Pagsangyaw sa Maayong Balita sa Lagyong mga Dapit

SUMALA SA GIASOY NI HELEN JONES

Naglakaw ako sa naghuot nga tiyanggihan sa Bangalore, India, sa unang bahin sa katuigan sa 1970. Sa kalit lang, gisungag ako ug kabaw ug nalamba ako. Tiwasan na unta ko sa kabaw apan gitabangan ako sa usa ka babayeng Indian. Unsa may akong giadto didto sa India?

NATAWO ako sa 1931 ug nagdako sa nindot nga siyudad sa Vancouver, Canada. Ang akong mga ginikanan maayohong mga tawo apan dili hinimba. Pero ako diyosnon, busa niadtong bata pa ko tigtambongan ako sa Sunday school ug sa mga klase sa pagtuon ug Bibliya kon tingbakasyon.

Sa 1950, sa edad nga 19, naminyo ako kang Frank Schiller, nga may upat ka anak sa iyang unang asawa. Paglabay sa duha ka tuig, natawo ang among anak nga lalaki. Gusto namo nga may relihiyon kami; apan kay diborsiyado man si Frank, walay relihiyong modawat namo. Naglagot si Frank, busa dili na siya ganahang maghisgot ug relihiyon.

Nakakat-on sa Kamatuoran sa Bibliya

Sa 1954 malipayon kaayong giestorya sa akong igsoong lalaki ang gisaysay kaniya bahin sa Bibliya sa iyang kauban sa trabaho nga Saksi ni Jehova. Bisag daghan kog pangutana ug nahibalo kon diin nagtigom ang mga Saksi, wala ako motambong tungod sa tinamdan ni Frank sa relihiyon. Sa ngadto-ngadto, dihay duha ka Saksi nga miduaw sa among balay. Gusto kong mahibalo kon unsay gitudlo sa ilang relihiyon bahin sa diborsiyo, ug ilang gigamit ang Bibliya sa pagpakita kon unsang matang sa diborsiyo ang gitugotan sa Diyos. (Mateo 19:3-9) Ila akong gipasaligan nga pinaagi sa regular nga pagtuon sa Bibliya, ang akong mga pangutana bahin sa Bibliya matubag.

Nasuko pag-ayo si Frank kay dili siya ganahan sa mga Saksi. Sa 1955 mitambong ako sa Memoryal sa kamatayon ni Kristo ug sa mipauli ako, malipayon kaayo nakong giestoryahan siya bahin sa akong nakat-onan sa Bibliya. “Dili ko motuo!” siya misingka. “Hala, kon imo kanang mapamatud-an gikan sa Bibliya, motambong ko sa inyong walay pulos nga mga tigom!”

Gitunolan nako siya ug Bibliya ug maampingon niya kining gidawat nga nagpakita sa iyang pagtahod niini. Among gibasa ang tanang teksto nga akong gisulat ug wala kaayo koy gisulti kay ang Bibliya ray akong gipatubag. Wala makiglalis si Frank ug daw duna siyay gipamalandong nianang gabhiona.

Sa ngadto-ngadto, akong gipahinumdoman siya sa iyang saad nga motambong ug tigom. Nagpanuko siya sa pagtubag, “Aw, ning higayona lang ko motambong aron mahibalo ko kon unsay ilang ginahimo didto.” Ang pakigpulong pinasukad sa Bibliya maoy bahin sa pagpasakop sa mga asawa sa ilang bana. (Efeso 5:22, 23, 33) Nakadayeg gayod siya sa impormasyon. Sa samang higayon, mitambong si Frank sa Pagtuon sa Bantayanang Torre base sa artikulong “Pagkatagbaw sa Buluhaton.” Kay kugihan man, naikag kaayo si Frank sa maong impormasyon. Sukad niadto nagsige na siyag tambong sa mga tigom. Wala magdugay si Frank madasigon na sa pag-alagad, ug ako nagdumalag mga pagtuon sa Bibliya sa mga tawo nga sa ulahi nagpabawtismo. Si Frank ug ako, hasta ang  akong inahan ug igsoong lalaki, gibawtismohan agig simbolo sa among pagpahinungod sa Diyos niadtong 1955.

Gustong Mohimog Labaw Pa

Sa among distritong kombensiyon sa 1957 sa Seattle, Washington, U.S.A., dihay pakigpulong bahin sa pag-alagad sa dapit diin mas daghan ug gikinahanglang magmamantala sa Gingharian. ‘Jehova, gusto sab ko nga moalagad nianang mga dapita,’ ako miampo. ‘Palihog tabangi kami sa pag-adto sa dapit diin kami gikinahanglan.’ Apan nabalaka si Frank sa iyang responsibilidad sa pagpakaon ug pagsuportar sa among pamilya.​—1 Timoteo 5:8.

Pagkasunod tuig ang among pamilya mitambong sa kombensiyon sa New York City nga dungan nga gihimo sa Yankee Stadium ug Polo Grounds. Kapin sa 253,000 ang mitambong sa pakigpulong publiko! Natandog si Frank sa iyang nakita ug nadungog. Busa sa among pagpauli, kami nakadesisyon sa pagbalhin sa Kenya, Aprika kay Iningles man ang usa sa mga pinulongan didto ug dunay maayong mga eskuylahan usab didto para sa mga bata.

Sa 1959 among gibaligya ang among balay, gikarga ang among mga butang diha sa among sakyanan, ug mibiyahe paingon sa Montreal, Canada. Gikan didto misakay kamig barko paingon sa London, Inglaterra, ug gikan sa Inglaterra misakay kamig laing barko nga milawig sa Mediterranean Sea ug sa Red Sea paingon sa Indian Ocean. Sa kataposan, nakaabot kami sa Mombasa, Kenya, sa sidlakang bahin sa Aprika duol sa baybayon. Pagkasunod adlaw misakay kamig tren pa-Nairobi, ang kaulohang siyudad sa nasod.

Mga Panalangin nga Natagamtam Didto sa Aprika

Niadtong panahona gidili ang pagsangyaw sa mga Saksi ni Jehova sa Kenya, busa mabinantayon kami kon magsangyaw. Daghang magtiayon gikan sa ubang mga nasod nagpuyo usab sa Kenya, ug kami nga mga langyaw gitugotan sa pagpuyo didto. Kinahanglang dili mosobra sa napulo ang manambong sa tigom. Sa ato pa, ang among mga pamilya, hasta mga bata, dunay bahin sa tigom.

Pag-abot sa Kenya, nakakita kamig kapuy-an ug si Frank nakakitag trabaho. Ang unang babaye nga akong nasangyawan sa balay ug balay midawat ug pagtuon sa Bibliya ug sa ulahi nahimong payunir, nga maoy pagtawag sa bug-os panahong mga ministro sa mga Saksi ni Jehova. Gidumalahan usab nako ug pagtuon sa Bibliya ang usa ka dalagitang Sikh nga ginganlag Goody. Siya nagpabiling malig-on bisan pag gilutos sa iyang pamilya ug sa komunidad sa mga Sikh. Sa gipalayas si Goody Lull sa ilang balay, siya mipuyo uban sa usa ka pamilyang Saksi, nagpahinungod sa iyang kinabuhi kang Jehova, nagpayunir, ug sa ulahi migraduwar sa tunghaan sa misyonaryo sa Gilead.

Nagkaproblema ang among pamilya. Ang among kamagulangang anak nga lalaki nagsakit ug rheumatic fever, ug nasunog ang ubang parte sa lawas ni Frank samtang nag-ayo ug sakyanan busa nawad-an siyag trabaho. Sa ngadto-ngadto nakakita siyag trabaho sa Dar es Salaam, ang kaulohan sa Tanganyika (karon Tanzania), nga 1,000 kilometros ang gilay-on. Busa among gikarga ang among mga gamit diha sa sakyanan ug gisugdan ang taas nga biyahe paingon didto. Mainiton kaming gidawat sa kongregasyon sa Dar es Salaam, nga gamay pa niadtong tungora.

Bisag gidili sa gobyerno ang pagsangyaw sa Tanzania niadtong panahona, dili sila estrikto sa pagpatuman niini. Sa 1963, giduaw kami ni Milton Henschel, ang hawas gikan sa tibuok-kalibotang hedkuwarter sa mga Saksi ni Jehova didto sa Amerika. Sa nagpakigpulong siya sa Karimjee Hall, nga mao ang kinanindotang awditoryum sa nasod, usa ka edarang lalaki nga morag pobreng tan-awon mitapad nako. Ako siyang gitimbaya ug akong gipagamit kaniya ang akong Bibliya ug songbok. Pagkahuman sa programa, gidapit nako siya sa pagtambong pag-usab. Paglakaw niya, dali-dali nga miduol kanako ang mga Saksi nga tagadidto.

“Nakaila ka ba kon kinsa to siya?” sila nangutana. “Mayor to sa Dar es Salaam!” Nanghulga siya sa primero nga iyang ipahunong ang among asembliya. Daw nagplano siya nga kon dili maayo ang akong tinagdan kaniya kay kono pobre siya, nan may katarongan na siya sa pagpahunong sa asembliya. Apan nakadayeg kaayo siya sa pagkamatinagdanon ug kaikag nga gipakita ngadto kaniya busa gipasagdan na lang niyang matapos ang asembliya. Dihay 274 nga nanambong, ug 16 ang gibawtismohan!

 Samtang didto kami sa Tanzania, ang nasod nahimong independente. Ang mga langyaw dili na makasulod ug trabaho. Busa ang kadaghanan nila napugos sa paghawa sa nasod, apan si Frank nakakita ra gayod ug trabaho sa dihang gipahibalo siya nga may nagkinahanglag maayong mekaniko sa tren. Tungod niana nakapabilin kami ug upat ka tuig sa Tanzania. Sa dihang natapos ang kontrata ni Frank, mipauli kami sa Canada, hangtod nanagko ug nangaminyo ang tanan namong anak. Para namo dili pa kami tigulang ug gusto kami nga mohimo pag dugang.

Miadto sa India

Sa 1970, sa rekomendasyon sa sangang buhatan sa mga Saksi ni Jehova sa Bombay (karon Mumbai), miadto kami sa Bangalore, usa ka siyudad nga may populasyong mga 1.6 milyones niadtong panahona. Didto ako gisungag ug kabaw. Niadtong panahona usa lang ang Iningles ug sinultihan nga kongregasyon didto nga may 40 ka membro ug usa ka nahilit nga grupo nga nagsultig Tamil. Ubay-ubayng mga lalaki ang gidumalahan ni Frank ug pagtuon nga miuswag sa ilang kahibalo sa Bibliya ug sa ulahi nahimong Kristohanong mga ansiyano. Nakadumala usab ako ug pagtuon sa mga pamilya nga nahimong mga alagad ni Jehova sa ulahi.

Usa ka babaye nga ginganlag Gloria nagpuyo sa eskuwater. Sa dihang giduaw nako siya sa unang higayon, iya akong gipadayon. Kay wala may lingkoranan, nangyaka kami sa salog. Gibinlan nako siya ug Ang Bantayanang Torre, ug gigunting niya gikan niini ang teksto sa Bibliya nga Pinadayag 4:11 ug gipatapot kini sa bungbong aron iyang makita adlaw-adlaw. Ang usa ka bahin niini nagkanayon: “Takos ikaw, Jehova,” nga para niya makapatandog kaayo nga mga pulong. Paglabay sa usa ka tuig, siya gibawtismohan.

Gidapit si Frank sa pagtrabaho ug usa ka tuig sa sangang buhatan sa Bombay ug sa pagdumala sa pagtukod sa unang Assembly Hall sa mga Saksi ni Jehova sa India. Ang Assembly Hall gitukod diha sa ikaduhang andana sa sangang buhatan. Kapin lag diyutay sa 3,000 ang mga Saksi sa India niadtong panahona, ug wala makaabot ug 10 ang nag-alagad diha sa sanga. Sa 1975, nahutdan kami ug pondo busa masub-anon kaming nanamilit sa among pinangga nga mga higala.

Mibalik na Usab sa Aprika

Paglabay sa napulo ka tuig, si Frank may pensiyon nang madawat. Busa miboluntaryo kami sa internasyonal nga programa sa pagpanukod ug mga sangang buhatan. Nakadawat kami ug sulat nga nagsugo kanamo sa pag-adto sa Igieduma, Nigeria, kay gisugdan na ang pagpanukod didto. Sa Igieduma, gidumalahan ni Frank ug pagtuon sa Bibliya ang usa ka lalaki sa silingang baryo, nga sa ulahi nahimong membro sa sanga sa mga Saksi ni Jehova sa Nigeria.

Dayon, miadto kami sa Zaire sa pagtabang sa pagtukod sa sangang buhatan didto. Wala madugay human niana, ang pagsangyaw gidili ug ang among mga pasaporte gikompiskar. Si Frank giatake sa kasingkasing samtang nagtrabaho apan naulian ra siya. Sa ngadto-ngadto, gipapahawa ang tanang trabahante sa pagpanukod, ug kami gipaadto sa Liberia nga silingang nasod. Didto sa sangang buhatan sa Monrovia, gihangyo si Frank sa pag-ayo sa generitor. Sa dihang ang gitagal nga petsa sa among bisa natapos sa 1986, kami mipauli na usab sa Canada.

Kataposang Giadtoan​—Ecuador

Wala madugay human niadto, among nabalitaan nga ang among suod nga higalang si Andy Kidd mibalhin sa Ecuador ug malipayon sa iyang pagsangyaw didto. Si Andy lang ang ansiyano sa kongregasyon, busa siyay nagdumala sa halos tanang tigom. Iya kaming gidapit sa pag-adto didto, busa sa 1988 miadto kami sa sanga sa Ecuador ug mainiton kaming gidawat.

Nakakita kamig komportableng puy-anan; apan kinahanglang magtuon kamig Kinatsila, ug si Frank 71 anyos na. Sulod sa duha ka tuig, bisag dili kaayo kami larinong mosultig Kinatsila, 12 ka tawo ang among natabangan sa pagpabawtismo. Gidapit si Frank sa pagtabang sa pagtukod sa sanga sa Ecuador. Iyang gidumalahan usab ug pagtuon sa Bibliya ang bana sa usa sa unang mga Saksi sa Guayaquil. Kining tawhana, nga usa ka magsusupak sulod sa 46 ka tuig, nahimong among higala ug igsoon sa pagtuo.

Namatyan ug Minahal sa Kinabuhi

Mipuyo kami sikbit sa gamayng lungsod sa Ancón, duol sa Dagat Pasipiko, diin nakatabang kami sa pagtukod ug bag-ong Kingdom Hall. Makapasubo  kaayo kay niadtong Nobyembre 4, 1998, human makahatag sa kataposang pakigpulong sa Tigom sa Pag-alagad, si Frank giatake sa kasingkasing ug namatay nianang gabhiona. Matinabangon kaayo ang among mga igsoon sa kongregasyon! Pagkasunod adlaw, si Frank gilubong sa sementeryo atbang sa Kingdom Hall. Sakit kaayo sa dughan kon mamatyan kag minahal sa kinabuhi.

Kinahanglang mopauli ako sa Canada, nga nag-inusara niining higayona sa pag-asikaso sa mga butang maylabot sa akong pamilya ug sa pipila ka papeles. Si Jehova wala gayod malimot nako sa panahong nagmagul-anon ako. Nakadawat ako ug sulat gikan sa sanga sa Ecuador nga nagdapit kanako sa pagbalik didto. Busa mibalik ako ug nag-abang ug gamayng apartment duol sa sangang buhatan. Kay okupado man kaayo ko sa trabaho sa sanga ug sa ministeryo, naantos ko ang kasakit sa pagbangotan kang Frank, apan gibati gihapon ako ug kamingaw.

Padayon sa Buluhaton

Sa ngadto-ngadto, nakaila nako si Junior Jones. Taga-Amerika siya ug miadto sa Ecuador sa 1997 ingong payunir. Parehas kamig tumong ug gusto. Nagpakasal kami sa Oktubre 2000. May kasinatian si Junior sa konstruksiyon, busa gidapit kami sa pagtapos sa pagtukod sa Assembly Hall sa Cuenca, usa ka siyudad nga nahimutang sa Kabukiran sa Andes. Dayon, sa Abril 30, 2006, si Geoffrey Jackson nga membro sa Nagamandong Lawas sa mga Saksi ni Jehova miabot gikan sa New York ug mihatag ug pakigpulong sa pagpahinungod, nga gitambongan ug 6,554 ka tawo.

Kinsay makadahom nga diha sa lagyong mga dapit​—sa Amerika del Sur, Aprika, ug India—​ang pagsangyaw sa Gingharian mouswag pag-ayo? Si Junior ug ako wala gayoy plano nga moundang sa bug-os panahong pag-alagad. Dali ra kaayong milabay ang kapin sa 50 ka tuig nga pag-alagad nako kang Jehova nga morag gahapon lang ako nagsugod. Ug nasayod ko nga inig-abot sa bag-ong kalibotan, ang panahon nga atong gikinabuhian karon daw molabay lang usab ug kalit nga dili mamatikdan.​—Pinadayag 21:3-5; 22:20.

[Mapa/​Hulagway sa panid 15]

(Alang sa aktuwal nga pagkahan-ay, tan-awa ang publikasyon)

Mga Dapit nga Among Gialagaran

CANADA → ENGLAND → KENYA → TANZANIA

CANADA → INDIA

CANADA → NIGERIA → CONGO, DEM. REP. (ZAIRE) → LIBERIA

CANADA → ECUADOR

[Other locations]

UNITED STATES OF AMERICA

[Hulagway]

Uban kang Frank sa India paingon sa usa ka asembliya

[Hulagway sa panid 15]

Uban sa akong bana, si Junior Jones