aron mapasaylo sa Diyos​—pagbaton ug tukmang kahibalo bahin kang Jehova ug sa iyang mga sukdanan nga gipahayag sa Bibliya. (2 Timoteo 3:16, 17) Sa pagkatinuod, dili nato mapahimut-an  ang atong Maglalalang kon kulang kita ug kahibalo bahin kaniya. “Kini nagkahulogan ug kinabuhing walay kataposan,” miingon si Jesus diha sa iyang pag-ampo ngadto sa iyang Amahan, “ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

Sa dihang ang mga matinud-anog kasingkasing makabaton na niana nga kahibalo, sila tim-os nga magbasol sa ilang mga kasaypanan nga nahimo kaniadto ug mopalihok kanila sa kinasingkasing nga paghinulsol. Kana ang ikaduhang lakang aron mapasaylo sa Diyos. Ang Buhat 3:19 nag-ingon: “Busa, paghinulsol kamo, ug pamalik kamo aron mapapas ang inyong mga sala.”

Gihisgotan usab niana nga teksto ang ikatulo nga lakang​—ang pagbalik. Kini nagkahulogan ug pagbiya sa kanhing mga buhat ug tinamdan ug sa pagdawat sa mga sukdanan ug panglantaw sa Diyos. (Buhat 26:20) Sa ato pa, sa dihang ang usa ka tawo mangayog pasaylo sa Diyos, iyang pamatud-an ang iyang pagkasinsero pinaagi sa pagbag-o sa iyang kinabuhi.

Ang Diyos Dili Magpasaylo sa Tanang Panahon

Ang sala sa ubang mga tawo dili mapasaylo sa Diyos. Si Pablo misulat: “Kon kita tinuyo nga magpakasala human makadawat sa tukmang kahibalo sa kamatuoran, wala nay halad nga nahibilin alang sa sala, apan may usa ka makahahadlok nga pagpaabot sa paghukom [sa kalaglagan].” (Hebreohanon 10:26, 27) Ang mga pulong nga “tinuyo nga magpakasala” nagpasabot ug dulot nga pagkadaotan, nga ang kasingkasing daotan gayod.

Ingon niana ug kasingkasing si Judas Iscariote. “Mas maayo pa unta alang kaniya kon siya wala matawo,” matod pa ni Jesus. (Mateo 26:24, 25) Ug bahin sa ubang mga lider sa relihiyon sa iyang panahon, si Jesus miingon: “Kamo gikan sa inyong amahan nga Yawa . . . Inigsulti niya sa bakak, siya nagsulti sumala sa iyang kinaiya, tungod kay siya usa ka bakakon ug ang amahan sa bakak.” (Juan 8:44) Sama ni Satanas, ang kailadmang pagkatawo niadtong mga tawhana hilabihan gayod ka daotan. Wala lang sa ila ang ilang nahimo apan misamot hinuon sila sa pagkadaotan. a Tinuod, tungod sa pagkadili-hingpit ug kahuyangan, bisan ang tinuod nga mga Kristohanon makahimo usahay ug bug-at nga sala. Apan dili buot ipasabot nga bisag nakahimo sila ug kasaypanan daotan na gayod sila.​—Galacia 6:1.

Maluluy-on Hangtod sa Kataposan

Dili lang ang sala ang tan-awon ni Jehova kondili ang tinamdan usab sa nakasala. (Isaias 1:16-19) Palandonga sa makadiyot ang duha ka mamumuhat ug daotan nga gilansang tapad ni Jesus. Klaro nga silang duha nakahimog bug-at nga sala kay ang usa kanila miadmitir: “Kita nagadawat sa bug-os kon unsay takos nato tungod sa mga butang nga atong gibuhat; apan kining tawhana [si Jesus] walay gibuhat nga daotan.” Ang mga pulong sa mamumuhat ug daotan nagpakita nga may nahibaloan siya bahin kang Jesus. Ug ang maong kahibalo tingali nakatabang sa pagbag-o sa iyang tinamdan. Gipakita kini sa iyang sunod nga gisulti, ug niining higayona siya nagpakiluoy kang Jesus: “Hinumdomi ako sa dihang moabot ka na sa imong gingharian.” Unsay tubag ni Kristo sa iyang kinasingkasing nga hangyo? “Sa pagkatinuod ako magaingon kanimo karong adlawa,” siya miingon, “Ikaw makauban nako sa Paraiso.”​—Lucas 23:41-43.

Hunahunaa: Usa sa kataposang mga pulong ni Jesus dinhi sa yuta maoy mga pulong sa kaluoy ngadto sa usa ka tawong miangkon nga siya takos sa silot nga kamatayon. Makapadasig gayod kana! Busa makasalig kita nga si Jesu-Kristo ug ang iyang Amahan, si Jehova, magpakitag kaluoy sa tanang magpasundayag ug kinasingkasing nga paghinulsol bisag unsa pay ilang sala kaniadto.​—Roma 4:7.

[Footnote]

NAKAPAMALANDONG KA BA?

◼ Giunsa paghubit ang kaluoy sa Diyos?​—Salmo 103:12-14; 130:3, 4.

◼ Unsang mga lakang ang kinahanglang himoon sa tawo aron mabatonan ang pabor sa Diyos?​—Juan 17:3; Buhat 3:19.

◼ Unsay gisaad ni Jesus sa mamumuhat ug daotan nga gilansang?​—Lucas 23:43.

[Hulagway sa panid 10]

Gipakita ni Jesus nga mapasaylo ang bug-at nga mga sala