Pagpaniid sa Kalibotan

◼ Sa usa ka surbi sa Amerika, “gitaho nga 29 porsiyento sa mga lalaki nakadulog ug 15 o kapin pang mga babaye sa ilang tibuok kinabuhi kon ikomparar sa 9 porsiyento sa mga babaye nga nakadulog ug 15 o kapin pang mga lalaki sa ilang tibuok kinabuhi.”​—CENTERS FOR DISEASE CONTROL AND PREVENTION, U.S.A.

◼ Sa Gresya, “62 porsiyento sa kabataan nga wala pay 16 anyos miadmitir nga nakakitag pornograpikong materyal diha sa ilang mga cell phone.”​—ELEFTHEROTYPIA, GRESYA.

◼ Sa Britanya, 82 porsiyento sa gisurbing mga tawo nag-ingon nga “relihiyon ang nakaingon sa panagbahin-bahin ug tensiyon.”​—THE GUARDIAN, BRITANYA.

Gisakitan ug Ulo Sulod sa 64 ka Tuig

Sa kataposan, nadiskobrehan sa usa ka Insek nga babaye ang hinungdan sa “pagsigeg sakit sa [iyang] ulo” nga naghasol kaniya kapin na sa 60 ka tuig, sa dihang gitangtang sa mga doktor ang tres sentimetros nga bala gikan sa iyang ulo. Ang babaye naigo sa ulo sa 13 anyos pa siya dihang gisulong sa mga Hapon ang usa ka baryo sa Lalawigan sa Xinyi sa Septiyembre 1943. Walay nakahunahuna nga bala diay maoy hinungdan sa pagsakit sa iyang ulo. Sa dihang nagsige nag sakit ang iyang ulo, nakita diha sa X-ray ang bala, nag-ingon ang Xinhua News Agency. Sumala sa taho, ang babaye nga karon 77 anyos na “wala na sakiti ug ulo.”

Taas ug Kinabuhing Balyena

Sa dihang ang lumad nga mga mangangayam sa Alaska nakapatay ug bowhead nga balyena niadtong 2007, ilang nakita nga nataop sa panit niini ang tumoy ug mga tipak sa usa ka karaang sapang. Nakita nga kini maoy “mga bahin sa usa ka mobuto nga sapang nga gihimo sa New Bedford [Massachusetts, U.S.A.] sa ulahing bahin sa katuigan sa 1800,” miingon ang The Boston Globe. Sa ngadto-ngadto, kining matanga sa bangkaw wala na gamita, busa ang mga historyano sa New Bedford Whaling Museum nakaingon nga ang balyena gisapang “tali sa 1885 ug 1895.” Busa kini tingali labing menos 115 anyos na dihang kini namatay. Matod pa sa Globe, kining ilang nakaplagan maoy “dugang pamatuod sa dugay nang gituohan nga ang bowhead nga balyena maoy usa sa kinatas-ag kinabuhi nga sus-ang mananap, nga mabuhi hangtod 150 ka tuig.”

Nabato nga Lasang

Ang mga geologo nakakitag nabato nga lasang ilalom sa yuta nga dunay daghang talagsaong mga tanom nga nangapuo na, nga ang uban niini mitubog kapin sa 130 piye. Ang talagsaong lasang nahimutang sa mga tunel-tunel sa minahan sa karbon sa Illinois, U.S.A. Ang mga siyentipiko nagtuo nga ang lasang nalubong sa yuta tungod sa kusog nga linog. “Makapainteres kaayo kini,” miingon si Bill DiMichele, nga maoy nangulo sa tem sa mga tigdukiduki nga nakadiskobre niini. “Among mahanduraw ang dagway sa lasang sa wala pa kini mabato.”

Nangalot ug Dugay na Kaayong Bino

Nagkadaghang bisita ang mangadto sa Macedonia, nga usa ka republika kanhi sa Yugoslavia, “aron sa pagpangalot ug dugay na kaayong bino nga nabilin . . . sa magkaanib nga mga sundalo panahon sa Gubat sa Kalibotan I,” nagreport ang mantalaang Kathimerini​—English Edition. Ang mga bisita, diin kadaghanan kanila gikan sa Pransiya nga nagdalag mapa, nangalot sa giabandonar nga mga bodega sa militar. Sa pagkakaron, ang tanang bino nga atua gihapon didto labing menos 90 na ka tuig, ug sumala pa sa mantalaan, “ang wala pa mabuksi nga botelya mokantidad . . . ug kutob 2,000 euro (2,675 dolyares).” Ang mga tagadidto nga nakakalot ug bino ug cognac miingon nga “wala pa sila makatilaw ug ingon niana ka lami nga bino.”