Kataposang mga Adlaw​—Kanus-a?

“KAPIN na lamag usa ka bilyon ka tuig, atong madahom nga ang Yuta mapagba, maumaw ug madesyerto. Lisod handurawon kon sa unsang paagi makalahutay ang buhing mga linalang,” nag-ingon ang di pa dugayng gula sa magasing Sky & Telescope. Ngano? Tungod kay “ang sobrang kainit sa Adlaw mopabukal sa kadagatan ug mopagba sa mga kontinente,” nag-ingon ang magasing Astronomy. Kini midugang: “Kining malaglagong kahimtang dili lamang kay makahahadlok paminawon​—kini ang atong di-mapugngang dulnganan.”

Apan ang Bibliya nag-ingon: “Gitukod [sa Diyos] ang yuta ibabaw sa pihong mga dapit niini; kini dili matarog hangtod sa panahong walay tino, o hangtod sa kahangtoran.” (Salmo 104:5) Siyempre, ang Maglalalang sa yuta makapasalig usab sa padayong paglungtad niini. Ngani, siya “nag-umol niini aron pagapuy-an.” (Isaias 45:18) Apan dili pinaagi sa mga daotan, mamatay nga mga tawo. Ang Diyos nagtakda ug panahon sa pagpasig-uli sa iyang pagmando pinaagi sa Gingharian nga gihisgotan sa Daniel 2:44.

Si Jesus nagsangyaw bahin sa Gingharian sa Diyos. Siya naghisgot sa panahon sa paghukom sa mga nasod ug sa katawhan. Siya nagpasidaan bahin sa umaabot nga kasakitan nga mas grabe pa kay sa mga nahitabo na. Ug iyang gihatag ang daghang ilhanan nga magpaila nga haduol na ang kataposan niining kalibotana.​—Mateo 9:35; Marcos 13:19; Lucas 21:7-11; Juan 12:31.

Nakapaikag kini sa daghang tawo tungod sa kabantog sa nagsulti niini, nga mao si Jesus. Kanus-a man kini mahitabo? Pinaagi sa pagtuon sa mga tagna ug kronolohiya sa Bibliya, gisusi sa pipila kon kanus-a gayod kaha ang kataposan. Ang usa nga nanukiduki bahin niini mao ang matematisyan sa ika-17ng siglo nga si Sir Isaac Newton, nga nakadiskobre sa balaod sa grabidad ug nakaimbento sa calculus.

Si Jesus miingon sa iyang mga tinun-an: “Dili inyoha ang pagkahibalo sa mga panahon o mga yugto sa panahon nga gitudlo sa Amahan pinaagi  sa iyang kaugalingong kamandoan.” (Buhat 1:7) Ug sa dihang gihatag “ang ilhanan sa [iyang] presensiya ug sa kataposan sa sistema sa mga butang,” si Jesus miingon: “Mahitungod nianang adlawa ug taknaa walay nahibalo, ni ang mga manulonda sa mga langit ni ang Anak, kondili ang Amahan lamang.” (Mateo 24:3, 36) Dayon, human itandi ang kalaglagan sa mga daotan sa mga adlaw ni Noe ug ang kalaglagan nga mahitabo panahon sa “presensiya sa Anak sa tawo,” si Jesus miingon: “Magpadayon sa pagbantay tungod kay kamo wala mahibalo kon unsang adlawa moabot ang inyong Ginoo.”​—Mateo 24:39, 42.

Busa bisan tuod ang eksaktong oras sa kataposan niining “sistema sa mga butang” wala ibutyag kanato, “ang ilhanan” nga gihatag ni Jesus nagpahibalo kanato kon asa na kita sa yugto sa panahon nga nailhan ingong “kataposang mga adlaw.” (2 Timoteo 3:1) Panahon unya kana sa “pagtukaw” aron kita ‘molampos sa pag-ikyas niining tanang butanga nga gitakdang mahitabo.’​—Lucas 21:36.

Sa wala pa gihatag ang aktuwal nga ilhanan, si Jesus nagpasidaan: “Pagbantay nga dili kamo mapahisalaag; kay daghan ang motungha pinasukad sa akong ngalan, nga magaingon, ‘Ako mao siya,’ ug, ‘Ang gitakdang panahon miabot na.’ Ayaw pagsunod kanila. Dugang pa, inigkadungog ninyo sa mga gubat ug mga kasamok, ayaw kamo kalisang. Kay kining mga butanga kinahanglang mahitabo una, apan ang kataposan dili pa mahitabo dihadiha.”​—Lucas 21:8, 9.

Unsa ang Ilhanan?

Gihisgotan ni Jesus kon unsay magtimaan sa kataposang mga adlaw sa dihang siya miingon: “Ang nasod motindog batok sa nasod, ug ang gingharian batok sa gingharian; ug aduna unyay dagkong mga linog, ug sa nagkalainlaing mga dapit mga kamatay ug mga kanihit sa pagkaon; ug aduna unyay makalilisang nga mga talan-awon ug dagkong mga ilhanan gikan sa langit.” (Lucas 21:10, 11) Siya usab miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Ang gihisgotan ni Jesus nga mga gubat, linog, kasakitan, ug kakulang sa pagkaon dili kay karon ra nahitabo. Nagakahitabo na kini sukad pa sa kasaysayan sa tawo. Ang kalainan mao nga kining tanan mahitabo sa usa ka yugto sa panahon.

Pangutan-a ang imong kaugalingon, ‘Kanus-a man nga ang tanang bahin sa ilhanan nga gihisgotan sa Ebanghelyo nahitabo sa samang yugto sa panahon?’ Sukad sa 1914, nasaksihan sa tawo ang malaglagong mga gubat sa kalibotan; kusog nga mga linog ug malaglagong mga epekto, sama sa mga tsunami; kaylap nga makamatay nga mga sakit sama sa malarya, trangkaso Espanyola, ug AIDS; ug minilyon usab ang nangamatay sa gutom. Anaa ang tibuok yutang kahadlok tungod sa hulga sa terorismo ug sa mga hinagiban nga makapatay ug hilabihan ka daghang tawo; ug ang tibuok kalibotang pagsangyaw sa maayong balita bahin sa langitnong Gingharian sa Diyos pinaagi sa mga Saksi ni Jehova. Kining tanan nahitabo sama sa gitagna ni Jesus.

Hinumdomi usab ang gisulat ni apostol Pablo: “Hibaloi kini, nga sa kataposang mga adlaw  moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, magmahigugmaon sa salapi, mapagawalon, mapahitas-on, mapasipalahon, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo, mga mahigugmaon sa kalipayan inay nga mga mahigugmaon sa Diyos, nga nagbaton sa dagway sa diyosnong pagkamahinalaron apan nagpanghimakak sa gahom niini.” (2 Timoteo 3:1-5) Oo, ang ‘makuyaw nga mga panahon’ tungod sa kaylap nga pagkamalinapason sa balaod, pagkadili-diyosnon, kapintas, ug pagkamapasigarbohon makita sa tibuok yuta. a

Apan dugay pa ba ang “kataposang mga adlaw” nga maoy unang mahitabo sa dili pa gayod moabot ang kataposan? Aduna bay laing pamatuod kon kanus-a kini magsugod?

Kanus-a Magsugod ang “Kataposang mga Adlaw”?

Human niya madawat ang panan-awon nga mahitabo pa sa umaabot, ang manalagna nga si Daniel giingnan: “Nianang panahona [“ang panahon sa kataposan” nga gihisgotan sa Daniel 11:40] si Miguel [Jesu-Kristo] mobarog, ang dakong prinsipe nga nagbarog alang sa mga anak sa imong katawhan.” (Daniel 12:1) Unsay buhaton ni Miguel?

Ang basahon sa Pinadayag naghisgot bahin sa panahon sa paghari ni Miguel. Kini nag-ingon: “Miulbo ang gubat sa langit: Si Miguel ug ang iyang mga manulonda nakiggubat sa dragon, ug ang dragon ug ang mga manulonda niini nakiggubat apan kini wala makadaog, ni may dapit pa alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, nga nagpahisalaag sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya. Tungod niini, paglipay kamong kalangitan ug kamong nanagpuyo niini! Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.”​—Pinadayag 12:7-9, 12.

Ang kronolohiya sa Bibliya nagpakita nga kining gubata nga nagwagtang kang Satanas ug sa iyang mga demonyo gikan sa langit, moresulta sa dakong kasakitan sa yuta tungod sa kasuko sa Yawa, kay siya nahibalo nga hamubo na lamang ang iyang pagmando sa yuta. Misamot ang iyang kasuko niining kataposang mga adlaw, hangtod nga siya bug-os nga maparot sa gubat sa Armagedon.​—Pinadayag 16:14, 16; 19:11, 15; 20:1-3.

Human hisgoti ang resulta nianang gubata sa langit, si apostol Juan mipahayag: “Nadungog ko ang usa ka makusog nga tingog didto sa langit nga nag-ingon: ‘Ania na ang kaluwasan ug ang gahom ug ang gingharian sa atong Diyos ug ang awtoridad sa iyang Kristo, tungod kay ang magsusumbong sa atong mga igsoon gitambog na, kinsa nagsumbong kanila adlaw ug gabii atubangan sa atong Diyos!’” (Pinadayag 12:10) Namatikdan ba nimo nga kini nagpahibalo sa pagkatukod sa Gingharian nga mandoan ni Kristo? Oo, kanang langitnong Gingharian natukod sa 1914. b Apan sumala sa gipakita sa Salmo 110:2, si Jesus magmando “taliwala sa [iyang] mga kaaway” hangtod nga ang pagmando sa Gingharian molukop sa tibuok yuta sama sa langit.​—Mateo 6:10.

Makapaikag, ang manulonda nga nagsulti kang manalagnang Daniel sa umaabot nga mga hitabo nag-ingon usab: “Kon bahin kanimo, Oh Daniel, himoa nga tinago ang mga pulong ug timbrehi ang basahon, hangtod sa panahon sa kataposan. Daghan ang magngadto-nganhi, ug ang matuod nga kahibalo modagaya.” (Daniel 12:4) Kini dugang nagpamatuod nga kita ania na karon sa “panahon sa kataposan.” Ang kahibalo bahin sa kahulogan niining mga tagnaa natin-aw na ug kini ginawali sa tibuok yuta. c

 Kanus-a Matapos ang “Kataposang mga Adlaw”?

Wala gayod hisgoti sa Bibliya kon unsa kini ka dugay. Apan sa kataposang mga adlaw, ang kahimtang sa yuta magkagrabe samtang magkamubo ang panahon ni Satanas. Si apostol Pablo nagpasidaan nga ang “mga tawong daotan ug mga impostor mosamot pa kangil-ad, nga nagapahisalaag ug nahisalaag.” (2 Timoteo 3:13) Ug sa naghisgot sa mga butang nga umaabot, si Jesus nag-ingon: “Kanang mga adlawa maoy mga adlaw sa kasakitan nga wala pa mahitabo sukad sa sinugdan sa kalalangan nga gilalang sa Diyos hangtod nianang panahona, ug dili na gayod mahitabo pag-usab. Sa pagkatinuod, gawas kon pamub-on ni Jehova ang mga adlaw, walay unod nga maluwas. Apan tungod sa mga pinili nga iyang gipili iyang gipamubo ang mga adlaw.”​—Marcos 13:19, 20.

Ang pipila ka hitabo nga moabotay mao ang “dakong kasakitan,” lakip na ang gubat sa Armagedon, ug ang paggapos kang Satanas ug sa iyang mga demonyo aron sila dili na makapanghilabot sa yuta. (Mateo 24:21) Ang “Diyos nga dili makabakak,” nagpasalig kanato nga kini mahitabo gayod. (Tito 1:2) Ang Armagedon ug ang pagtambog kang Satanas maoy tungod sa pagsalga sa Diyos.

Si apostol Pablo giinspirar sa pagsulti kanato kon unsa gayoy mahitabo sa dili pa ipahinabo sa Diyos ang kalaglagan. Maylabot sa “mga panahon ug sa mga yugto sa panahon,” siya misulat: “Ang adlaw ni Jehova moabot sama sa kawatan sa kagabhion. Sa dihang sila magaingon: ‘Kalinaw ug kasegurohan!’ unya ang kalit nga kalaglagan modangat dihadiha kanila sama sa pag-ul-ol sa kasakit sa usa ka babayeng mabdos; ug dili gayod sila makaikyas.” (1 Tesalonica 5:1-3) Wala gisulti kon unsay hinungdan sa pagsinggit niining palso nga “kalinaw ug kasegurohan,” ug panahon ray makasulti niana. Apan dili kini makapugong sa umaabot nga adlaw sa paghukom ni Jehova. d

Kon kita kombinsido nga kining mga tagnaa tinuod, ang pagkahibalo niini magpalihok gayod kanato. Sa unsang paagi? Si Pedro mitubag: “Sanglit kining tanang butanga pagatunawon man sa ingon, angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova!” (2 Pedro 3:11, 12) Apan, mahibulong ka tingali, ‘Makahatag ba kinig kaayohan kanako?’ Tubagon kana sa sunod nga artikulo.

[Mga footnote]

[Blurb sa panid 5]

Si Jesus nag-ingon nga diyos lamang ang nahibalo “nianang adlawa ug taknaa”

[Hulagway sa panid 4]

Si Sir Isaac Newton

[Credit Line]

© A. H. C./​age fotostock

[Mga hulagway sa panid 7]

Ang ilhanan nga gihatag ni Jesus nakita sukad sa 1914

[Credit Lines]

© Heidi Bradner/​Panos Pictures

© Paul Smith/​Panos Pictures