Kon Unsaon Pagpangita ang Tinuod nga Relihiyon

‘Kon tinuod nga dunay kamatuoran gikan sa Diyos, nganong mangita pa man ko niini?’ tingali ang uban mangutana. ‘Kon ang Diyos dunay importanteng mensahe alang sa tanang tawo, dili ba ipadayag niya kini sa klarong paagi aron kini masabtan dayon sa mga tawo ug dili na sila kinahanglang mosusi pa niini?’

SIYEMPRE mahimo kini sa Diyos! Apan kini ba ang iyang paagi sa pagpadayag sa kamatuoran?

Ang Paagi sa Diyos sa Pagpadayag sa Kamatuoran

Ang tinuod, ang Diyos nagpadayag sa iyang mga mensahe sa paagi nga kini makaplagan sa mga sinserong nangita sa kamatuoran. (Salmo 14:2) Tagda ang mensahe nga gipadayag sa Diyos pinaagi sa iyang manalagna nga si Jeremias gatosan ka tuig nang milabay. Mensahe kini para sa rebelyosong katawhan sa Diyos bahin sa nagsingabot nga kalaglagan sa Jerusalem sa kamot sa mga taga-Babilonya.​—Jeremias 25:8-11; 52:12-14.

Apan sa samang higayon, ang ubang mga manalagna nangangkon nga ang ilang mensahe gikan usab sa Diyos. Si Hananias nagtagna nga magmalinawon unya ang Jerusalem. Lahi kaayo kini sa mensahe ni Jeremias. Busa kinsa may tuohan sa mga tawo niadtong panahona​—si Jeremias o kadtong lahig gitagna?​—Jeremias 23:16, 17; 28:1, 2, 10-17.

Aron mahibaloan kon kinsay husto, kinahanglang mailhan pag-ayo sa sinserong mga Hudiyo si Jehova. Kinahanglang makasabot sila sa iyang mga balaod ug prinsipyo, maingon man sa iyang panglantaw sa daotang buhat. Kay kon mao, wala unta sila mosupak sa gisulti sa Diyos pinaagi kang Jeremias nga ‘wala gayoy tawo nga naghinulsol sa iyang pagkadaotan.’ (Jeremias 8:5-7) Dugang pa, makapanan-aw unta sila nga kining makasubong kahimtang moresulta ug kalaglagan sa Jerusalem ug sa mga molupyo niini.​—Deuteronomio 28:15-68; Jeremias 52:4-14.

Ang mga tagna ni Jeremias bahin sa Jerusalem natuman. Gilaglag sa mga Babilonyanhon ang siyudad niadtong 607 W.K.P.

Bisag dugay nang gitagna ang mga sangpotanan sa ilang pagrebelde, kinahanglang may himoon sila aron makahibalo sila nga miabot na ang panahon sa pagpahamtang sa Diyos sa iyang paghukom.

Komosta ang Kamatuoran sa Kristohanong Panahon?

Komosta ang kamatuoran nga giwali ni Jesu-Kristo? Gidawat ba kini sa tanan ingong mensahe gikan sa Diyos? Wala. Bisag anaa mismo si Jesus taliwala sa katawhan sa Israel nga nagtudlo kanila ug naghimog mga milagro, ang kadaghanan sa iyang mga mamiminaw wala motuo nga siya ang gitagna nga Mesiyas​—ang Kristo, o ang Dinihogan.

Ang mga Pariseo nangutana kang Jesus kon kanus-a moabot ang Gingharian sa Diyos. Kini ang iyang tubag: “Ang gingharian sa Diyos dili moabot uban ang talagsaong pagkadayag.” Siya  midugang: “Ang gingharian sa Diyos anaa sa inyong taliwala.” (Lucas 17:20, 21) Si Jesus, ang tinudlo nga Magmamando sa Diyos, anaa sa ilang taliwala! Apan ang mga Pariseo midumili sa pagtuo sa pamatuod nga siya ang gitagna nga Mesiyas ug sa pagdawat kaniya ingong “ang Kristo, ang Anak sa Diyos nga buhi.”​—Mateo 16:16.

Ingon usab niana ang reaksiyon sa mga tawo sa kamatuoran nga gisangyaw sa mga tinun-an ni Kristo sa unang siglo. Bisag daghan pa ang milagro sa pagpamatuod nga nagpaluyo ang Diyos sa mga tinun-an, ang kadaghanan naglisod gihapon sa pagsabot sa kamatuoran. (Buhat 8:1-8; 9:32-41) Gisugo ni Jesus ang iyang mga sumusunod sa “paghimog mga tinun-an sa katawhan” pinaagi sa pagtudlo kanila. Tungod sa pagpamati ug pagtuon sa mga kamatuoran diha sa Kasulatan, ang sinserong nangita sa kamatuoran nahimong mga magtutuo.​—Mateo 28:19; Buhat 5:42; 17:2-4, 32-34.

Ingon usab niana ang kahimtang karon. ‘Ang maayong balita sa gingharian giwali sa tibuok gipuy-ang yuta ingon nga pagpamatuod ngadto sa tanang kanasoran.’ (Mateo 24:14) Wala na duyogi ug mga milagro karon ang pagsangyaw sa kamatuoran sa pagpamatuod sa matag tawo sa yuta nga mensahe kini gikan sa Diyos. Apan, ang kamatuoran sa Diyos dili lisod sabton alang sa mga tawong matinud-anog kasingkasing nga buot mosimba sa Diyos sa paagi nga dalawaton kaniya.​—Juan 10:4, 27.

Ang imong pagbasa niining magasina bahin sa Bibliya nagpakita nga tingali ikaw sinserong nangita sa kamatuoran. Sa unsang paagi mahibalo ka kon unsang relihiyona ang nagtudlo niini?

Ang Epektibong Paagi

Gihatagag komendasyon ni apostol Pablo ang ubang mga molupyo sa Berea niadtong unang siglo tungod sa ilang reaksiyon sa iyang gitudlo kanila. Wala dayon sila motuo sa giingon ni Pablo nga kamatuoran; apan sila matinahorong namati. May makat-onan kita sa gihimo sa mga taga-Berea human makadungog sa mensahe.

Matikdi nga ang Bibliya nag-ingon: “Karon ang [mga taga-Berea] mas hamilig-hunahuna kay niadtong sa Tesalonica, kay ila mang gidawat ang pulong uban ang tumang kaikag sa hunahuna, nga sa adlaw-adlaw maampingong nagasusi sa Kasulatan kon tinuod ba kining mga butanga. Busa daghan kanila ang nahimong mga magtutuo.” (Buhat 17:10-12) Sa pagkamatuod, sila nagsusi gayod ug maayo. Dili sila kontento sa usa o duha lang ka pagpakig-estorya uban kang Pablo.

Matikdi usab nga ang mga taga-Berea ‘midawat sa pulong uban ang tumang kaikag sa hunahuna.’ Kini nagpakita kanato kon unsay ilang tinamdan sa pagtuon sa Kasulatan. Dili sila daling patuohon, apan dili usab sila panatiko. Dili sila mapangitaon ug sayop sa gipatin-aw kanila ni Pablo, nga maoy nagpadayag sa mensahe sa Diyos.

Hunahunaa usab kini: Ang mga taga-Berea nakadungog bahin sa Kristohanong pagtulon-an  sa unang higayon. Nindot ang ilang nadunggan apan lisod tingaling tuohan. Imbes isalikway kini, ila hinuong gitun-an pag-ayo ang Kasulatan, nga nagsusi ‘kon tinuod ba ang mga butang nga gitudlo ni Pablo.’ Matikdi usab nga ang mga taga-Berea ug taga-Tesalonica nga nagkugi sa pagtuon nahimong mga magtutuo. (Buhat 17:4, 12) Wala sila moangka ug moingon nga dili makaplagan ang kamatuoran. Ilang nakaplagan ang tinuod nga relihiyon.

Ang Epekto sa Kamatuoran Diha sa mga Tawo

Sa dihang makaplagan sa usa ka tawo ang kamatuoran, sama sa mga taga-Berea, siya dili makapugong sa pagpaambit niini nga malipayon. Tingali ang uban dili mouyon niini, sa pagtuo nga mapaubsanon ang tawong maghunahuna nga husto usab ang ubang relihiyon. Apan, sa dihang makaplagan sa usa ka tawo ang kamatuoran sa Bibliya, siya makombinsir gayod nga kini na ang kamatuoran. Dili na siya magduhaduha kon makaplagan ba ang kamatuoran o kon ang tanang relihiyon ba motultol sa kaluwasan. Apan, ang pagpangita sa kamatuoran nagkinahanglag kinasingkasing nga pagsusi ug pagkamapaubsanon.

Mao kanay gihimo sa mga Saksi ni Jehova. Maoy hinungdan nga nagtuo sila nga nakita na nila ang tinuod nga relihiyon. Ug gidapit ka nila sa pagsusi sa Kasulatan aron imong mahibaloan kon kinsay nagsubay sa tinuod nga relihiyon karon. Bisan tuod daghan pa ang nalangkit kay sa ordinaryong listahan sa mga punto nga angay tagdon, ang impormasyon bahin sa mga Kristohanon sa unang siglo, nga makita diha sa kahon niini nga panid makatabang kanimo sa imong himoong pagsusi.

Pinaagi sa pagdawat sa tanyag sa mga Saksi ni Jehova nga libreng pagtuon sa Bibliya diha sa balay, imong masusi pag-ayo kon unsa gayoy gitudlo sa Bibliya. Ang pagkahibalo niini makatabang kanimo sa pag-ila sa tinuod nga relihiyon.

[Kahon sa panid 9]

Mga Ilhanan sa Tinuod nga Relihiyon

Tagda ang mga tulumanon ug pagtulon-an sa mga Kristohanon sa unang siglo:

◼ Sila nagtuo gayod sa Pulong sa Diyos ingong ilang giya.​—2 Timoteo 3:16; 2 Pedro 1:21.

◼ Sila nagtudlo nga si Jesus Anak sa Diyos, nga lahi sa Diyos ug ubos kay Kaniya.​—1 Corinto 11:3; 1 Pedro 1:3.

◼ Sila nagtudlo nga ang mga patay mabuhi pag-usab pinaagi sa pagkabanhaw sa umaabot.​—Buhat 24:15.

◼ Sila gibantog sa ilang gugma sa usag-usag.​—Juan 13:34, 35.

◼ Sila wala mag-iyahay sa pagsimba apan naorganisar ingong mga kongregasyon ug nahiusa ilalom sa mga magtatan-aw ug sa usa ka nagadumalang grupo sa mga ansiyano nga nagtahod kang Jesus ingong ilang Ulo.​—Buhat 14:21-23; 15:1-31; Efeso 1:22; 1 Timoteo 3:1-13.

◼ Sila madasigong nagwali sa Gingharian sa Diyos ingong bugtong paglaom sa tawo.​—Mateo 24:14; 28:19, 20; Buhat 1:8.

[Hulagway sa panid 7]

Sa unsang paagi nahibaloan sa mga tawo nga tinuod nga manalagna si Jeremias, kay ang uban lahi man ug gitagna?

[Mga hulagway sa panid 8, 9]

Ang mga taga-Berea sa unang siglo namati kang Pablo apan ila usab nga gisusi ang Kasulatan sa pagtino nga tinuod ang iyang mensahe

[Hulagway sa panid 8, 9]

Ang detalyadong pagtuon sa Bibliya makatabang kanimo sa pag-ila sa tinuod nga relihiyon