Sa Dili Madugay ang Krimen “Mawala Na”
Sa Dili Madugay ang Krimen “Mawala Na”
“Sa dili na madugay, ug ang daotan mawala na.”—SALMO 37:10.
ANG atong Maglalalang, si Jehova nga Diyos, interesado gayod sa mga tawo nga iyang gilalang; siya dili halayo sa mga tawo, sama sa gituohan sa uban. (Salmo 11:4, 5) Dugang pa, iyang makita ang matag krimen ug inhustisya, lakip na nianang dili makita sa tawo. “Ang mga mata ni Jehova anaa sa tanang dapit, nga nagpadayon pagbantay sa mga daotan ug sa mga maayo.” (Proverbio 15:3) Busa makasalig ka nga ang mga daotan anaa gayod sa “madanglog nga dapit.”—Salmo 73:12, 18.
Apan ang mga tawong matarong ug matul-id, bisag kabos ug dinaogdaog, adunay makapalipay nga palaaboton. “Bantayi ang walay-ikasaway ug tan-awa kanunay ang matul-id,” misulat ang salmista nga si David, “kay ang kaugmaon nianang tawhana maoy malinawon.” (Salmo 37:37) Kining mga pulonga makahatag ug dakong kahupayan kanato karon, kay naglaom kita nga atong makita ang katumanan niini sa tibuok kalibotan sa dili na madugay.
Kita Nagkinabuhi sa Kataposang mga Adlaw
Mga 2,000 ka tuig kanhi, ang gipangutana sa mga tinun-an ni Jesu-Kristo kaniya dakog kahulogan hangtod sa atong panahon karon. “Sultihi kami,” matod pa nila, “unsa man unya ang ilhanan sa . . . kataposan sa sistema sa mga butang?” (Mateo 24:3) Ang detalyadong tubag ni Jesus mabasa diha sa Bibliya sa Mateo kapitulo 24, Marcos kapitulo 13, ug Lucas kapitulo 21. Kining tulo ka asoy sa Ebanghelyo nag-ingon nga ang ilhanan sa kataposang mga adlaw niining presenteng kalibotan mao ang mga gubat, kagutom, sakit, dagkong mga linog, ug pagdagsang sa kalapasan.
Kining malisod nga mga kahimtang nga gitagna ni Jesus nagsugod niadtong 1914. Sumala pa sa giingon sa historyanong si Eric Hobsbawm diha sa iyang librong Age of Extremes, ang ika-20ng siglo “mao ang kinadaghanag nangamatay gumikan sa pagpamatay.”
Mahitungod sa pagdagsang sa pagkadaotan, ang Bibliya nag-ingon: “Sa dihang ang mga daotan manurok ingon sa katanoman ug molambo ang tanang mamumuhat sa butang nga makadaot, kini mao nga sila pagalaglagon hangtod sa kahangtoran.” (Salmo 92:7) Oo, klaro ang pamatuod: Ang pagdagsang sa kalapasan karon—sama sa pagturok sa mga tanom sa tiempo niini—sa pagkatinuod maoy ilhanan nga hapit nang laglagon ang mga daotan! Dili ba maayong balita kana?—2 Pedro 3:7.
“Ang mga Matarong Magapanag-iya sa Yuta”
“Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran,” nag-ingon ang Salmo 37:29. Mawala na ang tanang matang sa krimen ug inhustisya. Busa mawala na usab ang tanang butang nga may kalambigitan sa krimen: mga alarma, kandado, korte, abogado, polis, ug mga prisohan. Ang Bibliya nagsaad: “Ang unang mga butang dili na pagahinumdoman, ni kini sila motungha pa sa kasingkasing.”—Isaias 65:17.
Oo, ang yuta ug ang tawhanong katilingban mabag-o sa paagi nga wala pa mahitabo sukad. (Isaias 11:9; 2 Pedro 3:13) Kana ang lig-ong paglaom sa mga Saksi ni Jehova, ug ila kang gidapit sa pagsusi mismo niini aron imong mapamatud-an nga kini mahitabo sa dili na madugay. Timan-i, ang Usa nga nag-inspirar sa Balaang Kasulatan ‘dili mamakak.’—Tito 1:2.
[Kahon/Hulagway sa panid 9]
ESPIRITUWAL NGA TABANG ALANG SA MGA PINIRISO
Ang mga Saksi ni Jehova sa Amerika nakadawat ug mga sulat gikan sa mga piniriso sa 4,169 ka prisohan, ospital, ug mga sentro sa rehabilitasyon sulod sa daghang tuig. Ang ubang mga piniriso nangayog literatura sa Bibliya; ang uban mihangyo ug libreng pagtuon sa Bibliya. Kining mga tawhana gikontak sa kuwalipikadong mga Saksi. Gani, ang mga Saksi sa tibuok kalibotan nagaduaw sa mga prisohan sa pagdumalag mga pagtuon sa Bibliya sa mga lalaki ug babayeng piniriso nga nangayog espirituwal nga tabang. Daghan kanila nakahimog talagsaong mga kausaban sa ilang personalidad, nabawtismohan ingong mga Kristohanon, ug nagmasinundanon sa balaod.