Usa Lang ba Gayod ang Tinuod nga Relihiyon?

Ang ubang tawo masuko nianang pangutanaha. Tungod sa kadaghan sa mga tinuohan sa tibuok kalibotan, sila nakaingon nga hiktin ug panghunahuna ug hambogiro ang tawong mangangkon nga ang iya rang relihiyon ang tinuod. Sila nagtuo nga duna gayoy maayo diha sa tanan o sa kadaghanang relihiyon. Ingon ba usab niana ang imong hunahuna?

TINUOD, may mga kahimtang nga maayo usab nga modawat kita ug opinyon sa uban. Pananglitan, para sa usa ka tawo ang usa ka matang sa pagkaon makapahimsog kaniya. Apan angay ba niya kining ipamugos sa uban, nga morag kini lang ang bugtong paagi aron mahimong himsog? Siyempre, siya maalamon ug makataronganon kon siya modawat nga ang ubang pagkaong gusto sa uban maayo usab o kaha mas maayo pa kay sa pagkaon nga iyang gusto.

Pwede ba usab kining ipadapat sa relihiyon? Aduna bay daghang kapilian, depende sa pagmatuto ug kaisipan sa tawo? O aduna bay usa lang ka hugpong sa tinuod nga mga pagtulon-an sa relihiyon alang sa tanang tawo? Atong tan-awon kon unsay gisulti sa Bibliya bahin niini. Una, atong susihon kon may kamatuoran ba gayod nga makaplagan. Kay kon wala, dili na mistil nga mangita pa kita sa tinuod nga relihiyon.

Makaplagan ba ang Kamatuoran?

Sa hapit nang patyon si Jesu-Kristo, ang nagsukitsukit kaniya nga si Gobernador Poncio Pilato sa Roma iyang gisultihan niini: “Ang matag usa nga dapig sa kamatuoran mamati sa akong tingog.” Ang tubag ni Pilato nagpakita nga siya nagduhaduha sa dihang siya miingon: “Unsa bay kamatuoran?” (Juan 18:37, 38) Sa laing bahin, way lipodlipod nga gipadayag ni Jesus ang kamatuoran. Nagtuo gayod siya niini. Tagda, pananglitan, ang upat ka pangatarongan nga gipadayag ni Jesus ngadto sa mga tawo.

“Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran.”​—Juan 18:37.

“Ako ang dalan ug ang kamatuoran ug ang kinabuhi.”​—Juan 14:6.

“Ang Diyos maoy Espiritu, ug silang magasimba kaniya kinahanglan nga magasimba uban sa espiritu ug sa kamatuoran.”​—Juan 4:23, 24.

“Kon magpabilin kamo sa akong pulong, kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.”​—Juan 8:31, 32.

Sanglit si Jesus kombinsido kaayo sa pag-ingon nga dunay kamatuoran ug nga kita makakat-on niini, dili ba angayng susihon usab nato nga posibleng dunay kamatuoran ug nga kini makaplagan?

Aduna ba Gayoy Hingpit nga Kamatuoran?

Mouyon ka gayod nga dunay mga butang nga dili nimo kaduhaduhaan. Segurado ka nga naglungtad ka ug nga tinuod ang mga butang sa imong palibot. Ang mga kahoy, bukid, panganod, adlaw, ug bulan​—ang kalibotan—​dili hinanduraw lamang sa imong kaisipan. Hinuon, basin may mga tawo nga pinolosopo nga moingon nga bisan kining mga butanga kaduhaduhaan. Apan siyempre dili ka mouyon sa ilang binuang nga ideya.

Anaa pa kanang mga balaod sa kinaiyahan. Ug nagtuo ka gayod niini. Pananglitan, kon moambak ka sa pangpang, mahulog ka; kon dili ka mokaon, gutmon ka; ug kon dili ka mokaon sa taas nga panahon, mamatay ka. Dili ka mokuwestiyon kon ang maong mga balaod sa kinaiyahan aplikado sa uban apan dili sa tanan. Kini para sa tanan.

 Ang Bibliya naghisgot bahin sa usa ka balaod nga para sa tanan sa dihang kini nangutana: “Makapundok ba ang usa ka tawo ug kalayo sa iyang sabakan ug dili masunog ang iyang mga besti?” Sa pagkatinuod, sa dihang gisulat kini, ang tanan nahibalo nga masunog ang besti kon ipaduol sa kalayo. Apan dunay gitumbok nga mas dakong punto kini nga sanglitanan sa Bibliya, nga “si bisan kinsa nga makigdulog sa asawa sa iyang isigkatawo” mag-antos sa dili maayong resulta.​—Proverbio 6:27, 29.

Makaseguro ba gayod kita nga hingpit nga kamatuoran kanang mga pulonga? Ang uban moingong dili. Sila moingon nga ang matag tawo dunay kaugalingong mga sukdanan sa moral, nga kini depende sa pagmatuto, sa tinuohan, ug kahimtang sa matag tawo. Apan tagda ang pipila ka sukdanan sa Diyos sa moralidad nga mabasa diha sa Bibliya. Dili ba aplikado kini sa tanan?

Ang pagpanapaw gidili sa Bibliya. (1 Corinto 6:9, 10) Ang uban dili motuo niini nga balaod ug busa manapaw sila. Pero, mag-antos sila sa mapait nga mga resulta sama sa pagtulisok sa konsensiya, diborsiyo, ug dugayng maalim nga kasakit sa dughan sa tanang hingtungdan.

Ang paghubog-hubog gidili usab sa Diyos. (Proverbio 23:20; Efeso 5:18) Unsay mahitabo kon mahimo na kining bisyo sa tawo? Kasagaran sila mawad-ag trabaho, magsakit, ug mabungkag ang pamilya, kinsa mag-antos usab sa kaguol. (Proverbio 23:29-35) Kining daotang mga epekto antoson usab bisan sa mga tawong dili motuo nga daotan ang paghubog-hubog. Ang pagkatinuod ba niini nga mga balaod sa moral nagdepende sa tinuohan o kaisipan sa matag tawo?

Dayon anaa pay positibong mga balaod sa Bibliya bahin sa moralidad​—sama sa paghigugma sa bana sa iyang asawa, sa pagtahod sa asawa sa iyang bana, ug sa paghimog maayo ngadto sa uban. (Mateo 7:12; Efeso 5:33) Ang pagtuman niining mga balaora moresulta ug maayo. Makaingon ka ba nga kining tambaga bahin sa moralidad maayo sa uban apan dili sa tanan?

Sundon man o dili sa tawo kini nga mga balaod sa Bibliya bahin sa moralidad, kini duna gayoy epekto. Kini nagpakita lang nga kini nga mga balaod dili magdepende sa opinyon sa tawo. Kamatuoran gayod kini. Dili ikalimod nga moresulta ug maayo ang pagsunod sa mga balaod sa Bibliya apan kon kini supakon, kini moresulta ug daotan.

Busa palandonga: Kon ang mga balaod sa Bibliya bahin sa moralidad aplikado sa tanan, komosta ang mga sukdanan sa Pulong sa Diyos bahin sa pagsimba? Komosta ang giingon niini bahin sa mahitabo kanato sa dihang mamatay kita ug sa atong paglaom nga kinabuhing walay kataposan sa umaabot? Busa, kining maong mga pagtulon-an sa Bibliya kamatuoran usab, nga gihatag alang sa tanan. Ang kaayohan sa pagsunod sa mga pagtulon-an sa Bibliya ug ang mga resulta sa pagsupak niini maani sa tanan.

Ang kamatuoran makaplagan. Si Jesus nag-ingon nga ang Pulong sa Diyos, ang Bibliya, kamatuoran.  (Juan 17:17) Apan ang kamatuoran daw lisod makaplagan. Ngano man? Tungod kay daghan kaayong relihiyon ang nangangkon nga nagtudlo sa Bibliya. Unsang relihiyona ang nagtudlo sa kamatuoran sa Pulong sa Diyos? Usa lang ba gayod ka relihiyon? Dili ba makita ang kamatuoran, o ubang mga bahin niini, diha sa lainlaing mga relihiyon?

[Blurb sa panid 4]

Sa unsang paagi ang resulta sa paghikap ug kalayo susama sa pagsupak sa mga balaod sa Diyos?