Ang Hunahuna sa Bibliya

Ang mga Patuotuo Nahiuyon ba sa Pagtulon-an sa Bibliya?

USA ka tuig nga dili mosakayg ayroplano ang usa ka magsusulat kay giingnan siya sa mananag-an nga mamatay siya sa aksidente sa ayroplano. Ang tanang klase sa tawo sama sa mga politiko, negosyante, artista, atleta, ug mga estudyante sa kolehiyo motuo ug patuotuo. Sa dihang magduhaduha, sa dihang mabalaka, o sa panahon nga dunay problema, sila nagtuo nga malayo sila sa kadaot o kaha matuman ang ilang mga pangandoy kon mosunod sila sa mga patuotuo.

Daghang matang sa patuotuo giisip nga makahatag ug tawhay nga panghunahuna. Ang anhing antropologo nga si Margaret Mead miingon: “Ang pagtuo ug patuotuo nagpabanaag sa atong dakong tinguha nga unta matuman ang atong pangandoy ug nga unta walay daotang mahitabo kanato. Ang pagtuo ug gamay sa patuotuo makahatag ug tawhay nga panghunahuna kay medyo nagtuo ka nga matuman ang imong gipangandoy ug sa samang panahon dili ka makaingon nga naulipon ka niini.” Bisan pa niana, kadtong nagtinguha sa pagpahimuot sa Diyos angayng mangutana sa ilang kaugalingon, ‘Angay bang tuohan sa mga Kristohanon ang mga patuotuo?’

Kon Diin Gikan ang Patuotuo

Ang mga tawo gihasol sa kahadlok​—kahadlok nga mamatay, kahadlok bahin sa wala mahibaloi, ug sa giingon nga Laing Kalibotan, ug uban pa. Ang rebeldeng magsusupak sa Diyos nga si Satanas naglungot-lungot sa pag-ulipon sa mga tawo, ug iyang gihalingan ang ilang kahadlok pinaagig kabakakan. (Juan 8:44; Pinadayag 12:9) Wala mag-inusara si Satanas sa iyang pagpaningkamot sa pagtental sa mga tawo. Diha sa Bibliya, si Satanas  gitawag nga “magmamando sa mga demonyo.” (Mateo 12:24-27) Kinsa ang mga demonyo? Sa panahon ni Noe, daghang manulonda mianib kang Satanas sa iyang pagrebelde batok sa Diyos ug naghimo sa ilang kaugalingon nga mga demonyo. Sukad niadto, sila naningkamot sa pag-impluwensiya sa hunahuna sa mga tawo. Usa sa ilang gigamit mao ang patuotuo.​—Genesis 6:1, 2; Lucas 8:2, 30; Judas 6.

Usa sa mga kabakakan ni Satanas nahimong basehanan sa patuotuo. Kini mao ang pagtuo nga dunay dili makitang bahin sa lawas nga magpabiling buhi inigkamatay sa lawas ug mahimong mobalik sa pagtabang o pagsakit sa mga buhi. Apan ang Bibliya nag-ingon: “Bahin sa mga patay, sila walay nahibaloan nga bisan unsa.” Kini dugang miingon nga “walay buluhaton ni lalang ni kahibalo ni kaalam” inigkamatay sa tawo.​—Ecclesiastes 9:5, 10.

“Dulumtanan Kang Jehova”

Daghang tawo nagtuo sa kabakakan ni Satanas. Apan sa dugay na kaayong panahon, ang Diyos naghatag sa mga Israelinhon nga iyang katawhan ug tin-awng instruksiyon bahin niini. Ang iyang Pulong nag-ingon: “Walay makaplagan diha kanimo nga . . . bisan kinsa nga nagapanag-an, usa ka salamangkero o bisan kinsa nga nagapangitag mga tilimad-on o usa nga barangan, o usa nga tigpangdaot o bisan kinsa nga nagakonsultag espiritista o tigpanagna sa mga hitabo o bisan kinsa nga nagapakisayod sa mga patay. Kay bisan kinsa nga nagabuhat niining mga butanga dulumtanan kang Jehova.”​—Deuteronomio 18:10-12.

Ikasubo, may mga panahon nga wala mamati ang mga Israelinhon niining pasidaana. Pananglitan, sa panahon ni manalagnang Isaias, ang uban nagtuo nga modaghan ang ani kon maghalad sila sa “diyos sa Suwerte”​—usa ka patuotuo nga miresultag dili maayo. Si Jehova nasuko kanila ug busa wala sila panalangini.​—Isaias 65:11, 12.

Ang tinamdan ni Jehova bahin sa patuotuo wala mausab sa natukod ang Kristohanong paagi sa pagsimba. Giawhag ni apostol Pablo ang mga matuotuohon sa siyudad sa Listra ‘sa pagbiya gikan niining walay kapuslanang mga butang [“mga patuotuo,” The Emphatic Diaglott] ug sa pagdangop ngadto sa buhing Diyos, nga maoy nagbuhat sa langit ug sa yuta ug sa dagat ug sa tanang butang diha niana.’​—Buhat 14:15.

Paglingkawas Gikan sa Patuotuo

Daghan kaayo ang patuotuo, apan ang tinuod kining tanan dili makataronganon. Ang patuotuo makapahunahuna sa mga tawo nga wala silay suwerte kon may mahitabong daotan kanila imbes modawat nga sila ray nakaingon sa nahitabo kanila.

Maayo na lang kay daghan na ang nakalingkawas gikan sa mga patuotuo. Si Jesus miingon: “Kamo mahibalo sa kamatuoran, ug ang kamatuoran magpagawas kaninyo.” (Juan 8:32) Si Clementina, nga usa ka mananag-an sa Brazil sulod sa 25 ka tuig, miingon: “Ang pagpanag-an ray akong pangabuhian kaniadto. Apan tungod sa kamatuoran sa Bibliya, ako nakalingkawas gikan sa mga patuotuo.” Sa pagkatinuod, ang regular nga pagtuon sa Bibliya ug kinasingkasing nga pag-ampo kang Jehova nga Diyos makatabang kanato sa pagbaton ug malig-on nga espiritu. Kini makahatag kanato ug tawhay nga kaisipan nga makatabang kanato sa paghimog maayong mga desisyon nga makapalikay kanato sa kadaot ug makaalibyo sa kabalaka.​—Filipos 4:6, 7, 13.

Ang Bibliya nangutana: “Aduna bay pakig-ambitay ang kahayag uban sa kangitngit? Dugang pa, aduna bay panag-uyon tali kang Kristo ug Belial [Satanas]?” Busa ang matuod nga mga Kristohanon angay gayong maglikay sa mga patuotuo.​—2 Corinto 6:14-16.

NAKAPAMALANDONG KA BA?

◼ Imbes mosalig sa Diyos, kang kinsa misalig ang matuotuohong mga Israelinhon sa panahon ni Isaias?​—Isaias 65:11, 12.

◼ Unsay giawhag ni apostol Pablo nga himoon sa mga matuotuohon sa Listra?​—Buhat 14:15.

◼ Angay bang tuohan sa tinuod nga mga Kristohanon ang mga patuotuo?​—2 Corinto 6:14-16.

[Mga hulagway sa panid 10]

Tungod sa patuotuo ang tawo maghunahuna nga may proteksiyon kono siya batok sa daotang mga hitabo