Gikan sa Among mga Magbabasa

Pagtabang sa mga Batan-on sa Pagsagubang (Marso 2007) Ingong batan-on nga 18 anyos, nakasabot ako sa mga punto nga gihisgotan niini bahin sa paggamit ug cell phone ug Internet. Nakig-estorya ako sa mga tawong dili nako kaila diha sa Internet. Wala magdugay tungod sa pagpakig-estorya nako sa mga dili maayog moral nabanlod ako sa kadaot. Ang akong espirituwalidad nadaot dihadiha. Misugot ako sa pagpakigkita niining mga tawhana. Sa pagkaalaot, nakasala ako. Hinaot nga kining artikuloha makatabang sa uban sa paglikay sa kasakit ug kaguol nga akong giantos. Nalisdan ako kay dili ako makatulog magabii ug ang daotan nakong nahimo nakatugaw kanako adlaw-adlaw, apan determinado ako nga dili magpadaog kang Satanas.

B. R., Amerika

Nganong Ako Makuyapan? (Abril 2007) Abi nakog ako ray nag-antos niining sakita. Kini nga artikulo nagpabati kanako nga daw si Jehova direktang nakigsulti kanako, nga nag-ingon nako, “Nakasabot ko sa imong gibati, busa aniay pangpadasig kanimo.”

I. R., Madagascar

Usa ka Butang nga Mas Malungtaron kay sa Arte (Abril 2007) Mapasalamaton kaayo ako niining artikuloha. Nagdumala ako ug duha ka estudio sulod sa unom ka tuig. Ganahan kaayo ko sa akong trabaho kay akong mapasundayag ang akong abilidad sa arte pinaagi niini. Apan nakamatikod ako nga samtang nagmalamposon ug nagkapopular ako, ang akong pag-alagad kang Jehova nagkaluya. Okupado kaayo ako sa akong trabaho ug wala na kaayoy panahon sa uban pang mga butang. Nahibalo ako nga kinahanglang magbag-o ako. Busa akong gibiyaan ang akong trabaho ug nagmapuliki sa akong pagsimba. Ang katagbawan ug kalipay sa pagkuhag matahom nga mga letrato dili gayod ikatandi sa kalipay nga akong natagamtam diha sa Kristohanong pag-alagad.

A. P., Amerika

Mga Batan-on Nangutana . . . Siya ba ang Angay Nakong Minyoan? (Mayo 2007) Akong namatikdan nga nahigugma na diay ako sa usa ka tawo nga abi nakog angay para nako. Apan human mabasa ang artikulo, akong nadiskobrehan nga ang mga hiyas nga akong nagustohan kaniya dili diay hinungdanon kaayo. Ang artikulo nakatabang kanako sa pagkaamgo nga ang espirituwal nga mga hiyas ug ang iyang pagtratar sa uban ang hinungdanon. Nagpasalamat ako kang Jehova sa mga artikulo nga sama niini nga nagtaganag giya ug praktikal nga tambag alang kanamong mga batan-on.

E. P., Amerika

Himamata ang Katawhan sa East Timor (Mayo 2007) Nalingaw kaayo ako sa pagbasa niining artikuloha. Akong nadunggan kining nasora sa unang higayon sa dihang nabalita nga dunay mga rayot didto. Sukad niadto nabalaka ako kon unsay kahimtang sa mga tawo sa East Timor ug kon sa unsang paagi naapektohan ang pagsangyaw sa mga Saksi ni Jehova didto. Nakurat ako sa disposisyon niining mga tawhana, kinsa wala magpadaog sa lisod kaayong kahimtang didto, apan nagpadayon gihapon sa ilang pagkinabuhi sa adlaw-adlaw. Dili gayod nako malimtan ang determinasyon sa mga tawo sa East Timor ug ang dagkong mga pahiyom ni Jacob ug sa iyang pamilya.

Y. M., Japan